المدون احمد شوشا يكتب عن : تورط الحزب الواطى والسلفيين في أحداث قنا

أول ما قالوا تعيين محافظ قنا وقالوه اسمه اللواء عماد شحاتة ميخائيل وانتقد تعيين لواءات الداخلية محافظين أو حتى لواءات الجيش علشان متبقاش المحافظات إرثا للداخلية وكتبت على تويتر أن تعيين اللواء عماد شحاتة ميخائيل محافظ لقنا مفيهوش ذكاء سياسي ولا حس أمنى لان هيثير البلبلة في قنا ذات العصبية والنزعة الدينية لان تعيين اتنيين مسيحيين لمنصب المحافظة دورتين متتاليتين هيعمل شوشرة وفتنه وحتى الناس لو تقبلت الموضوع وما اتكلمتش وده اللي عمله اغلب أهل قنا في ناس اللي بتبحث عن المشاكل والفتنه سوف تغذى الفتنه وتثيرها فتجنبا للموضوع ده اقتراحنا قبل حلف اليمين أنا وكتير على شبكه الانترنت إقصاء محافظ قنا اللواء عماد ميخائيل وتعيينه في أي محافظه تاني ويكون محافظ قنا مسلم حتى لا ندع مجال لأصحاب الهوى أنهم يلعبوا في دائرة الفتنه الطائفية ...وحصل ما توقعنا وهاقولكم الحكاية كيف بدأت نقلا عن عده شهود عيان من محافظه قنا ...
اليوم الجمعة 15 ابريل من مسجد ناصر وهو مسجد عرف قديما بمسجد الجماعات السلفية وهو مقابل لأحد اكبر الكنائس في قنا والاثنين في وسط البلد ملحوظة قنا تمتاز بعدد سكان قليل اللي بيسكنه المحافظة نفسها وبعد صلاه الجمعة تعالت الأصوات اللي تحس الناس على التظاهر أمام مبنى المحافظة لاستبدال المحافظ الجديد القبطي بمحافظ مسلم وأيضا حتى يجذبوا الشباب قالوا انه كان لواء في الداخلية وأشاعوا نبا انه قتل متظاهرين وكان محافظ وكان مدير امن وغيرها من الإشاعات التي توالت في الظهور وبسرعة رهيبة لان اللي كان وراها كان منظم جدا وهعرفكم بيه بعد شويه تحركت مظاهره عددها حوالي 90 إلى 100 تقريبا وهما متجهين إلى المحافظة انضم ليهم بعد المتفرجين من الشباب الصغير وذهبوا أدام المحافظة علشان منتوهش من بعض هعرفكم بشخصيه وراء الموضوع ده( تم حذف الاسم ) وده كان نائب مجلس الشعب ....... قنا عن الحزب الوطني وشارك بناء على شاهد عيان في موقعه الجمل وأرسل عربيه كاملة بالرجال والعصي وغيرها من الأدوات التي استخدمت في موقعه الجمل الراجل ده بعد سقوط الحزب الواطى خلع ثوب الوطني وارتدى ثوب السلفيين وأطلق لحيته وبدا يقود معركة أخرى لكي يضمن فوزه بانتخابات البرلمانية القادمة وبعض الاتهامات في تدبير المظاهرات المطالبة بإقالة المحافظ يتورط هو فيها بمساعده وحث السلفيين على التظاهر وحشد الناس ....اليوم السبت 16 ابريل عربيات ربع نقل تلف قنا كلها المحافظة تخطب في الناس وتقولهم هي قنا مفهاش رجاله علشان يجيبولنا واحد مسيحي .الحريم معتصمه معانا وبايته وانتم يا رجاله لسه خايفين يلا الإسلام هيضيع بسببكم وغيرها من الهتافات التي يدس فيها السم في العسل ..تطور الموضوع وتصعد خصوصا مع إهمال من القيادة في القاهرة وعدم اهتمام لقلة عدد المتظاهرين وذهب مجموعه منهم وهم سكان قرية معنا اللي يسكن فيها احد الاخوان وده مش شك فيه لكن تنويه بس وقاموا بقطع الطريق وعملوا ده بسهوله لان قرية معنا ده واقعه على طريق قنا القاهرة وبالليل مجموعه تانى ميكملوش 50 واقفة أدام السكة الحديد القريبة من مسجد عبد الرحيم القناوي بينما تفرغت مجموعه تالته لكتابه العبارات الساخنة على يافتات وتعليقها أمام مبنى المحافظة بيكتب فيها آيات قرانيه وغيرها واعتصم عدد مش قليل ليله السبت حتى جاء صباح اليوم الأحد في الوقت ده كله الجيش كان يحمى مبنى المحافظة ويساعد على استقرار الوضع لكن ترك الأمن والشرطة والجيش العربيات تلف في الشوارع وتهيج في الناس اكتر لحد لما الموضوع وصل منذ قليل إلى إن السلفيين قالوا أنهم هيبايعو أمام مسجد ليكون أمير قنا ................يبقى هنقول مين المتورط في الموضوع ده اللي ميعرفش الصعيد العصبيات عندينا للعائلات فقط أما التيارات الدينية زى السلفيين والجمعية الشرعية والإخوان فعددهم في الصعيد قليل جدا وان كانوا في أسيوط عددهم كبير إلا أن في سوهاج وقنا وأسوان العدد ضعيف طيب أمال إيه اللي خلى الناس ده طلعت بالشكل ده ومشوا وراء الإشاعات ممكن الصعيدي ميكنش وراء تنظيم معين لكن في أشخاص معينين ياثرو فيه وفيه مواضيع معينه قد تلهب فيه الحماسة ليثور زى الشرف والدم والدين يعنى في ناس من بعض السلفيين المتطرفين خطبوا في الناس وسخنوهم لكي يستعملوهم في غرض ما وهو أقاله المحافظ طيب ومين ساعدهم أعضاء الحزب الواطى المنحل طيب والإخوان ليهم دور واضح من الموضوع إن الاخوان بعيدين عن الموضوع ولم يثبت تورطهم إلى أشارت إحدى الصحف انسحاب الاخوان من الموقف بعد أن اشتد تأزم وقالوا أنهم تدخلوا علشان هو من الداخلية طيب ما كانوا تدخلوا في أسيوط أولى لان محافظ أسيوط من امن الدولة فده يرضوه يفيد تدخل الاخوان بصوره ما في الموقف ويجب التحقيق مع جميع الأطراف السلفيين والإخوان وأعضاء الحزب الواطى اللي اشرنا إلى واحد منهم ...وحل الموضوع ده كله يكمن في توعيه الناس باللي بيعملوه من احد المشايخ المعتدلين والقبض على المتطرفين ومحدش يقول إن دول صعايده ودماغهم ناشفة لان مش كل قنا عايزين تغيره واغلب الناس اللي حوالين المظاهرة متفرجين فقط ولا يهمهم مطالب المتظاهرين والدليل إن في الليل العدد بيقل جدا وفى الاعتصام بيقترب من 50 إلى 80 واحد بس اغلبهم زى ما قلنا سلفيين وبعض من اللي تبعوهم في تدعيم موقفهم لإقالة المحافظ .........................................
نقلا عن مدونة شوشيات
اقرأ التدوينة على اللينك التالي
http://ahmedshosha.blogspot.com/2011/04/blog-post_17.html