تبرأت من الفن وهاجمت والدها .. أزمات حلا شيحة عرض مستمر

آثارت الفنانة حلا شيحة ، جدلا واسعا خلال الأيام الماضية بعد مهاجمتها للفنان تامر حسنى، لطرحه كليب "بحبك" من فيلم "مش أنا"، ونرصد فى السطور التالية القصة الكاملة للأزمة...

بداية الأزمة
هاجمت الفنانة حلا شيحة ، الفنان تامر حسنى بعد تجاهله لها وطرحه فيديو كليب "بحبك" من فيلم "مش أنا" والذي يتضمن مشاهد رومانسية تجمعه بها، رغم أنها نشرت عبر صفحتها الشخصية منشورا كشفت فيه تبرؤها من العمل فى الوقت الراهن.

وكتبت حلا شيحة عبر حسابها بموقع انستجرام مهاجمة تامر حسنى: "أنا اتفاجئت بنزول كليب يجمع فيه مشاهد متفرقة من الفيلم وخصوصا بعد آخر بوست نزلته ووضحت فيه أنا إيه ، و اتفاجئت أكتر خصوصا بعد وعد تامر حسني ليا وتأكيده إنه حيحترم رغبتي وبعض الطلبات اللي طلبتها منه بكل احترام وود الصيف اللي فات وأکدلي إنه حيحترم رغبتي".

وأضافت حلا شيحة: "إحنا يمكن نجحنا بمقاييس الدنيا بس صدقوني بمقاييس ربنا احنا لم ولن ننجح أنا عارفة ومتأكدة إن زملائي جواهم خير بس للآسف فتنة الشهرة والنجاح مش بتخلينا نشوف ونقيس الأمور صح بتكلم من قلبي، الكليب ده ميرضيش ربنا وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وننسى".
وتابعت حلا شيحة : "أنا مش حتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لأن في الآخرة ده اللي حينفعنا مش الشهرة ولا النجاح، لا هو مش نجاح أصلا علشان النجاح الحقيقي حاجة تانية خالص، احنا أغلبنا ناسينها إلا القليلين منا الفن لو بيخلينا نبعد عن منهج ربنا ومنبقاش قدوة لولادنا يبقي باطل و ميبقاش فن".

وأكملت حلا شيحة :"احنا كلنا عندنا امتحان في الدنيا دي ، وحابة أفكرك بالفيديو ده يا تامر اللي قولت فيه أنا مش بتمني أموت وأنا مطرب أنا دايما خايف کده، كلام أكيد قولته في لحظة صدق جواك و جوانا كلنا ، شوفه تاني يمكن يفكرك إن جواك أكيد في صراع وأنا وكلنا بنغلط بس المهم في الآخر نتدارك الغلط و نصلح .{إلا من تاب و امن عمل عملا صلحا أوللېك يبدل الله سيئاتهم حسن وكان الله غفورا رحيما.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".

تامر حسنى يرد على هجوم حلا شيحة

رد الفنان تامر حسني ، علي اتهامات الفنانة حلا شيحة له، بنشر فيديو كليب بحبك من فيلم مش أنا و الذي يتضمن مشاهد رومانسية تجمعهما على غير رضاها.

وكتب تامر حسني قائلا : " نهاركم جميل يا أغلى الناس الحقيقة عمري ما بتخيل إني أدخل في نقاش بالشكل دا مع زميل بحترمه وكان في بينا كل خير".

وتابع: "للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك ، فأنا مضطر أرد هنا برضو .. لا أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف.. الحقيقة اني إحترمت كلامي معاكي ووعدتك أشيل مشاهد تانيه طلبتيها وشيلتها بالفعل وشكرتيني عليها ، ولو حابه تفتكري المشاهد اللي اتشالت بعد إذنك روحي شوفيها في المونتاچ عند عمرو عاكف أو كلميه يبعتهالك كلها موجودة، وبعدين الفيلم بقاله 3 أسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ".

