حديث المدينة

مفيد فوزى :الوجود بشر وحيوان ونبات والبشر معادن ومهن و صاحبة هذا الوجه تستحق الرصدلان عدسات التليفزيون لا تزورها ابدا
فاصل
مفيد فوزى :سألتها من هى ؟
امين شرطة بسجن النساء :امين شرطة سامية كمال محمد
مفيد فوزى :سألتها كام سنة خلف الاسوار؟
امين شرطة بسجن النساء : 20 سنة
مفيد فوزى : سألتها مامدى رضاها عن هذه المهنة ؟
امين شرطة بسجن النساء : مرضية والحمد لله انا بحب النظام العسكرى عامة
مفيد فوزى :سالتها هل الشر فى قلب المرأة اكثر؟
امين شرطة بسجن النساء : لأ جواها شيطان شيطان بيتملك منها
مفيد فوزى : طبعا هى محدودة فى التفكير فا لما بكلمها عن حاجة بتقول لى الشيطان رددت كلمة الشيطان اكثرمن مرة لكن ما جبتش ابداالضمير لكن هل نحن فى حاجة الى تربية الضمائر اظن ذلك قبل ان ياتى احد هذا المكان خلف الاسوارسالتها ايه الشروط اللى ممكن تبقى موجودة فى سجانة ؟
امين شرطة بسجن النساء : تكون قوية
مفيد فوزى :وايه تانى ؟
امين شرطة بسجن النساء : تكون شجاعة
مفيد فوزى : ايه كمان ؟
امين شرطة بسجن النساء : ان هى تتغلب على اى ظرف خاصة فى مجال عملها
مفيد فوزى :زى؟
امين شرطة بسجن النساء : يعنى اى مشكلة حصلت ادامها اى حاجة بالنسبة للسجينات ان هى تتصرف بسرعة
مفيد فوزى :قلت لها هل احيانا بيرق قلبك لسجينة؟
امين شرطة بسجن النساء : ممكن ممكن قلبى يرق لسجينة وخصوصا فترة التحقيق هنا بتحكى عن ظروفها وانا مظلومة وانا وانا وانا وكان ظروفها كذا وكذا وكذا طبعا الواحد بيرق مع ظروف القضية وشوية بيجى لها افراج او براءة لما بيرق قلبى بتاخد افراج فعلا خاصة لو واحدة سايبة اولادها برة ما تعرفش حاجة عنهم فا بتيجى هنا مثلا وعندنا وبتقول لنا ظروفها فا بنوديهم لاخصائية اجتماعية بنوديهم اى مؤسسة تبع الداخلية وكدة ولوليهم اهل بره بنصرف لهم اعانه فكانت نزيلة هنا وكانت ما بتخدش عيالها خالص وعايزة تجيب لهم امرباحضار كانوا عند خالهم مكنش عايز يجيب لهم حاجة المهم دخلنا لادارة السجن وادارة السجن راحت متصلة بالتحريات بتاعتهم وجبتها لابوهم وشفيتهم
مفيد فوزى :كان ضرورى اسألها لانى بسمع ان بعض الرجال السجناء بيهربوا حبيت اعرف السجينة هل ممكن السجينات يبقى عندهم الرغبة فى الهرب والقدرة على الهرب ؟
امين شرطة بسجن النساء : لأ محصلش عندنا عندنا مفيش هروب خالص بالنسبة للحريم ما بتطلعش هروب خالص
مفيد فوزى :فى تسيب؟
امين شرطة بسجن النساء : لأ ما يقدروش يهربوا فى حراسة شديدة
مفيد فوزى : امال الرجاله ايه مفيش حراسة؟
امين شرطة بسجن النساء : لأ الرجالة اقوى من الحريم
مفيد فوزى :سألتها عن شعورها لما بتلبس احدى السجينات الملابس الحمراء تمهيدا لغرفة الاعدام ؟
