خلي بيتك جنة.. بالإضاءة المودرن!!

نفسك يكون بيتك أنيق وجميل، وفي نفس الوقت مختلف عن أي بيت تاني، يبقى لازم تلعبي في الإضاءة؛ وده لأنها مهمة جداً في إعطاء ديكور متميّز للبيت، مش كده وبس دي كمان بتدي إحساس بالاتساع خصوصاً لو كانت المساحة عندك صغيرة..

وعلشان أهمية الإضاءة عملنا لكِ الحوار ده مع المهندس "خالد أبو العنين" -صاحب أكبر معارض للإضاءة (تريند)- ومعاه هنتعرّف على استايلات كثيرة من وحدات الإضاءة الجديدة بدل من الأشكال المعتادة والثابتة المعروفة عند معظم الناس..

يلّا نشوف الحوار مع بعض

إيه التطوّر اللي حصل في شكل وحدات الإضاءة؟!

الإضاءة كلها في الفترة الأخيرة أصبحت مودرن أكتر؛ وده لأن المودرن دخل في كل شيء؛ فأثاث البيوت دلوقتي بقى كله مودرن، وبالتالي كان لازم يصاحب ده تطور في شكل الإضاءة المناسبة للأثاث، وعلى فكرة الإضاءة المودرن ظهرت بالتحديد منذ 8 سنوات وانتشرت الإضاءة المودرن والالترا مودرن، وأصبح شكل النجفة ووحدة الإضاءة غريباً وأنيقاً يُشبه شكل التحف والأنتيكات، وأكتر حاجة بتميّز الإضاءة المودرن إن أسعارها منخفضة وبكده ممكن إنك تغيّري شكل الإضاءة في بيتك كل 6 سنوات.

هل وحدات الإضاءة المودرن بتتصنع في مصر؟!

وحدات الإضاءة كلها مستوردة من دولة الصين؛ وده لأن الصين من أكثر الدول التي تصلح لاستيراد الإضاءة؛ لأنهم ليسوا مخترعين، ولكن مقلدون للتصميمات الإيطالية فكل موديل جديد بيظهر بيقوموا بتصنيعه.

وما أشكال وأحجام وحدات الإضاءة المودرن؟!

معظم وحدات الإضاءة المودرن مصنوعة من الاستانلس ستيل والسيلفر والكريستال، أما بالنسبة للتصميمات فهناك تصميمات عديدة تُشبه شكل الكورة والزجاجة والصندوق والبولات والمكعبات. فالنجفة الآن بيصل ارتفاعها حوالي متر ونصف، ويوجد أيضاً النجف الساقط المشدود بأسلاك البلاستيك، وأهم ما يُميز وحدات الإضاءة الحديثة: المستويات، والأطوال، وإن التحكم في الإنارة بيكون من خلال الريموت كنترول.

هل الإضاءة المودرن قوية وبتغطي مساحات كبيرة؟!

الإضاءة المودرن ليست إضاءة قوية ومعظمها بتغطي بقعة لون في ركنة معينة, ولكن بعض الناس التي ترغب في إضاءة قوية ممكن إنها تزيد من وحدات الإضاءة داخل الغرفة؛ مثل اللمبادير والأباجورة، ومجموع كل هذا يعطي قوة من الإضاءة، وعلى فكرة المستوى والأحجام ولون خامة النجفة وارتفاعها هم اللي بيحددوا كمية الإضاءة.

نسمع كثيراً عن الإضاءة (الليدد) فما هي.. وهل هي الإضاءة الملوّنة؟!

الإضاءة "الليدد" هي الإضاءة التي تُعطي أكثر من لون داخل النجفة الواحدة، وده بيكون جزءا أساسيا من تركيب جسم النجفة الأساسي بجانب البادي الخارجي لشكل النجفة، وبيكون غير ظاهر ويعطي ألواناً عديدة؛ مثل: الأصفر والأخضر والأحمر والألوان دي بتتغير عن طريق الريموت كنترول والذي من خلاله نتحكم في مستويات الإضاءة سواء كانت عالية أو منخفضة.

وإيه أحدث اللمبات المناسبة لوحدات الإضاءة المودرن؟!

اللمبات الحديثة هي اللمبات "الهالوجين" التي تتميّز بحجمها الصغير جداً غير الظاهر وفي نفس الوقت بتعطي إضاءة قوية، وبكده فهي بديلة عن اللمبة البلحة واللمبة العادية المسمار والقلاووظ.

وهل تراجعت وحدات الإضاءة "الاسبوت"؟!

وحدات الاسبوت تراجعت في أنها تكون المسئولة عن إنارة سقف بالكامل، وأصبحت توضع فقط في أماكن محددة زي داخل المكتبات والأرفف والدولاب وأماكن الأنتيك والتحف؛ لأنها بتعطي إحساسا بالعمق والاتساع.