معز مسعود يدعم حلا شيحة

وجه معز مسعود، رسالة لزوجته الفنانة حلا شيحة بعد تصريحاتها الأخيرة المثيرة للجدل وتبرأها من مشاهدها الرومانسية مع الفنان تامر حسني في كليب "بحبك"، مشيرةً إلى أن هذه التصريحات من الممكن أن تعرضها للمساءلة القانونية.
وكتب معز مسعود، عبر حسابه الشخصي بموقع "انستجرام ": "إلى زوجتي الغالية حلا ، قادر أفهم انزعاجك نتيجة مرور وقت كبير على تصوير الفيلم ده بسبب كورونا ، وإن حياتك اتغيرت زي ما انتِ قولتي في البوست بكل احترام.

وتابع معز مسعود: " قادر كمان أفهم انزعاجك من التركيز على المشاهد دي وتجميعها رغم الوعد الشفهي بتجنب ذلك من صناع العمل (الكلام ماكانش عن إلغاء الكليب ولكن إن التركيز ميكونش على مشاهد معينة زي دلوقتي)، خصوصا مع نزول الكليب في توقيت له قدسية كبيرة بالنسبة لنا".

وأضاف معز مسعود: ولو كنا نعرف ان الوعد مش كافي علشان يحل المشكلة دي كنا مشينا في حلول تانية.. اللي بينك وبين ربنا فيما يخص اجورك عن أعمالك السابقة مش مضطرة تقوليه لحد.. ومتشغليش بالك بأي كلام بيتقال بغير علم، الناس مش بتاخد بالها من تفاصيل كتير أبسطها الوقت الطويل والأحداث الكبيرة اللي بتحصل في حياة اللي بيتكلموا عنهم بمنتهى الأريحية والثقة والتسرع في إصدار الأحكام.

وأوضح: "قادر افهم قصدك لما اتكلمتي عن (نوع معيّن) من المشاهد يعني نوع معيّن من الفن و (مش تعميم على الفن كله).

وأكمل معز مسعود: " عاوز أفكرك يا حبيبتي إن رحلتنا هي رحلة بحث عن الحق والخير والجمال.. رحلة اعتزاز بالثقافة والهوية.. نموذج قوي لرفض التطرف على الناحيتين.. الناحية المكسوفة من هويتها وبتقلّد الغرب من غير حكمة أو علم أو عزة (اللي أنا سميته "الانتحار الثقافي" في كلمتي في الحوار الوطني سنة 2011) والناحية التانية المسجونة في قوالب مميتة للفكر والفنون،
كل ناحية منهم فاكرة انها معاها الحقيقة المطلقة وهيفضلوا يتخانقوا إلى يوم الدين.. لحد ما يظهر ناس عندهم الشجاعة والاعتزاز بثقافاتنا وهويتنا.. وبيحملوا هم أولادنا والأجيال الجاية.. وساعتها هيكون فنّنا بيعبر بجد عننا.

و تابع معز مسعود : الشجعان زيك بس هم الي بيمشوا الرحلة بصدق وإصرار لحد ما يوصلوا.. مهما كترت المحطات.. مهما كان الألم والحيرة واللخبطة، مهما كان الهجوم والخذلان والمزايدات، مهما كان التمن اللي بيتدفع، الشجعان زيك بس هم اللي بيراجعوا نفسهم وبيعترفوا بأخطائهم ويصلحوها، ده غير إن المشهور رحلته بتكون تحت المجهر، الشجعان زيك بس بيعيشوا بتلقائية واتساق مع النفس.

وتابع: "فنوننا وثقافتنا وهويتنا يقدروا يتقابلوا.. انا بدأت أعمل ده في أعمالي الفنية وفيلمي (اشتباك) افتتح في مهرجان "كان" وفيلمي القادم رايح مهرجان "ڤينيسيا" قريب.. وهنقدر ناخد أنا وانتِ خطوات أكبر وأمثل على الطريق العظيم ده اللي هتعرف قيمته الاجيال الجاية.. وتاني بقولهالك يا حبيبتي..رحلتنا واحدة."