امين شرطة بسجن النساء : بتتقرب من ربنا اكثر واكثر بتعبد ربنا جامد بالليل ما بتنمش الا بعد الفجر عشان حياتها ما بتنمش الا بعد الفجر فبتبقى فى حالة زعر مستنية حكم الاعدام فى اى لحظة
فاصل
مفيد فوزى : معرفش ليه فكرت فيكم فى رمضان معرفش منعرفش ايه السر اللى خلانى افكر فيكوا واشوف وانتوا عايشين فى المكان ده
سجينة :علشان حضرتك مؤمن فبتحب الناس اللى حضرتك حاسس ان محتاج لهم الانسان السوى العادى مش هيبقى محتاج مؤازرة الناس كثير لكن بالنسبة لينا احناكدة محتاجين للمؤازة بتاعتكم ومحتاجين انكم تاخذواء بايدينا تحسسونا ان احنا فى الدنيا
مفيد فوزى :كام سنة حضرتك فى المكان ده ؟
سجينة : 12 سنة
مفيد فوزى :مش كثير؟
سجينة : كثيركثير قوى مش كثير بسيط
مفيد فوزى :اضربى 12 × 365
سجينة : حضرتك يا ريت تحسبهم كدة انا بحسبهم ان حصل زلزال واعاصيرعلى البيت بتاعنا وقع خرجت من تحت الانقاض بحاول ان انا اتعايش بالماسأة اللى انا خرجت بيها من تحت الانقاض فى المكان دوت
مفيد فوزى :كان ايه الاتهام من فضلك؟
سجينة : الاتهام كان هقول يعنى اموال عامة خلينى اقول كلمة اموال عامة بس يعنى حضرتك انا عايزه انسى القضية 12 سنة نسيتها لكن بفتكر الحياة اللى احناعايشينها هنا ازاى ان احنا حاولنا بصراحة احنا نحول بيتنا كأن ده بيتنا خلاص البيت الثانى
مفيد فوزى :هو سجن ؟
سجينة : بنحاول ان ده بيتنا الثانى فلما فكرنا ان هوالبيت وان احنا فكرنا عايشين فى الايواء العاجل انا عارفة افلسفها انه زلزال وخرجت من تحت الانقاض حية فانتقلت من مكان غير المكان لكن بحاول انى اجملة انى لا اكذب ولكنى اتجمل فى هذا المكان
مفيد فوزى :ربنا يفك ضيقتك؟
سجينة :يارب ان شاء الله ان شاء الله
مفيد فوزى :عبير عبد العظيم اصغر مسجونة جت السجن محكوم عليها بالمؤبد عمرها 21 سنة لانها قتلت ابنها وزوجها شهد عليها والمحكمة حتى ما نزلتش ابدا الفترة مؤبد
مفيد فوزى :انت عارفة يعنى ايه مؤبد يا عبير ؟
عبير : 25 سنة حكم انا ما كنتش متوقعة ان انا اخذة مكنتش متوقعة ان انا اخذ الحكم دوت
مفيد فوزى : قتلتى الولد ازاى؟
عبير :انا ما قتلتوش انا بيجيى الصرع فانا بيجيلى غيبوبة بساعتين
مفيد فوزى :اه
عبير : نمت عليه كدة فزوجى راح اتهمنى ان انا قتلته
مفيد فوزى :اه لكن هو مات ازاى ؟
عبير : انا نمت عليه بتجيلى غيبوبة صرع
مفيد فوزى :انت بيجيلك غيبوبة صرع ؟
عبير : اه
مفيد فوزى : انت بيجيلك حالة صرع ؟
عبير : اه
مفيد فوزى :والولد؟
عبير :الولد كان عنده ست شهورفانا لما جت لى الغيبوبة نمت عليه
مفيد فوزى : نمتى على الولد؟
عبير : مش دريانه لأ
مفيد فوزى :اه فمات الولد؟
عبير : الولد اتوفى
مفيد فوزى :فطبعا الاب اتجنن؟
عبير : اه فراح
مفيد فوزى :بلغ.
