ناصر فرغلي يكتب: ما يحكمشي (من أوراق الغضب)

خايف لا شمسِك من صباحنا تزول
خابف نقع في كل عرض وطول
خايف طوفان ييجي ما نلقاش طول
خايف لا خوفي يشلني على طول
لكن ح اقولِك كلمتي وامشي
مايحكمشي مايحكمشي مايحكمشي
إمتى الزمان يسمح واقولك لأ
أما انتي حقا إنتي مالكيش حق
إيدك ف مية وحاطة إيدي ف شق
والآه بتطلع مني غنوة عشق
شايلاكي ف عنيّا وعلى رمشي
مايحكمشي مايحكمشي مايحكمشي
حلمي أشيخ واكبر وانا معاكي
بكلام بليغ أحكي حكاياكي
واطلب ايديكي م اللي رباكي
وتزفنا عربية ملاكي
حبايبنا تركب والعزول يمشي
مايحكمشي مايحكمشي مايحكمشي
شوري عليا أهد ولاّ ابني
أفضل وحيد ولاّ أجيب ابني
مستني نايبي فيكي ما نابني
غير الصداع ونصيبي ما صابني
شوري عليا استنى ولاّ امشي
مايحكمشي مايحكمشي مايحكمشي
عايزك تعودي شمسة ف سماكي
وتشدي عودي المحني ف هواكي
وتفكريني قبل ما انساكي
مهما يدوم البوم ف شبّاكي
الله اللي دايم غيره ما دايمشي
ويا ألله ما يحكمشي ما يحكمشي
وارث غيطان وارث سما ومتاريس
وارث مرارة محنتك يا إيزيس
وارث فؤادة وجرحها وعتريس
وارث ما بين مليون وريث ووريث
إورث معانا، ليه ما تورسشي
وماتحكمشي ماتحكمشي ماتحكمشي