مخرجة فيلم مش أنا تهاجم حلا شيحة

ونشرت سارة وفيق ، مخرج فيلم مش أنا ، ردا مطولا على منشور معز مسعود الذي شاركه مع متابعيه منذ قليل على حسابه بتطبيق انستجرام، توضح فيه بعض الحقائق حول الأزمة.

وكتبت مخرج فيلم مش أنا عبر فيسبوك: " أستاذ معز أنا سارة وفيق مخرجة فيلم مش أنا.. قرأت بوست حضرتك اللي بتوضح فيه انك فاهم قصد حلا عن بعض اللقطات اللي كان المفروض نراعيها، خلينا نتكلم بالحق بعد اذن حضرتك احنا نشيل مشاهد ليه وبأي حق بعد ما صورت وأخدت اجرها كامل ؟".

واستطردت سارة وفيق:" واحنا مالنا انك اتجوزتها ، انت اتجوزتها فنانة و بتصور الفيلم دا و دي حاجه بينك و بينها ، احنا مالنا و كمان بتقول كنت هتاخد اجراء ، إجراء ايه اللي تاخده انت ملكش أي حق تاخد أي إجراء المفروض تشكرنا اننا مخدناش إجراء قانوني ضد مراتك اللي امتنعت عن تسجيل صوتها لدوبلاچ الفيلم.

وتابعت: "وعن تصوير افيش الفيلم اللي مدفوع فيه ملايين انت متعملش حاجة غير انك تشكرنا لأننا شيلنا كل المشاهد اللي هي ماكنتش عايزاها ، وممكن ابعتهالك تشوفها عشان تعرف بس ازاي أنا و المنتج والفنان تامر حسني فتحنا الفيلم وعيدنا المونتاچ تاني على حساب الفنان تامرحسني مادياً عشان يرضي حلا مع انها مشاهد من وجهة نظري طبيعية و كوميدية و رومانسية راقيه لأن دي طبيعة أفلام تامر ومع ذلك شال كل المشاهد دي و احترم وجهة نظرها".

وأوضحت مخرجة فيلم مش أنا:" فيما يخص الكليب بقي هو حضرتك كنت فين من 21 يوم من ساعه ما الفيلم نزل ما هو الكليب في الفيلم ومصر كلها تقريباً شافت الفيلم و محقق اعلى إيرادات كنت فين حضرتك و هي كانت فين ؟؟؟ ما هو الفيلم كله على بعضه هينزل كمان في التلفزيونات بالكليب اللي جواه و بعدين دا كليب رومانسي و المراعاه من وجهة نظرك هي ضرر من وجهة نظر الإنتاج و دي مصاريف كبيره اوي و حلا وافقت تصور برضاها و رغم كل دا كلمناها كتير مردتش علينا ولا علي رسايلنا كان لازم بخبرتك تخليها تتواصل مع شغلها و تقفل الصفحه صح مش تخليها تقاطع شغلها و تورطها كدا دا لو انت السبب في المقاطعه دي والله اعلم".

خروح حلا شيحة من نقابة المهن التمثيلية
بعد التصريحات التى أدلت بها المعتزلة حلا شيحة بسبب أزمتها مع الفنان تامر حسنى ، كشف نقيب الممثلين أشرف زكى عن عدم قبولها فى نقابة الممثلين مرة أخرى.

وقال الفنان أشرف زكي نقيب المهن التمثيلية، انني انزعجت، بعد ما تم اثارته من الفنانة حلا شيحا وتصريحاتها عن المشاهد التي قدمتها بفيلم "مش أنا ".

وأضاف أشرف زكي خلال مداخلة هاتفية لبرنامج "الحكاية" عن أزمة حلا شيحة " أنه لا مكان لتلك الفنانة في النقابة، مشيرا إلى أن هذا درسا لكل من يعلن أن الفن حرام.

وتابع نقيب المهن التمثيلية أنني أعتذر اننى قبلت عودة تلك الفنانة- حلا شيحة ، مؤكدا أنه لا مكان لمن يريد تلك الأفعال في النقابة.

