الآن.. وليس غداً

أجواء الثورة عادت من جديد إلى «التحرير».. «مرسى» أصبح مطلوباً.. هتافات الثوار لا تتجاوز كلمة «ارحل».. أصداء فى العالم حول ثورة جديدة.. البيت الأبيض يتابع الموقف بقلق.. قصر الاتحادية يدرس أيضاً.. مجلس الأمن القومى ينعقد.. الثوار يحتلون الصينية.. القضاة يتحركون.. المخابرات تكتب تقريرها.. إليكم التفاصيل:
(1)
الرئيس: مين جاب الناس دى كلها التحرير؟.. المرشد: أكيد فيه حد بيحشد.. الشاطر: مخابراتنا هتكشف كل حاجة.. الرئيس: ما حدش بيعرف حكاية الحشود دى غيرنا.. الوزير مكى: دول مغرر بيهم من الإعلام.. المرشد: قلت لكم همه سحرة فرعون السبب.. الشاطر: إحنا كمان عندنا إعلام ومليشيات.. مكى: مش قلتم فيه تمويل.. الرئيس: هاتوا لى وزير الداخلية ع التليفون.. جمال الدين: يا فندم نزول الجماهير رد فعل على القرارات.. الرئيس: مجلس القضاة رفض الإعلان.. مكى: الزند سخنهم.. الشاطر: زند إيه؟.. المرشد: هنتصرف.. الرئيس: منين أجيب ناس؟!
(2)
البرادعى: كنت حاطط إيدى على قلبى.. عمرو موسى: صراحة المشهد كان يفرح.. صباحى: البركة فى التيار الشعبى.. إسحاق: شوفتوا، هنبدأ نتقسم تانى.. صباحى: باضحك يا راجل.. أحلى حاجة كنا إيد واحدة.. البرادعى: أهم شىء رجعنا زى يوم 25 يناير بلا منصات.. عمرو موسى: المهم دلوقتى نقابل الرئيس مرسى ولا لأ؟.. صباحى: العبرة ليست بالمقابلة، العبرة باستجابته.. البرادعى: لا رجوع عن إلغاء الإعلان الدستورى.. إسحاق: ممكن يرجع عن كل شىء إلا النائب العام.. صباحى: النائب العام بيفكره بالسجن.. عمرو موسى: السياسة كر وفر!
(3)
الزند: عزل النائب العام جريمة كبرى.. تهانى الجبالى: الرئيس الآن لازم يعزل، لأنه غير شرعى.. عبدالمجيد: العبرة بوقفة القضاة.. ممتاز: المجلس الأعلى رفض إعلان مرسى.. الزند: هتلر عمل كده زمان، وبقى إله.. عبدالمجيد: المهم أندية القضاة عاملة إيه؟.. الزند: الأندية تحركت فور سمع القرارات.. خاصة الإسكندرية.. ممتاز: وزير العدل كلمك يا زند باشا؟.. عبدالمجيد: يكلمه بتاع إيه؟.. الزند: لا كلمنى ولا عاوز أكلمه.. ممتاز: معقول «مكى» يعمل كده فى القضاة؟.. الجبالى: هتجنن مين بيشير على الرئيس؟.. الزند: عائلة مكى.. ممتاز: يا خسارة!
(4)
السيسى: الموقف شكله ممكن ينهار.. رئيس الأركان: طيب والحل؟.. هننزل تانى؟.. مدير المخابرات: التقارير عندى مخيفة.. الثلاثاء يوم رهيب.. السيسى: هنرجع تانى نحمى الثورة، ولا نؤمنها، ولا نركبها؟.. مدير المخابرات: تفتكر هتبقى ثورة وإطاحة وتنحى؟.. رئيس الأركان: أفتكر لازم نحافظ على سمعتنا المرة دى.. السيسى: إحنا اتبهدلنا قبل كده.. مدير المخابرات: أنا أقسمت على الولاء للرئيس.. السيسى: يعنى إيه؟.. رئيس الأركان: الولاء أنك تبلغه بالموقف فقط.. مدير المخابرات: رأيى أنه يتراجع أحسن.. السيسى: المرة دى لها سيناريو تااااانى خااالص!
(5)
كلينتون: فيه إيه باترسون؟.. السفيرة: المظاهرات تهتف «ارحل.. ارحل».. أوباما: موقفنا لازم يبقى حاسم.. السفيرة: إما الشارع وإما الرئيس؟.. كلينتون: «حكم المرشد» بينهار؟.. أوباما: شوفوا مصلحة الأمة الأمريكية فين؟.. كلينتون: مرسى ما عندوش خبرة الحكم.. السفيرة: القرارات عنيفة جداً.. أوباما: عاوز الخطاب الأمريكى يبقى ذكى.. كلينتون: إحنا قلنا نشعر بقلق.. السفيرة: لازم نقدم له نصيحة، عشان الاستقرار.. أوباما: هكلمه فوراً.. كلينتون: الشارع غاضب والقضاة ثائرون.. أوباما: مقدرش أقوله دلوقتى «ارحل».. لسه بدرى نقوله «الآن.. وليس غداً»!
نقلا عن المصرى اليوم