أستاذ أمراض جلدية يضع حلولا لمشكلة "القشف"

قدم الدكتور هانى الناظر، رئيس المركز القومي للبحوث السابق وأستاذ أمراض الجلدية، مجموعة من النصائح لكل من يعانى من مشكلة جفاف وتشقق الجلد مع دخول فصل الشتاء وانخفاض درجات الحرارة.
وكتب "الناظر" فى تدوينه له عبر صفحته الشخصية بموقع التواصل الاجتماعى "تويتر" قائلا: "مع انخفاض درجات الحرارة ودخول فصل الشتاء ناس كثير بيعانوا من مشكلة جفاف ملحوظ وتشقق الجلد مع احساس بحرقان وألم في منطقة ظهر اليدين وحول الفم".
وأضاف: "والحقيقة سبب هذه الظاهرة هو عدم تجفيف الجلد جيدا بعد الغسيل بالماء مع انخفاض حرارة الجو ودي حاجة بتحصل كثير خاصة عند الاطفال بالذات لأنهم بعد الاكل بيغسلوا أيديهم ويكسلوا ينشفوها كويس وتكون النتيجة هذه الظاهرة واللي بنسميها كلنا" القشف " والأم تقولك ابني إيديه مقشفة ومتعورة وبتخر دم".
وتابع : "طيب الحل ايه ؟ اولا لازم طبعا ننشف كويس جداً بعد كل غسيل حول الفم والايدين، ثانيا في الايام البرد الشديدة الأولاد والبنات الصغار لازم يلبسوا جوانتي وهم رايحين المدرسة، ثالثا الحرص علي ترطيب الجلد بأى مرطب قبل النوم اما اذا حدثت الإصابة فممكن نستخدم حاجات بسيطة للعلاج وأحسنها دهان الجلد بالجلسرين صباحا ومساء .. حقيقي بيسبب حرقان اول يومين ولكن بعد كده بيختفي الحرقان وكل الأمور بتكون تمام والجلد بيرجع طبيعي والتشققات بتختفي".