عبير : بلغ ان انا
مفيد فوزى :القاضى حكم عليكى بالمؤبد ؟
عبير : اه
مفيد فوزى : باعتبارك قاتلة فى النهاية ؟
عبير : والدتى ست على قدها فمكنش معاها مادية انها تجيب ليَ محامى ونزلت المحكمة ولا معايا محامى ولا معايا اى حاجة ونزلت ولا مرافعة ولا اى حاجة واخذت معاقبة
مفيد فوزى :انتى عارفة 21 سنة انت عارفة تخرجى وانت عندك كام سنة ؟
عبير : 35 سنة
مفيد فوزى :يعنى تخرجى من هنا عندك 35 سنة انت ليكى اد ايه جيتى السجن؟
عبير : بقالى سنتين
مفيد فوزى : سنتين اتعودتى على الحياة هنا ؟
عبير : اه انا بضيع وقتى فى المشغل اول ما اتحكم نزلت المشغل
مفيد فوزى :بس صورته بتجيلك فى الحلم والكابوس؟
عبير :طبعا طبعا دا ضنايا
فاصل
مفيد فوزى : أظن فرحتك بالدنياعلشان ابنك جنبك ؟
ام ناجى : اه طبعا اه طبعا
مفيد فوزى : مكنش عندك زمان الحاجات دى ؟
ام ناجى : لأ يعنى انا كنت بسمع قبل مااجى
مفيد فوزى :كام سنة حضرتك؟
ام ناجى : بقالى عشر سنين
مفيد فوزى : عشرة مش كثير ؟
ام ناجى : معلش بقى هنعمل ايه
مفيد فوزى :كانت ايه التهمة؟
ام ناجى : شيكات ضمنت واحدة وعزلت من غيرما اعرف
مفيد فوزى :كانت ايه ؟
ام ناجى : ضمنتها وعزلت من غير ما اعرف
مفيد فوزى :ضمنتيها ؟
ام ناجى :ايوا وعزلت وما اعرفش مكانها
مفيد فوزى :وبعدين ؟
ام ناجى : وانا نفذت العقوبة
مفيد فوزى :والعقوبة اللى هى ايه بقى ؟
ام ناجى : عدة شيكات فيه واحد بسنة وواحد بسنتين واحد ست شهور واحد ثلاث شهور وهكذا يعنى
مفيد فوزى : اه يعنى انت الشيكات دى لم تقدرى ان تدفعيها ؟
ام ناجى : لأ مش كلها سددت منها جزء منها زى ما بقول لحضرتك المديونية كانت بتاعة الراجل توفى وكان عليه مديونيات
مفيد فوزى :اه
ام ناجى :فبعتوها لناس انا ما اعرفهمش
مفيد فوزى : اه
ام ناجى : فا معرفتش اتنازل عليهم
مفيد فوزى : لما بيقولوا لك ان ابنك جاى ؟
ام ناجى : مش قادرة اقول لحضرتك مش قادرة اقول لحضرتك وكأنى عروسة راحة تقابل عريسها بجد حقيقى ببقى قايمة من النجمة من غير ما حد يصحينى
مفيد فوزى : كام سنة عنده؟
ام ناجى : 9 سنين
مفيد فوزى : اسمه ايه؟
ام ناجى : اسمه ناجى
مفيد فوزى : اسمك ايه ؟
ناجى : ناجى
مفيد فوزى :انت تلميذ يا ناجى انت فى مدرسة انا شايف امهات وكل الاولاد معاهم يعنى لحظة
ام ناجى : فى الزمن القديم احنا لما جينا هنا ماكنش الوضع كدة ما كنش التطورات دية مكنش حجرة الزيارة كدة مكنش المستشفى
مفيد فوزى :لكن لحظة رمضان دى بالذات ؟
ام ناجى : لأ مكنش لأ مكنش يعنى اقول لحضرتك على حاجة ده من زمان قريب برضه يعنى من خمس ست سنين اه
مفيد فوزى :قولتى لى تصحى من النوم من النجمة
ام ناجى : ايوا من النجمة واحنا صحيين
مفيد فوزى : من غير ما حد يصحيكى ؟
ام ناجى :عادى انا اقول لفلانة صحينى انا عايزه اصحى الساعة كذا اليوم الوحيد اللى بصحى فيه لوحدى
مفيد فوزى :حياة العنابر قاسية ؟
