أسما شريف منير تعلن انتهاء برنامج "أنا وبنتى"

أعلنت الإعلامية، وخبيرة التجميل أسما شريف منير عبر حسابها الخاص على Instagram، انتهاء الموسم الثاني من برنامج "أنا وبنتي" الذي شاركت والدها الفنان شريف منير في تقديمه.
وشاركت أسما شريف منير مجموعة صور من كواليس البرنامج وعلقت عليها قائلة: "أول تجربة ليا خلصت و كانت أحلى تجربة في حياتي، كان ليا الشرف أني أشتغل مع أبويا نجم كبير و خبرة عظيمة اتعلمت منه كتير، وكان ليا الشرف برضه إني أحاور نجوم كبار و شباب و أكتسب من خبرتهم بشكرهم كلهم نورونا و أسعدونا.
تابعت: "أحب أشكر شركة سينيرچي والأستاذ تامر مرسي اللي اديتني الفرصة كشابة آني اكتسب كل الخبرات دي و على ثقتهم فيا رغم أنه كان أول عمل ليا, و أحب خصوصًا أشكر الأستاذ عمرو كمال لانه اكتر واحد كان مديني الثقة ووقف جنبي و أداني ثقه في نفسي كنت حقيقي محتاجاها".
استطردت أسما: "أغلب الناس بتقول أنا أحب أشكر فريق العمل و خلاص بس بجد دول كأنهم أهلي و عزوتي و قلبهم كان عليا في كل خطوة بعملها ، إياد صالح مثلًا من اكتر الأشخاص اللي أنا سعيدة أني عرفتها و اتعلمت منها مش ممكن الثقافة و خفة الدم و المجهود اللي بذله كان ماسك تقريبًا كل البرامج و عمري ما حسيت أنه مش فاضي أو مش معانا".
أردفت ابنة شريف منير: "اشتغل معانا فريقي عمل بذلا مجهودا غير عادي عشان نطلع باحسن صورة، كنا حابين إننا نتكلم عن أغلب المواضيع الحياتية من وجهت نظر جيلين عشان نوصل أكبر كم من الطاقة الإيجابية و نتعلم من بعض بشكل صحي حتى لو هنتنأر، مواضيع ال 38 حلقة اللي قدمناهم كانت عن الصداقة، الشارع، الحب، الإنسانية، التعليم، التربية، الجدعنة و حاجات كتير تانية".
اختتمت أسما شريف منير: "أتمني أننا نكون عند حسن ظنكم بشكر كل الجمهور اللي تابع الحلقات، كنتم دعم كبير و انتوا كمان ملاحظاتكم كانت مهمه جدًا بالنسبالي و علمتني كتير، ادعولي بقي إن تجربتي الجاية تكون حلوه إن شاء الله، بحبكم".