بالفيديو..الرئيس يطلق مشروع شرق بورسعيد.. ويزرع الأمل فى نفوس المصريين.. ويتطرق لظاهرة الإرهاب.. ويقف حدادا على الضحايا

- السيسي يقف دقيقة حدادا على أرواح ضحايا الإرهاب بالعالم
- الرئيس: المصريون بيتحدوا التحدي عشان تبقى بلدنا أفضل
- الرئيس منفعلا: أتحدى أى حد يعمل المشروعات دي فى أقل من 10 سنين.. وإحنا مبنكدبش
- السيسي: «الدولة مبتعملش شعب.. الشعب هو اللى بيعمل دولة ويحافظ عليها»
- السيسي: افتتاح 1500 وحدة سكنية بالفرافرة خلال 15 يوما
- السيسي: دول العالم تدفع ثمن معالجتها الخاطئة لظاهرة الإرهاب
- مواطن يقاطع كلمة "السيسي" خلال حفل إطلاق مشروع تنمية "شرق بورسعيد"
طالب الرئيس عبد الفتاح السيسي فى بداية كلمته اليوم، خلال الاحتفال باطلاق مشروع شرق بورسعيد، الحضور بالوقوف دقيقة حدادا على كل ضحايا العالم.
واستهل الرئيس السيسي كلمته، موضحا أن مشروع تنمية محور قناة السويس وشرق بورسعيد تم طرحه منذ 2002 ولكن الخطوات كانت بطيئة جدا طوال 13 سنة، وما تم تنفيذه خلال ما يقرب من عامين إنجاز كبير جدا، ولم يتم الإعلان عنه إلا بعد وجوده على الأرض.
وأوضح الرئيس فى كلمته، أن منطقة شرق شرق التفريعة سيكون موجود به المزارع السكنية ومدينة ساحلية فى شرق بورسعيد ولم يتم الإعلان عنه، وسيتم التنفيذ خلال سنتين قائلا: «أنا اتحدى أى حد يقدر يعمل اللى احنا بنعمله ده فى أقل من 10 سنين، وأنا عارف أنا بقول إيه كويس، إحنا أيدينا وعقلنا فى المشروعات دي وعارفين بنقول إيه».
وأضاف: «إحنا كنا ممكن نقول للمصريين الشباب، حددلهم 3 أو 4 مليار جنيه واعملوا مشروعات تكفي لمليون شاب، لكن احنا كده نبقى غسلنا إيدينا من ولادنا واخدنا المشوار الصعب، احنا مبنضحكش على حد ومبنكدبش وصادقين وعاوزين نقول للناس ان احنا بنعمل لبكرة، الدول مش كده، بناء البلاد جهد وعرق وإخلاص وأمانة وشرف مش حاجه تانية».
وأكد الرئيس أن ما تنجزه مصر من مشروعات تنموية يمثل تحدي للإرهاب قائلا: «اللى بنعمله ده تحدي للإرهاب اللى عاوز يهز ويعرقل مصر، لا هما بيعرفوا يبنوا ولا عاوزين حد تاني يبني، خلوا بالكم من الكلام، وبقول تاني هما مبيعرفوش يبنوا يعرفوا يهدوا بس، ومش عاوزين حد تاني يبني وده تحدي».
وتابع السيسي قائلا: «الدولة مبتعملش شعب، الشعب هو اللى بيعمل الدولة وبيحافظ عليها».
وقال الرئيس فى كلمته: «فيه فساد بيعرقل مسيرتنا وبنحاربه وبنبني وهنبني وده تحدي تاني، وفى تحدي تالت خلوا بالكوا منه تحدي اقتصادي، وبيتقالنا هو انتوا بردوا ناويين تنجحوا وتبقوا دولة، الكلام ده للناس اللى مش واخدة بالها لازم تعرفوا إيه اللى بيتخطط ليكم، واللى معمولكم وتنتبهوا كويس لبلدكم وتخلوا بالكم منها، إحنا كلنا اتفقنا إننا ناخد بالنا كلنا من مصر مش أنا بس، احنا كلنا، وبقول الكلام ده تانى وأنا قلتها لكم من الأول، أنا لا أستطيع لوحدي ومحدش يقدر لوحده يعمل كده».
واستطرد الرئيس قائلا : "المشروعات التى تم الإعلان عنها هى جزء صغير من عمل كبير يتم فى كل مصر، لأننا حريصون على أن التنمية لا تكون موجودة فى منطقة بعينها".
وأوضح الرئيس، أنه خلال عشر أو خمسة عشر يوما سنكون فى الفرافرة لعرض مشروع المليون ونصف فدان، بأراضي تم حفرها وتجهيزها وأبار تم حفرها وتجهيزها بوسائل الري وتم بناء 1500 وحدة سكنية للفرافرة التى سيتم افتتاحها خلال الزيارة.
وأشار الرئيس إلى أنه يقول هذا الكلام من أجل الأمل، قائلا:« أزرعوا الأمل فى نفوس الناس واحنا حريصون على زرع الأمل بكل ما أوتينا من قوة وإرادة ومصرون على بناء بلدنا».
وخلال الكلمة تطرق الرئيس إلى ظاهرة الإرهاب، مؤكدا أن دول العالم أدركت اليوم خطر الإرهاب، وتدفع ثمن معالجتها الخاطئة لتلك الظاهرة التى حذرنا منها على مدار السنوات الماضية.
وقال السيسي: "إنتم شايفين اللى اتكلمنا فيه من سنتين تلاتة العالم كله النهارده بقى عامل إزاى، فمكافحة الإرهاب لا تكون بالمواجهة العسكرية فقط بل تكون مواجهة ثقافية واجتماعية واقتصادية ودينية أيضا، وأمنية"، لافتا إلى أنه إذا لم نتخذ تلك الخطوات سيظل العالم يعاني لسنوات طويلة قادمة من خطر الإرهاب.
وأضاف: «احنا بنتكلم النهارده وبنحاول تاني وتالت فى مصر، بس بيكم يا مصريين محدش أبدا هيقدر يمنعنا نبني ونطور بلدنا، والعالم كله فهم وابتدا النهارده يواجه المشكلة».
وخلال الكلمة قاطع أحد المواطنين الحاضرين لحفل إطلاق مشروع تنمية ميناء شرق بورسعيد، كلمة الرئيس عبد الفتاح السيسي قائلا: «إحنا بيك وبالله أولا وبقواتنا المسلحة اللى هى تاج على رؤسنا، بنتحدى بيك العالم».
وبعد الانتهاء من كلامه رد عليه الرئيس ضاحكا: «إحنا بس عاوزين نتحدى، نتحدى نفسنا ونبني بلدنا ونخلص وبعد كده نتحدى العالم».