ام ناجى : لأ هو حضرتك مش قاسية
مفيد فوزى :ولا خلاص اتعودتى ؟
ام ناجى : لألألأ غير التعود حضرتك فيه التزام
مفيد فوزى :التزام؟
ام ناجى : فيه التزام وفيه
مفيد فوزى : انت قضيت كام سنة؟
ام ناجى : انا عشر سنين
مفيد فوزى :انت قضيتى كام؟
ام ناجى : انا خلاص ماشية فى شهر 4اللى جاى
مفيد فوزى : 4 اللى جاى؟
ام ناجى : ان شاء الله
مفيد فوزى :يعنى 4 سنة 10؟
ام ناجى : 10 اه
مفيد فوزى : وتخرجى بقى؟
ام ناجى : ان شاء الله
مفيد فوزى : ما شفتيش ابنك ناجى ليكى اد ايه ؟
ام ناجى :لأ هو معايا على طول انا كنت جاية حامل فيه ولدته هنا وفضل معايا على مدار السنتين وبعد السنتين راح رعاية المساجين هناك
مفيد فوزى :ا يوا يعنى كام سنة ما شفتهوش ؟
ام ناجى :ما انقطعش عنى ولا سنة
مفيد فوزى : يعنى هو كام سنة بقى بعيد عنك فى السجن ماهو مش مسجون معاكى؟
ام ناجى : اه خالص ولا مرة
مفيد فوزى :هو مسجون معاكى ؟
ام ناجى :لأ مش مسجون
مفيد فوزى : طب امال ايه ما انا بقول كدة؟
ام ناجى :بيجيلى باستمرار
مفيد فوزى : اه بيجيلك ادايه ؟
ام ناجى :اه بيجبهولى كل شهر يوم 10 وفى فى المناسبات اضافة للمناسبات والاعياد
وكده والحفلات بتيجى كل اسبوع بيجى يفطر معايا بيفضل معايا طول النهار بيفضل معايا لغاية بعد العشاء كمان
فاصل
مفيد فوزى :لما شفت الموقف الانسانى اللى هو يجمع ما بين السجينات واطفالهم كان من المهم جدا اسألها صفى لى شعورك وانت شايفة الامهات قاعدين مع اطفالهم وبمعنى ادق جبولهم اطفالهم
امين شرطة بسجن النساء : دى حاجة اسرية جميلة جدا بتعملها المصلحة فعلا بتجيب ابناء المسجونة وبعض احيان بتجيب ابناء المسجونين فى سجن اخروبيبقوا قاعدين مع بعض يفطروا كأنهم قاعدين فى بيتهم مجموعة تحس بأمان بقى واكثر المسجونة بيجيلها عيالها والحاجات دى كلها مكنش بندى هدايا للاطفال دية بنعمل لهم اعانات بالنسبة للمستشفى حصل فيه تغيير جامد بالنسبة لحجرة العمليات بقى فيها احسن اجهزة
فاصل
مفيد فوزى :قولى لى
امين شرطة بسجن النساء :مع حضرتك
مفيد فوزى :لحظة الحرية حلوة؟
امين شرطة بسجن النساء : جميلة اول ما نخرج من هنا بننطلق
مفيد فوزى : لأ دا مش بكلمك عن الحرية بتاعتك انت؟
امين شرطة بسجن النساء : اما ل حرية ايه ههههههههه
مفيد فوزى : انت حاسة كمان كأنك انت مسجونة؟
امين شرطة بسجن النساء : طول النهار
مفيد فوزى :اه يعينى بتواجهى تملى السجن ؟
امين شرطة بسجن النساء : اكيد
مفيد فوزى :كأنك مسجونة بس مسجونة حرة؟
امين شرطة بسجن النساء : ايوا
مفيد فوزى :لكن الحرية حلوة ؟
امين شرطة بسجن النساء : جميلة
مفيد فوزى :اه السجن معناه ايه عناء قمع مفيش حرية؟
امين شرطة بسجن النساء : اكيد
مفيد فوزى : زنزانة يعنى ؟
امين شرطة بسجن النساء : كفاية باب بيتقفل
مفيد فوزى : باب بيتقفل يا سلام افرجى عنى بقى
امين شرطة بسجن النساء : ماشى
مفيد فوزى :قولى لى بقى جيرانك بيخافوا منك ؟