وأشار زكي خلال حديثه عن أزمة حلا شيحة : "اللى شايفين ان الفن حرام "لكم دينكم ولي ديني"، مؤكدا أن "المهنة العظيمة اللى احنا بنشتغلها ميهونش عليا اننا نعمل فيها كدة".

وكشف أشرف زكى ان حلا شيحة ليست عضوة فى نقابة المهن التمثيلة حيث كانت قد تحدثت معه أكثر من مرة فى مسائلة عودتها مرة أخرى الى النقابة بعد شطبها خلال السنوات الماضية بسبب إبتعادها عن الفن لما يقرب من 11 عاماً ، وكان من المقرر ان يتم إتخاذ إجراءات عودتها حيث تعمل بتصريح موقت .
حلا شيحة ترد على قرار شطبها من النقابة

حرصت الفنانة حلا شيحة، أن تقوم بالرد على بيان نقابة المهن التمثيلية والذي تم الإعلان من خلاله عن شطبها من نقابة المهن التمثيلية بعد تصريحاتها الأخيرة.

كتبت حلا شيحة من خلال حسابها الرسمي على "الانستجرام": "حابة أشكر كل الناس الجميلة علي رسايلهم الجميلة المشجعة.. وحابة أشكر كل الصحافة اللي نشرت فتوى دار الإفتاء النهارده اللي موقفي هو نفس موقفها اللي بيوضح إن التمثيل و الفن عموما زي اي مهنة في الدنيا حلاله حلال وحرامه حرام.. وأنا لا أحب أن اكون جزء من اي نوع من التطرف سواء باسم الدين او باسم الفن.. ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي".

وتابعت قائلة:"حبي للفن محدش يقدر ينكره ولا يزايد عليه.. انا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع اصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ وبالنسبة للكلام غير اللائق عن الأجر.. كل اللي في المجال شاهدين اني كنت اعتذر عن عدد كبير من الاعمال الفنية وكنت بقبل اجور اقل مما يتناسب معي تعاونا مع صناع العمل.. واصلا ما استلمتش الجزء الأخير من أجري في الفيلم لما أتأخر نزوله جدا و بدأت اتغير وأصلّح.. لأن بصراحة الكلام عن (أجر كبير) ضحكني.
والد حلا شيحة يثير الجدل حول تصريحات ابنته

قال الفنان التشكيلي أحمد شيحة، والد الفنانة حلا شيحة، على الضجة المثارة بشأن تصريحات ابنته عن الفن، قائلا: "حلا عمرها ما قالت الفن حرام.. أنا مندهش لهذا الكم من الضرب المتواصل دون أن نتريث وندرس الوضع، لأن حلا بنت مصر وهناك أبعاد أخرى تم الضغط بها على حلا".
وأشار "شيحة"، خلال اتصال هاتفي ببرنامج "الحكاية" المذاع عبر فضائية "إم بي سي مصر"، مساء السبت، إلى أن "البوست" نشرته حلا بعد عرض الفيلم ب 21 يوما مما يعني أن هناك ضغط يمارس عليها، مضيفا: "حلا متقدرش تعيش من غير الفن، وعمرها ما غلطت في حد من زملائها".
وأكد أن هناك أياد تعبث من أجل أن يكون هناك كمين لابنته حلا شيحة، واصفا إياها ب "البنت الطيبة"، مطالبا أن يكون هناك تريث من قبل النقابة في فصلها.

وعن احتمالية أن يكون زوج حلا شيحة مارس ضغط عليها، قال، "ممكن.. دي مش حلا، كلنا فوجئنا بكلامها أنا وأمها واخواتها، وأصيبنا بصدمة، أنا حاسس أن حلا معمول لها كمين ومخطوفة"، لافتا إلى أنه لم يتواصل مع ابنته بعد البوست الأخير الذي نشرته، وكان آخر اتصال بينهم بنحو أسبوع.
وأضاف، "والدتها كلمتها منذ أيام وعاتبتها بشدة، وحلا كانت مترددة في ردها على والدتها.. أنا كفنان أرفض الكلام اللي قالته حلا"، مستبعدا أن يكون ما نشرته حلا بارادتها، معلقا باكيا: "أنا حزين، ولازم نتريث في أحكامنا اللي بيحصل فوق الخيال.. لازم نتريث لأننا بنحافظ على الفن وحلا أحد أعمدته، مينفعش تتشم بالطريقة دي".
وتابع، "حلا مقالتش الفن حرام هى قالت انها تابت عن نوعية من المشاهد"..

