ألتراس الأهلي يحيي ذكرى ميلاد الراحل "الغندور" أسطورة "تالتة شمال"

أحيت رابطة مشجعي النادي الأهلي " ألتراس ديفيلز" ذكرى ميلاد الراحل محمود الغندور مؤسس الرابطة وأسطورة مدرجات الدرجة الثالثة اليسرى الذي توفى في أحداث ستاد بورسعيد وذلك بكتابة بيان على صفحة الرابطة على موقع التواصل الاجتماعي فيسبوك.
وجاء البيان كالآتي : هكمل حلمك ولازم أتعب أكتر.. مش هحسس حد غندور بطل يشجع" لما غنينا الأغنية بعد وفاة محمود الغندور مكنش مجرد كلام وخلاص، كنا نقصد كل حرف بأننا هنكمل حلم غندور ومش هنضيع تعبه وتضحياته، غندور مكنش مجرد مؤسس جروب أولتراس، غندور كان أب وأخ وصديق، كان تفاؤل وأمل وجدعنة، أحلامه مكنش ليها حدود ومكنتش في قاموسه كلمة مستحيل، غندور كان يتيم الأب والأم فقرر يعمل عيلة اسمها "أولتراس ديفيلز" .
كان بيضحي بكل حاجة عشان عيلته دي تكبر وتبقى كيان بيشجع الكيان، كان بيبات في الشوارع وعلى الرصيف علشان يعمل دخلة أو يجيب جلاد، كان دايماً تفكيره سابق عصره وسنه، كان بيشوف اللي محدش فينا بيشوفوا وكان بيقدر يلمس حلمه و يحققه، غندور عاش علشان الجروب وعشان بيعشق الأهلي، وفي الأخر مات برضه وهو بيشجع الأهلي وبيحمي البانر بتاع الجروب و بيحمي اخواته و اصحابه و عيلته، كانت أخر كلماته للرجالة "متخافوش ومتجروش".
غندور الله يرحمه ساب وراه رجالة هتفضل مكملة حلمه وهتفضل ورا حقه لحد ما تموت .
من الآخر كدة .. غندور كان "أسطورة" التالتة شمال.. النهاردة 4-6 تاني عيد ميلاد لغندور بعد وفاته، كان هيكمل أربعة وعشرين سنة، حقك لسة مجاش وعمرنا ما هنسيبه، كل سنة وانت في الجنة. كل سنة و انت شهيد.. غندور اسطورة اولتراس لن تتكرر.