امين شرطة بسجن النساء : لأ فى ما بينا كل مودة وكل رحمة
مفيد فوزى :ازاى ؟
امين شرطة بسجن النساء : الحمد لله محترمين مع بعض
مفيد فوزى : اه
امين شرطة بسجن النساء : صباح الخير صباح النورسلام عليكم عليكم السلام انا تعبت بيجولى انا فيه اى حاجة عندهم بروح لهم عزاء فرح اى حاجة
مفيد فوزى :يعنى انت مش مدرسة رسم يعنى ؟
امين شرطة بسجن النساء : لأ
مفيد فوزى : دا انت سجانة الخوف ؟
امين شرطة بسجن النساء : بس بطلع من الشغل بانسى شغلتى خالص
مفيد فوزى : خالص ؟
امين شرطة بسجن النساء : خالص
مفيد فوزى : لكن انت وانت بتشتغلى مش بتتأثرى بالشغل ده ؟
امين شرطة بسجن النساء : بتأثر طبعا لازم اتأثر
مفيد فوزى :ازاى بقى قولى لى مظهر من مظاهر التأثر؟
امين شرطة بسجن النساء : حاجة زى الاطفال اللى جايين دلوقتى
مفيد فوزى :اه
امين شرطة بسجن النساء : كفاية مثلا هيسيبوا امهاتهم ويمشوالما طفل بيكون عندنا هنا هوبيتولد عندنا بيتم سنتين بيسيب امه وبيروح المؤسسة هو بيخرج لاهله
مفيد فوزى :اه
امين شرطة بسجن النساء : بس فى حد ذاته ده تأثيربرضه
مفيد فوزى :اه الليلة اللى اتولد فيها المولود هنا فى السجن يخرج ويمشى ؟
امين شرطة بسجن النساء : اه
مفيد فوزى :خلاص يعنى هيسيب امه ؟
امين شرطة بسجن النساء : يروح المؤسسة يروح لاهله ويسيب امه
مفيد فوزى :احكى لى الام بيبقى احساسها ايه وطفلها ماشى؟
امين شرطة بسجن النساء : بيخدوا قلبها
مفيد فوزى :بيخدوا ايه ؟
امين شرطة بسجن النساء : قلبها منها
مفيد فوزى : قلبها منها ؟
امين شرطة بسجن النساء : اه شغالين فى كافتيريا
مفيد فوزى :اه
امين شرطة بسجن النساء : بيجهزوا الفطاراه
مفيد فوزى : بيجهزوا الفطار يعنى هما جوا السجن بيشتغلوا الحاجات دى؟
امين شرطة بسجن النساء : اه بس عندنا تصنيع وعندنا هوايات هنا وكل حاجة هنا المسجونة تفرج امال عن نفسها ازاى
مفيد فوزى :دى رتبة ايه بقى هنا؟
امين شرطة بسجن النساء :امين شرطة
مفيد فوزى :امين شرطة اقصى درجة توصلى ليها ايه ؟
امين شرطة بسجن النساء : امين شرطة بامتياز
مفيد فوزى :امين شرطة بامتياز؟
امين شرطة بسجن النساء : اه
مفيد فوزى : بتلبسى كاب احيانا ؟
امين شرطة بسجن النساء : اه فى البدلة البيضاء لبست الكاب والبدلة الكاكى بنلبس الفروقات
مفيد فوزى : هو انت فى حياتك كدة مين بتسمعية بيغنى ؟
امين شرطة بسجن النساء : بسمع كل المغنيين
مفيد فوزى :زى مين قولى لى زى مين انا احب اعرف ذوق سجانة ؟
امين شرطة بسجن النساء : زى ايهاب توفيق
مفيد فوزى : ايهاب توفيييييق؟
امين شرطة بسجن النساء : اهههه
مفيد فوزى : مالك كشرتى كده؟
امين شرطة بسجن النساء : لأ عشان ما ههههههه كده
مفيد فوزى : لأ اندهشت برضه حبيت برضه حبيت اعرف ذوقك
امين شرطة بسجن النساء : بحب الاغانى كلها
مفيد فوزى :وفى الستات ؟
امين شرطة بسجن النساء :بحب اصالة بحب ام كلثوم جدا
