أحدث التصميمات.. في ربطات طُرح العرايس والسواريهات

قدّمنا قبل كده مجموعة من ربطات الحجاب المختلفة اللي بتناسب الجامعة ولبس الكاجوال...
ووعدناكم إن هيكون معانا استايلات كثيرة ومختلفة من ربطات الحجاب اللي بتناسب السواريهات والخطوبة والأفراح علشان دائماً البنت بتحتار في المناسبات اللي زي كده...
وعلشان كده معانا النهارده "سها بكري" مصممة ربطات الطُرح هتقدم لنا مجموعة مختلفة من الاستايلات اللي بتناسب السواريهات والأفراح وإنتي عليك تختاري اللي يناسبك.
إيه الموضة دلوقتي في خامات طرح السواريهات والأفراح؟
الموضة والاستايل الجديد في طُرح السواريه هي كل ما هو (أملس) زي الساتان والشيفون الطبيعي والأورجانزا الناعمة.. لأن النوع ده من الخامات بتساعد البنات على إنها تربط أكثر من طرحتين بطريقة مريحة وثابتة. وفي نفس الوقت نحاول نبعد عن الخامات الناشفة (الواقفة) زي الأورجانزا والتول الجليتر والساتان الناشف. بالإضافة إلى إن الاكسسوار والورود بيضيف لطُرح السواريهات والأفراح أناقة وجمال وموضة متجددة.
وإزاي بتقدري تصمّمي أشكال مختلفة من ربطات السواريهات عشان تناسب كل وجه؟
السواريهات عموماً بتعتمد على إدخال ألوان مع بعض، وخامات السواريه عموماً بتكون ليكرا وتول، وأهم حاجة بتساعد على ربط أشكال مختلفة من الطُرح هو إن يكون عندي (بندانات) كثيرة؛ لأني باعتبرها سحر الحجاب وفى السواريهات عموماً لازم يكون عندك بندانة تول أو ساتان.
الوجه المليان.. باستخدم معاه بندانة تول كاملة؛ لأنها بتحدد الوجه و(تلمّه) بالإضافة إنه يتناسب معاه التصميمات الانسيابية والاكسسوار يكون بسيط.
أما الوجه الرفيع.. باحاول أعمل معاه طبقات كثيرة من البندانات والطرح المستطيلة.
وفيه حاجات أساسية في ربطات السواريه ما أقدرش أستغني عنها ومنها:
* إني أستخدم بندانة كاملة علشان تلمّ الشعر.
* أو بندانة ساتان طبيعي علشان تعطي لمعة.
* في بعض الأوقات باحاول أستعمل طرحة مطرّزة مع طرحة عاديّة.
هل شكل الطرحة بيعتمد على شكل الفستان؟!
أنا بحب أشكّل فستان الفرح والسواريه علشان يكون مناسب مع روح وشكل الطُرح اللي باصممها؛ يعني باعمل تغييرات وإدخالات جديدة في التصميمات النهائية للطرحة والفستان مع بعض.
******************
بندانة سيلفر مع طُرح الأفراح
ممكن ندخّل بندانة ملونة مع طُرح الأفراح؟
طبعاً ممكن ندخّل البندانة الملونة مع طُرح الأفراح، وزي ما إحنا شايفين في الصورة وهي عبارة عن...
* بندانة تول بيضاء ونربطها من وراء.
* نربط فوق البندانة التول ساتان طبيعي.
* طبقة أخيرة من التول الكريستال وكل ده علشان يعطي انعكاس في الضوء واللمعان؛ خصوصاً في الأفراح.
* بعد كده أدخلت سيلفر أبيض في وسط الرأس علشان يعمل كونتراست.
* الخطوة اللي بعد كده نحطّ التاج.
* وفى النهاية أحضرنا طرحة تول مطرّزة وكربجناها من نصف الرأس على الجانبين بشكل عشوائي وأنزلنا التطريز على الكتف.
*******************
طرحة تتلبس على الجاكتات والبدل
إزاي تجددي في تصميم الطُرح اللي بتتلبس على الجاكتات والبدل؟
عندي فكرة طرحة شيفون منقوشة (منها فيها) مع طرحة ساتان طبيعي.
وخطوات الربطة بسيطة قوي:
* أول خطوة بنجيب الطرحة الذهبي ونربطها على الرأس من وراء والجنب بتاعها من قدام.
