أعلن الرئيس عبد الفتاح السيسي، انتهاء زراعة 1.5 مليون فدان ضمن مشروع الدلتا الجديد خلال عامين فقط. وقال الرئيس السيسي خلال مؤتمر صحفي، بشأن نجاح جهود تعويم السفينة الجانحة، :"مشروع الدلتا الجديدة أنا شوفت الإعلام يتناولها إزاي؟ بنتكلم عن مليون ونصف فدان خلال سنتين هنكون زارعينهم علي طريق الضبعة سواء شماله أو جنوبه.. ميه كانت بتترمي في المكس هنخدها ونعمل معالجة لتصبح صالحة للاستخدام في الزراعة.. الدلتا الجديدة مستقبل مصر، بالإضافة إلي فرصة المياه الجوفية". وأضاف الرئيس: "الميه بتاعتهم منين؟ بتكلم علي منطقة الضبعة، منطقة سكانها قليلين خدنا ميتنا ومخدناش ميه من حد.. بنعملها معالجة ثلاثية متطورة تخليها صالحة للمعايير العالمية لاستخدامها في الزراعة، وكان فيه ميه بتترمي في بحيرة التمساح بتطلع مليون متر يوميا، عملنا محطة بحر البقر هيزرعوا 500 الف فدان". وقال الرئيس السيسي: "تبطين الترع هتوفر 2 مليار متر مكعب، ومحطة بحر البقر هتوفر 2 مليار متر في السنة، والمكس هتوفر 2 مليار متر مكعب.. بنعيد صياغة استخدام الميه لمجابهة النمو السكاني". ودعا الرئيس السيسي إلي ضرورة نقل الصورة كاملة للمواطنين قائلا: "علشان تعززوا بلدكم علشان تقولوا للناس ان البلد بتتحرك لقدام تخطيط وتنفيذ.. أرجو إن ننقل الكلام ده للناس علشان الأمل والثقة بالنفس إن المصريين قادرين علي تغيير حقيقي لبلادهم".