مفيد فوزى : ا يه احلى حاجة لام كلثوم ؟
امين شرطة بسجن النساء : الحب كله
مفيد فوزى :الحب كله الله دا انت عاطفية على فكرة السجن لو عرفت انك عاطفية ممكن يغير رأيه فيكى
فاصل
مفيد فوزى : فى لحظة من اللحظات بصيت لملامح وشها وقلت لها انت جامدة وجهك جامد ملامحك جامدة
امين شرطة بسجن النساء : لأ مش كل الاحيان انا قلبى جامد فعلا بس مش كل الاحيان
مفيد فوزى :يعنى ايه جامدة لما اقول فلانه قلبها جامد يعنى ايه ؟
امين شرطة بسجن النساء : يعنى تستحمل اى حاجة
مفيد فوزى : انت تستحملى اى حاجة ؟
امين شرطة بسجن النساء : الحمد لله
مفيد فوزى : هل انت فى واقع الامر سجانة حتى فى حياتك الخاصة جوا البيت ؟
امين شرطة بسجن النساء : لأ
مفيد فوزى :مين السجان اللى فى البيت ؟
امين شرطة بسجن النساء : الزوج
مفيد فوزى :يقدر يسجنك يقدرما يخرجكيش من البيت؟
امين شرطة بسجن النساء : يقدر وحصلت
مفيد فوزى : حصلت ازاى؟
امين شرطة بسجن النساء : حلف عليَ ما اخرجش ما خرجتش
مفيد فوزى :حلف عليكى بالطلاق؟
امين شرطة بسجن النساء :لأ والله ما انت خارجة ما خرجتش
مفيد فوزى : بس دا اقوى منك؟
امين شرطة بسجن النساء : اكيد الراجل راجل
فاصل
مفيد فوزى : هل الزوجة السجانة اتأثرت بشغلتها هل التأثر ده عليها فى سلوكها داخل البيت
زوج امين الشرطة : لأ بصراحة مفيش تأثير خالص وقائمه بواجبها كما هو يعنى كل حاجة بتعملها فى البيت مش مأثر معاها الموضوع ده
مفيد فوزى: بتقولى انك انت فى يوم من الايام ممكن زوجك يحبسك قالت لى اه وحبسنى وقالى ما تخرجيش انت ممكن تحبسها فى البيت
زوج امين الشرطة : ممكن اه
مفيد فوزى : امتى ؟
زوج امين الشرطة :حصلت اه
مفيد فوزى :ازاى احكى لى ؟
زوج امين الشرطة : كنت فى يوم رايح الغشل ضرورى وكنت لازم اروح الشغل وهى موجودة هنا فى البيت مع العيال فقالت لى لأ دا انا لازم اروح الشغل قلت لها لأ مش ممكن النهارده لازم تقعدى انا هروح مشوار لغاية الشغل وارجع على طول فالعيال عندهم امتحانات ولازم تكونى موجودة معاهم انهاردة لأ ومش مهم رحت قافل الباب ورحت سايبها ونازل
مفيد فوزى :يعنى حبستها ؟
زوج امين الشرطة : اه
مفيد فوزى :انت بتقول انه لا تتأثر على الاطلاق هل 20 سنة بتشتغل فى هذه المهنة هل ما تأثرش ؟
زوج امين الشرطة : لأ الصراحة ما تأثرش كل حاجة فى البيت ماشية ميه ميه كأنها مش شغالة كمان انا احساسى كده كأنها مش شغالة كمان كل حاجة فى البيت زى اى حد عادى
مفيد فوزى : امير ماما بتشتغل ايه ؟
امير ابن امين الشرطة : امين شرطة
مفيد فوزى : امين شرطة ولا سجانة؟
امير ابن امين الشرطة : امين شرطة
مفيد فوزى : هه فكر كده وقول لى ليه ؟
امير ابن امين الشرطة : اهى ماما قاعدة على المكتب
مفيد فوزى : يعنى هى قاعدة على مكتب هناك؟
امير ابن امين الشرطة : اه
مفيد فوزى :اه لكن مش سجانة وهى لما تبقى سجانة ده شئ وحش؟
امير ابن امين الشرطة :لأ حلو عادى
