مهنة قص الشعر أو الحلاقة للرجال مهنة ليست بالسهولة المتوقعة بل مهنة تحتاج لفن وموهبة وخبرة، كل هذه المواصفات تتوافر في عبير مصطفي الشهيرة بعبير اكسلانس والتي اختارت أن يكون زبونها رجلاً وتتحدي الجميع في فن قص الشعر وحلاقة الذقن وتحديد (السكسوكة) والباديكير للرجال. وحكت عبير اكسلانس رحلتها مع المقص وفرشاة الشعر وموسي الحلاقة في السطور التالية: • في البداية يا اسطي عبير مش شايفة إن المهنة دي (رجالي) ؟ - مفيش حاجة اسمها رجالي وحريمي، الحلاقة موهبة لا مكتوبة علي ست ولا احتكار لراجل واتحدي أي راجل حلاق في فن الحلاقة. ودخولك المهنة دي بتحبيها ولا مضطرة؟ - أكل العيش، طبعا انا ست من يومي بحب الشغل واشتغلت كوافير رجالي علشان المادة وأعرف أعيش الحياة خاصة وأنها بقت صعبة والمصاريف كترت أوي. شايفة ان الحلاقة فن وموهبة ولا تعليم ؟ - الحلاقة خبرة سنين وموهبة وتطوير لنفسي علشان أعرف أواكب قصّات شعر الشباب الجديدة والعربية كمان. وبمناسبة التعليم انتي معاكي شهادات ؟ - معايا دبلوم تجارة ومين علمك قص الشعر ؟ - محدش علمني وحكايتي بدأت مع الحلاقة أو تحديدا الشغل في كوافير رجالي من عشرين سنة كنت بعمل باديكير للرجالة ومن ست سنين بس بدأت اشتغل كوافير رجالي. قدرتي بتعبك تفتحي كوافير رجالي ليه مش حريمي ؟ - ما بعرفش اشتغل كوافير حريمي لا قصّات ولا ألوان ولا الحاجات دي، أنا تخصص قص شعر وحلاقة دقن الرجالة وبس. كام مرة ( شعر زبون ) باظ علي إيدك ؟ - والله ولا مرة، أنا فنانة في قص الشعر بشهادة الجميع. عندك أولاد؟ - جوزي مهندس إلكترونيات وأولادي ولد 18 سنة وبنتي 12 سنة واسمها عبير علي اسمي. وأولادك بيتكسفوا إن والدتهم كوافير رجالي ؟ - والله ولادي فخورين إن أمهم حلاقة رجالي وهما طلعوا شافوني كده، أنا لا شغلتي عيب ولا حرام. ومعاكسات الزبائن الرجالة اللي بتحلقي ليهم بتقابليها إزاي ؟ - محدش يقدر يعاكسني أصلا، الكل عارف إن الأسطي عبير ست جدعة بتاعة شغل وبألف راجل. وأسعارك عالية في الحلاقة ؟ - كل حاجة وليها سعرها يعني كتير بظبط عريس ليلة دخلته وكتير ناس بتطلب تنضيف بشرة وباديكير وصبغة كل حاجة بسعرها لكن في الآخر الرزق ده علي الله. والنَّاس اللي بتنتقد شغلتك بتقابلي ده إزاي؟ - اللي ينتقدني يا ريت يعرف يعمل زي مانا عملت، الشغل حاجة شريفة ومش عيب وإيه حلمك ؟ - افتح كذا فرع للمحل بتاعي. وليه كل الصنايعية اللي عندك رجالة ؟ - علشان في رجالة بيدخلوا المحل وبيرفضوا أقص شعرهم وعاوزين راجل. وهل جوزك مش بيتضايق من شغلك ؟ - جوزي هو سندي وهو اللي يشجعني وواثق فيا ثقة كبيرة وده سر نجاحي. بتقصي الشعر في المحل ولا ممكن تروحي زيارة للمنزل ؟ - اللي عاوز يحلق بيجي المحل عندي مش بروح لحد.