هانى الناظر: "الشامبو الجاف" لإزالة أتربة ودهون الشعر بدون غسله بالماء

فاجأ الدكتور "هانى الناظر" أستاذ أمراض الجلدية ورئيس المركز القومي للبحوث السابق، متابعيه بنشر معلومات عن "الشامبو الجاف" للتخلص من الأتربة والدهون الموجودة بشعر الرأس دون الحاجه إلى غسل الشعر بالماء ولكن بتمشيطه فقط.
وكتب "الناظر" فى تدوينه له عبر صفحته الشخصية بموقع التواصل الإجتماعى "فيس بوك" : "النهاردة عاوز اقول لحضراتكم معلومة جديدة وتهمكم اكيد .. لكن يمكن في بعض من حضراتكم عارفينها وكمان الأطباء عارفينها .. احنا كلنا بنحرص علي مظهر ونظافة شعرنا والتخلص من الأتربة والدهون اللي بتكون عليه لكن مع البرد الشديد الناس بتخاف من كثرة الغسيل بالمياه خصوصا اذا كان الواحد بيخرج في الهواء او الصبح بدري او الاطفال الصغار او الناس المريضة وبتعاني من ادوار برد وأنفلونزا ومش بيقدروا يغسلوا شعرهم او الناس الي بتعاني من سقوط الشعر !! طيب ايه الجديد وايه الحل ؟".
وتابع : "الجديد انه ظهر حديثاً من فترة نوع من الشامبو بنقول عليه " الشامبو الجاف " وبيكون علي هيئة سبراي وانا بكتبه للمرضي عندي في العيادة واصبح متوافر الان في مصر وفي الصيدليات الكبيرة".
واضاف : "وطريقة استعماله بتكون بان احنا بنحطه علي الشعر من غير غسيل بالمياه وعلي الجاف وبعد كده نتركه حوالي عشر دقائق وبعدين نسرح الشعر بالمشط ونمسحه مسح خفيف علشان نتخلص من الشامبو بعد ما يكون خد معاه ذرات الأتربة والمواد العضوية الملتصقة بالشعر".
واختتم "الناظر" تدوينته قائلا : "وبكدة نكون نظفنا الشعر وحافظنا عليه بدون الماء وطبعا ممكن نستعمل كريمات مرطبة للشعر بعد كدة علشان نمنع جفافه .. وتمنياتي لحضراتكم بشتاء جميل بعيدا عن القلق من البرد وتكرار غسيل الشعر ومشاكله".