حلا شيحة تهاجم والدها
علقت الفنانة حلا شيحة على الهجوم الذي تعرضت له خلال الساعات الماضيه بسبب اعتراضه على ظهورها في كليب تامر حسني الجديد .

وكتبت حلا شيحة عبر حسابها على إنستجرام قائلة: "الحقيقة مصدومة من الكلام اللي والدي قاله عن زوجي اللي اتجوزته بكامل ارادتي و الحمد لله لقيت معاه كل المعاني الجميلة من احترام و رجولة و شهامة نادرة الأيام دي وانا لم يخطفني احد كما قال والدي والكلام ده لا يصح ابداً انا بحب زوجي و سعيدة بحبه ليا و بنحترم بعض و معز بيحترم رايي و بيقدر مشاعري و بالعكس هو دائما بيهدّيني" .

وأضافت " و طبعا بيساندني ويشجعني لأني زوجته و حبيبته و هو أكبر بكتير من كل الكلام اللي بيتقال عليه و افتراءات مش صحيحة، و هو أبعد ما يكون عنها، ولن أسمح لأحد بالكلام عنه ولن أسمح بأي تصور خاطئ عنه بأي شكل من الأشكال معز طول عمره له رؤيته الواضحة في الدين و حتي في الفن و هو ليس مع أي جماعة أو فئة معينة، هو يمثل نفسه و له أفكاره وآرائه العلمية والدينية المختلفة الجميلة، وليس لأحد أن يصنفه أو يضعه في أي قالب فقط لأن هواه لا يوافق ما يمثله معز، هو في إيه في بلدنا الايام دي بنحارب و نصارع في بعض وعايشين في قصص وهمية من نسج خيالنا عن بعض ".

وقالت حلا شيحة "هو خلاص أي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد.انا زعلانة من والدي جداً لانه يعرف معز كويس جدا و قعدوا مع بعض كتير ووالدي يحبه جدا و شاف منه كل خير .معز زيي اتجوز 14 سنة من عمره و كان مستقر في حياته و عنده ثلاث اولاد ربنا يخليهمله جمال ماشاء الله و عمره ما كان بتاع ستات زي ما بيتقال كلام لايليق ابدا و في الاخر زيي لم يكمل جوازه و حدث الطلاق و كلنا معرضين لده طبيعي انه كان بيحاول زي اي راجل محترم انه يلاقي استقرار في حياته في الحلال و متوفقش اكتر من مرة و دي مش حاجة تعيب أي حد ، والحمد لله اتقابلنا و تلاقينا لان ظروفنا قريبة جدا و عندي اولاد مثله و اولادنا شبه بعض الحمد لله و استقرينا احنا الاتنين ليه ده يزعل الناس بدل ما ندعي لبعض بالخير بقينا نتصيد لبعض و نخوض في اعراض بعض هو حصل في مجتمعنا ده احنا جرالنا ايه ".
وتابعت "في الاخر بوجه كلمة لوالدي الحبيب ان لا يصح ابدا كلامك مع كامل احترامي لك و للجميع .
واختتمت «أنا الحمد لله سعيدة في حياتي و مع زوج اتشرف انه زوجي و بعتز بيه و احنا اصدقاء قبل ان نكون أزواج و كل كلمة اكتبها و قلتها نابعة مني و انا متدينة بطبعي زي اي ست مصرية بتحب دينها وده لا يعيبني. وتديني اللي بدأ من اكتر من 15 سنة من المنطقي أن معز مش هو سببه، مش محتاجة حد يخطفني او يكتب عني أو يوجهني .. هذا كلام لا يليق . دعوا الخلق للخالق و كل واحد يخليه في حاله وياريت نسمع من بعض بدل ما نسمع عن احسنوا الظن".