مفيد فوزى : طب امال ايه ليه ما بتقولش سجانة
امير ابن امين الشرطة : علشان انا عارف ان هى امين شرطة
مفيد فوزى : يعنى انت عارف ان هى امين شرطة فى الدولة يعنى هه وزارة الداخلية شغلتها مش كدة؟
امير ابن امين الشرطة :هى فى وزارة الداخلية بس امين شرطة
مفيد فوزى : الست تدخل السجن تكون عملت ايه ؟
امير ابن امين الشرطة : سرقت
مفيد فوزى : او
امير ابن امين الشرطة :قتلت
مفيد فوزى : ايوا هل من الممكن حد يقولك والدك بيشتغل ايه مثلا فتقولى بيشتغل فى شركة موظف تبع وزارة الرى يقولك طيب والدتك بتشتغل تقولى اه طيب بتشتغل ايه تردى تقولى ايه ؟
ابنة امين ا لشرطة :ايوا اقول لها بتشتغل
مفيد فوزى : ما انا عارف اه بتشتغل مش كدة طب بتشتغل ايه يعنى من فضلك ؟
ابنة امين ا لشرطة :بتشتغل امين شرطة
مفيد فوزى : لكن ليه ما تقوليش سجانة ايه الفرق بين امين شرطة وسجانة؟
ابنة امين ا لشرطة :امين الشرطة اعلى من السجانة يعنى هى اللى بتمشى هناك الشغل وكدة
مفيد فوزى : لكن انت ما تحبيش تقولى سجانة؟
ابنة امين ا لشرطة :لأ عادى الشغل مش عيب
مفيد فوزى : لكن ماتحبيش تقولى كلمة سجانة؟
ابنة امين ا لشرطة :ماشى هى لو شغالة سجانة انا هقول سجانة
مفيد فوزى : هى فعلا سجانة انا لما رحت صورتها هناك لقيتها فعلا سجانة يعنى هى فعلا بتحرس المسجونات جوا السجن
ابنة امين ا لشرطة : عادى لو حد سألنى هقول سجانة
مفيد فوزى : يعنى انا بأسأل ابنة عن امها هى انت ما بتحسيش بضيق لما يقولوا مثلاوالدتك سجانة ؟
ابنة امين ا لشرطة :لأ عادى ماما قايمة بكل شغلها فى البيت وبتذاكر لنا وبتعمل لنا كل حاجة كأنها مش شغالة
مفيد فوزى : حبستى اولادك وهما اطفال ؟
امين شرطة بسجن النساء :ايوا
مفيد فوزى :ازاى حبسيتهم ازاى؟
امين شرطة بسجن النساء :منعتهم عن نزول النادى او حاجة زى كدة
مفيد فوزى : قفلتى عليهم ؟
امين شرطة بسجن النساء : لأ كنت انا معاهم
مفيد فوزى : الله يعنى حبستيهم ا زاى ما انا عايزافهم ؟
امين شرطة بسجن النساء : قفلت الباب ومحدش يخرج منهم حرمان من الفسحة مثلا اسبوع ومخرجتهمش اليوم ده خالص
مفيد فوزى : حسيتى اد ايه القسوة فى حرمانهم من النزول؟
امين شرطة بسجن النساء : ايوا وقعدت طول النهار
مفيد فوزى :قولى لى مين اصلح ممثلات السينما لو حبت تعمل دور سجانة تعملها ؟
امين شرطة بسجن النساء : دور سجانة سجانة ممكن فيفى عبده
مفيد فوزى :فيفى عبده تنفعل سجانة؟
امين شرطة بسجن النساء : تنفع
مفيد فوزى :ليه ؟
امين شرطة بسجن النساء : جامدة
مفيد فوزى : جامدة؟
امين شرطة بسجن النساء : اه
مفيد فوزى :صوتك اتغير ليه لما قابلتك فى السجن كان صوتك ناشف قوى ؟
امين شرطة بسجن النساء : البيت غيرالشغل
مفيد فوزى :اه
امين شرطة بسجن النساء : يعنى الشغل وضع والبيت وضع ؟
مفيد فوزى :يعنى هنا انت بتحسى بايه بقى ؟
امين شرطة بسجن النساء : بحس ان انا ست