وهل اللمبادير أصبح بديلاً عن الأباجورات؟!

اللمبادير يعتبر شكلا من أشكال ديكور الإضاءة وهو بديل عن الأباجورة المعتادة التي كانت عبارة عن عمود ميتال بالشابوه القماش، وأصبح اللمبادير دلوقتي مصنوع من "بلاكس جلاس" والفريم الاستاليس, والشابوه دلوقتي أصبح يستبدل بخامة "بي بي سي شفاف"، وعلى فكرة الأباجورات الصغيرة لازم تكون متناسقة مع النجفة؛ يعني لو النجفة عبارة عن كريستال وستانلس فلابد أن الأباجورة تكون من الكريستال والاستانلس وتكون مشابهة لها.

وما أشكال وحدات الإضاءة التي تستخدم كشكل ديكور؟!

وحدات إضاءة الديكور غالباً بتكون وحدات إضاءة جانبية وبتكون مثلاً نجفة ارتفاعها 2 متر عبارة عن زجاج في حجم الكورة، وبداخل كل كورة زجاج كمية من السلوك عشوائية الشكل وبداخلها لمبات هالوجين، والزجاج ممكن يكون شفاف أو ألوان زي الأصفر والأخضر، أما الفريم والقاعدة بيكونوا استانلس، وعايز أقول إن السيلفر والاستانلس هو أساس صناعة كل خامات النجف الحديث.

وإيه الأماكن المناسبة لوضع النجف الطويل (الساقط)؟!

لو كان السقف عالي نضع النجفة (الساقطة)، ولو السقف منخفض نضع نجفة (ملتصقة بالسقف)، لكن بالنسبة لغرفة السفرة أفضّل النجفة الساقطة التي تكون بينها وبين السفرة حوالي 40 إلى 50 سم، أما بالنسبة لغرفة النوم والريسبشن لو السقف عالي أضع النجف الساقط والعكس، لكن بالنسبة لغرف الأطفال أضع النجف البسيط والصغير الملوّن ويكون متناسقاً مع السجادة أو أي شيء في الغرفة.

إزاي أنسق وحدات الإضاءة مع أثاث المنزل؟!

أهم حاجة إن شكل الإضاءة يكون متناسقا لشكل الأثاث، فالأثاث المودرن بيحتاج إضاءة بسيطة ولونها أبيض ومباشرة وموزّعة على أشكال مختلفة من الوحدات؛ مثل: اللمبادير والأباجورة والنجفة المودرن, أما الأثاث الكلاسيك فالأفضل أننا نستخدم معه النجف الملتصق بالحائط، ويكون أيضاً خامته من الاستانلس والكريستال ولكن شكله يعطي إيحاء بالكلاسيكية ويفضّل الإضاءة الصفراء.

عايزين نتعرّف على نماذج من وحدات الإضاءة التي تتناسب مع الريسبشن وغرفة النوم والمطابخ؟!

في الغالب الآن معظم الشقق بيكون فيها المطبخ الأمريكاني المفتوح على الريسبشن ويتناسب معه نجف على شكل قاعدة ستانلس؛ مثل: الصينية ومعلق عليها أحجام من الزجاجات تشبه زجاجات مياه الشرب؛ وهي عبارة عن زجاج أبيض وبداخلها إضاءة بيضاء ولمبة نيون، أما غرفة النوم مثلاً يتناسب معها النجف البلكس جلاس وفيها كريستال ولمبات هالوجين ووحدات إضاءة صغيرة الحجم ومنفردة بجانب الأباجورات، أما الحمامات فالأفضل استخدام إضاءة غير مباشرة.

وفي النهاية.. هل لازم نجهز أسلاك الإضاءة قبل تشطيب ودهان الشقة؟!

إحنا زمان كنا بنفكر في النجف آخر حاجة، لكن دلوقتي لازم الشباب يفكر في النجف وشكل الإضاءة قبل اختيار الأثاث وبالتحديد عند تشطيب الشقة؛ لأن وحدات الإضاءة الجانبية تحتاج إلى مخارج سلك كهربائي من السقف أو عمل شبك ممدد لبيت النور في حالة الإضاءة غير المباشرة، فلابد أن يكون هناك سلك كهربائي في مكان الوحدة وفي الأركان وفي أماكن مختلفة.


وده جاليري فيه مجموعة متنوّعة من وحدات الإضاءة

مجموعة متنوّعة من وحدات الإضاءة
* صحة وجمال
اضغط على الصورة لمشاهدة الجاليري:


ولغاية هنا.. وخلص كلامنا النهارده
وإلى اللقاء في العدد القادم