اليوم .. عزاء اللاعب أحمد رفعت في مسجد المشير طنطاوي

يقام مساء اليوم الثلاثاء عزاء الراحل أحمد رفعت لاعب مودرن سبورت ومنتخب مصر في مسجد المشير طنطاوي بالتجمع الخامس .

وكان قد أعلن المهندس محمد رفعت، شقيق اللاعب أحمد رفعت، لاعب مودرن سبورت الراحل، موعد تلقي عزاء شقيقه في القاهرة، وذلك بعد أن تلقت واجب العزاء فيه بمسقط رأس الأسرة في قرية إبشان، التابعة لمركز بيلا بمحافظة كفر الشيخ.

وقال رفعت، عبر صفحته الشخصية على موقع التواصل الاجتماعي «فيس بوك»، عزاء أخي وحبيبي المغفور له- بإذن الله تعالى- الكابتن أحمد رفعت، يوم الثلاثاء في مسجد المشير طنطاوي.

وكان شقيق اللاعب الراحل أحمد رفعت، كتب عبر صفحته الشخصية، كلمات مؤثرة واصفًا شقيقه الراحل بأنه كان جبلاً يستند عليه.
فقدت روحي والله العظيم
وقال: أول مرة أكتب وقلبي وعقلي مش مستوعبين اللي بكتبه أو اللي بحكيه؛ لأن أنا النهارده فقدت روحي، والله العظيم روحي، وسندي وضهري، أخويا وأبويا كابتن أحمد رفعت، من 17 سنة أبويا رحمة الله عليه توفى، وكان عندي حوالي 12 سنة، ومكنتش حاسس بأي حاجة غير إن أبويا مش هشوفه تاني، وهيوحشني أووووي، فكنت بعيط وقدام الناس كلها.
أخويا كان شايل جبل على كتفه
وأضاف: "بس النهاردة أنا فعلاً أبويا مات؛ لأني معيطش كتير، من كتر الألم الدموع منزلتش قدام الناس؛ لأن ضهري اتكسر، وقلبي اتعور، أخويا كان شايل جبل على كتفه وأنا مش حاسس بيه، أنا بتمنى إن أنا اللي أكون مكانه؛ لأني مش هعرف أعمل اللي هو كان بيعمله، من حنية، وخوف علينا، وحكمته، وصبره اللي مش عارف أفسره لحد دلوقتي، الشخص ده كان راجل بمعني الكلمة، أنا مش عارف أتكلم، بس أنا مش قادر أصدق إني مش هشوفه تاني، ولا هسمع صوته تاني، أنا نفسي أخويا يرجع تاني، يا رب رجعه تاني يا رب".
شقيق أحمد رفعت: لا تنسوه في دعائكم
قال شقيق أحمد رفعت: "بالله عليكم لا تنسوه في دعائكم، ولا في صلواتكم، والله كان طيب لين سهل، قريب، وكان من الصالحين، وخيره كتير أوي ع الناس كلها.. إنا لله وإنا إليه راجعون، اللهم أجرنا في مصيبتنا، اللهم ارحمه واغفر له، وثبته عند السؤال، واجعل هذه الليلة أسعد لياليه يا رب العالمين".