إسلام وشعبولا يشجبان قصف غزة

بعد ساعات من بدء القصف الإسرائيلى لقطاع غزة، والذى راح ضحيته مئات الشهداء، فضلاً عن مئات الجرحى، كتب الشاعر الغنائى إسلام خليل أغنية عبر خلالها عن تضامنه وكل المصريين مع الشعب الفلسطينى المحاصر فى غزة، ورفضه هذا الاعتداء السافر من قبل الإسرائيليين.
وقال إسلام: بمجرد ما شفت اللى حصل فى غزة على شاشات التليفزيون كلمت أبوعصام -شعبان عبدالرحيم- وقلت له افتح التليفزيون واتفرج على اللى بيحصل، وقلت له أنا هاكتب وأنت هتغنى لأننا لازم نقف جنب الفلسطينيين، واتفقت مع شعبولا على تسجيلها بسرعة لإثبات موقف، خاصة أن الفنانين المصريين أصبحوا كسالى، ولم يتحرك أحد للتضامن مع الشعب الفلسطينى ولو بأغنية، وفى الآخر بيعيبوا علىّ عشان ما باكتبش غير لشعبان، هو فيه حد غيره بيتحرك ولا ياخد موقف؟
وتقول كلمات الأغنية:
غلبت أكتب أغانى مش لاقى كلام يتقال/ اللى بيحصل فى غزة حرام ده ولا حلال
قنابل نازلة طالعة على الأرض وعلى البيوت/ والدنيا فى غزة والعة والناس عمالة تموت
يا عالم حد يلحق يا عالم حد يحوش/ إن شاالله حتى بجزمة زى اللى خدها بوش
الشعب العربى اتأذى.. الشعب العربى حزين
على اللى بيحصل فى غزة وبيجرى فى فلسطين/ 200 شهيد وأكتر بالضرب ليل نهار
والدم فى كل حتة والناس ما بين حصار
مكسوف أكتب أغانى والدم مستباح
لكن ورقتى ميدانى وقلمى هو السلاح/ بدل ما تلوموا مصر وتجيبوا سيرة الناس
شوفوا الحرب اللى دايرة بين فتح وبين حماس
طول عمر مصر واقفة وبكامل شعبها/ مشغولة بالقضية وبتسعى لحلها
الظلم الإسرائيلى ع الوطن العربى زاد/ وما بنعملش حاجة غير بس نقف حداد
دى دولة ملهاش لزمة وهدفها دايماً قذر/ عايزالها ألف جزمة زى بتاعة منتظر.