* بعد كده نحضّر الطرحة الشيفون من تحت ونربطها على فوق من جنب واحد.
* والخطوة اللي بعد كده نثبّت الطرحتين مع بعض.
* بعدها نلف الطرحة على الرقبة وندخّل الطرحة المنقوشة مع السادة مع بعضهم على جنب.
********************
ربطة مناسبة للحفلات والمناسبات
طيب بالنسبة للربطات اللي بتناسب الحفلات والمناسبات؟
ممكن نبدأ بأول ربطة، ودي مطلوب نجهّز لها بندانة قطن + إيشارب مستطيل لونه أوكسديه + إيشارب مستطيل تركواز منقوش، ويكون على حرير أما الطريقة هتكون:
* أول حاجة هنربط الإيشارب الأوكسديه على وراء، وبعد كده نجيبه على قدام ونربطه ربطة الحجاب العادية.
* ثاني خطوة بنجيب الإيشارب التركواز المنقوش ونلفّه من تحت الرقبة زي الكوفيّة، ونرفعه على فوق، ونربطه على جنب واحد، ونلفّه كأنه وردة، وندبّسه بطرف واحد والطرف الثاني نسيبه على جنب.
* بعد كده بنلف الإيشارب الأوكسديه مع طرف الإيشارب التركواز (داير ما يدور) مع استخدام دبابيس صغيرة للتثبيت.
******************
طرحة بألوان الأخضر والأصفر والفوشيا
ونيجي للربطة الثانية ودي مطلوب نحضر لها إيشارب مثلث ألوان أخضر وأصفر وفوشيا؛ ألوانهم داخلة مع بعضها مع إيشارب مستطيل بليسيه لونه أخضر والطرف بتاعه حبات لولي وإيشارب مستطيل فوشيا..
ودي طريقة الربطة:
* هنبدأ بالإيشارب المثلث ونربطه على وراء.
* بعد كده نجيب الإيشارب الفوشيا في الأول وأربطه على وراء.
* نجيب الإيشارب الأخضر من على الرقبة وأرفعه من الجنب اليمين إلى الشمال؛ بحيث يكون متماشي مع الفوشيا والبندانة.
* والخطوة اللي بعد كده إننا نجيب الإيشارب الفوشيا مع الأخضر كروس مع بعض؛ بحيث يكون في النهاية الربطة كلها على طرف واحد.
* وفي النهاية نجيبهم كلهم على جنب واحد وأدبّسهم.
*******************
إيه النصائح اللي ممكن تنصحي بها البنات علشان شكل الحجاب يكون مظبوط؟
* أول حاجة إن البنت لازم تلمّ شعرها على وراء كويس، وبعد كده تلبس بندانة قطن علشان تثبّت الطُرح ولما تيجي تربط الإيشاربات تربطها بشكل بسيط ومريح.
* تشتري البندانة على حجم الرأس بالظبط؛ يعني لا تكون واسعة ولا ضيّقة، وتبدأ بخامة قطن، وبعد كده خامة ناعمة، وتبعد خالص عن إنها تستخدم خامتين ناعمين مع بعض.
* تغطي الرأس بإيشارب واحد، وبعد كده تتحكم في الإيشارب الثاني بأي شكل أو طريقة هي عايزاها.
* تحاول تدخّل السادة مع المنقوش وبلاش تلبس خامات لامعة في الصباح.
* من الأفضل إننا نستخدم دبابيس الإبرة اللي من غير رأس.
إزاي البنت ممكن تحافظ على شياكة ونظافة الطرحة؟
* الإيشاربات تكون مكويّة باستمرار لأن المكواة بتساعد على انسداد المسام اللي بتعملها الدبابيس. ونستخدم المسك والعطور عند تخزينها في الدولاب.
* عند غسيل الإيشاربات نحاول نستخدم شامبوهات ومساحيق خفيفة وننشرها بمشابك بلاستيك.
* لو حصل إن الطرحة تعرضت (للتنسيل) نستخدم مسدس شمع، وهو عبارة عن لزق شفاف من عند (الخرداواتي) ونضع نقطة صغيرة على الجزء المتنسّل.

ولغاية هنا وخلص عددنا ونتمنى إنه يكون عجبكم..
وياريت تبعتوا لنا رأيكم..
إلى اللقاء،،،