صوت الشهيد

في الميدان جدعان يا أمي..
في الميدان رجاله من بطنك عفية
شفتهم يوم الغضب
شالوا أرواحهم هدية
وقفوا هتفوا بكل قوة
دي مظاهرة للشباب
لجل مصر اللي خدوها
عنوة منا.. وقطعوها..
وسمسروها وقزموها
بهدلوها وبهدلونا..
جينا.. لا في إيدينا شومة
ولا نملكش إلا صوتنا
بيه ننادي في كل وادي
دي مظاهرة سلمية.. سلمية.. سلمية
بس فجأة واحنا في قلب الميدان
واحنا نرسم حلمنا لبكره اللي جاي
كل واحد مننا قال نفسه.. مصر تبقي حُرة
من الحرامي والقراري الاحتكاري والجبان
اللي مص دمنا وباعه رخيص
واللي أجر أرضنا وباعها فطيس
واللي خلا شبابنا في العبارة غرقوا
واللي سابهم في القطار وفي المسارح
بالفساد يا ضنايا حرقُه
بالفساد يا ضنايا حَرقُه
كنا قاعدين نفتكر عملوا إيه ف جيلنا
وفي عوايلنا الضعيفة المقهورين
كنا نرسم شمس حرية لبكره
كنا نكتب أحلي أغنية لمصر عزيزة حره
نمنا عا الحلم الجميل
حلم وطن مالوش مثيل
يرجع لنا بعد اختطاف
ويروق لنا دلتا ونيل
بس فجأة اتحول الحلم لكابوس شفناه مهول
هجموا زي تتار علينا
تقولش بربر من عصور البربرية
جمال وعير وخيول سايقها البلطجية
قمنا بسواعد قوية
صدينا هجمة نازي راضع دم هتلر
لكن بعد شوية من صدتنا ليهم
لقينا قناصة بسلاح واحنا عُزّل
تصطادنا من فوق العماير
قدامي شفت راس أسامة طاير
قدامي شفت دم سالي ومحمد ومينا
أحمد يا محمود يابو قلم وكاميرا
يا صحفي ياللي كتبت عا العيشة اللي مُره
أحمد يا بسيوني يابو سلمي وآدم
ياللي حلمت بيوم حرية وسلام
ولقمة طاهرة وبكرامة وبأمان
وزرع ماهواش مسرطن
ياللي حلمت ان الفساد ينزاح في وزارة الثقافة
اللي سيطر عليها بهلوانات وشوية حواه
وقلت لجماعة الفنانين الهواة
إذا الثورة مافلحتش واعتقلوني ان اها اخرج
واهاجر وعمري ما انا راجع لمصر حتي الممات
وأديك مت فيها يا احمد يا بسيوني شهيد
اديك مت فدا تحريرها من كل القيود
فدا شمس كرامتها تشرق عا الوجود
م اليوم ولادك راح يعيشوا بذكري دمك
راح يرفعوا في الدنيا رايه بحرف اسمك
مش بس آدم وسلمي لأ.. وكمان كل أجيالنا اللي جايه
خليني أبوس جبهتك
خليني أتوضا بتراب عالق علي جزمتك
خليني أهتف باللي كنت تنادي بيه وقت الشهادة
تحيا مصر.. تحيا مصر
وتعيش بدم الشهداء زيك
ويسقط الندل اللي دهسك واللي فشفش عضامك
وردة علي قبرك يا صاحبي
وردة باسم كل مصري
وردة منقوش عليها كل شعار نطقته
في المظاهرة
تغيير.. حرية.. عدالة اجتماعية
بستان ورود لكل شهيد من الأحرار
وتحية حارة للثوار
من قلب مصر