يعد شم النسيم من الأعياد والاحتفالات التي ترتبط بأنواع مميزة من الطعام التي أعتاد المصريون على تناولها منذ عصر الفراعنة مثل الفسيخ والرنجة والملوحة والسردين والبيض الملون والخس والبصل. "صوت البلد" تعرفت على آراء المواطنين حول الطقوس والأكلات والعادات التي تُميز هذه المناسبة السنوية. ويقول هاني فوزي، 45 سنة موظف: "بعشق الفسيخ، وبعشق دي كلمة قليلة، أنا بموت فيه، هو والرنجة والسردين، ويا سلام لو فيه عودين خس كده، وفحلين بصل، مش هقدر أوصف لك قد إيه الطقوس بتاعة عيد شم النسيم حلوة وجميلة، وعلى فكرة الطقوس دي؛ بترجعني بالذكريات لأيام زمان، لما كنا بنتلم أنا وأمي وأبويا الله يرحمهم، مع أخواتي ونقعد كلنا حوالين السفرة ونحتفل بأجواء وطقوس الأكل اللذيذ في يوم شم النسيم، وطبعًا كنا بنخرج نتنزه، لكن موضوع كورونا ده دلوقتي غير مظاهر الاحتفال اليومين دول.. وأنا عن نفسي لسه بحتفل مع أهلي وبردو بشتري فسيخ ورنجة زي أيام زمان في بيت العيلة". وتضيف سالي نجيب ربة منزل: "طقوس يوم شم النسيم اتغيرت أكيد بسبب كورونا، علشان إحنا مش هنخرج للحدائق وعلى الكورنيش، بسبب الإجراءات الوقائية اللي قررتها الدولة، لكن أكلات اليوم ده بتكون مميزة، زي الملوحة والفسيخ، والسنة دي شم النسيم له طعم تاني لأنه جاء في شهر رمضان الكريم، وعلشان كده هيكون له مذاق خاص، وأنا عن نفسي أشتريت فسيخ، وعملته بطريقتي الخاصة؛ أصل أنا ست بيت شاطرة، وبحب المطبخ، وطبعًا مش هقدر أنسى لوازم وتحبيشات الفسيخ زي البصل والليمون والخس والحمص". فيما أشار رؤوف حلمي، 53 سنة مهندس، إلى أن أكلات يوم شم النسيم قد توارثتها الأجيال، قائلاً: "من صغري وأنا بحتفل بعيد شم النسيم، وكنت دايمًا بأخرج مع أصحابي ونروح الجناين والملاهي ونلعب ونفرح، ولكن الكلام ده النهاردة صعب علشان الإجراءات الوقائية ما تسمحش بالخروج للتنزه، مع انتشار الوباء في كل دول العالم، لكن متخليش الكلام ياخدنا من غير ما أقول لك عن حلويات اليوم ده، والمقصود بالحلويات هي الرنجة، والفسيخ والملوحة، والسردين، وأم الخلول، والجندوفلي، أصل إحنا إسكندرانية في الأساس، ومهما أقول لك مش هقدر أوصف لك قد إيه جميلة لمة العيلة على وجبه هنية، علشان تفكرنا بعادات أهالينا من أيام الفراعنة". وقالت سوزان حمدي: "يا سلام شم النسيم ده بالنسبة ليا حاجة تانية خالص، أصل أنا من عشاق الملوحة، وخد بالك أن ببعت أجيبها من الصعيد، ودي بقى بتكون زي الزبدة، مع شوية أم الخلول، وأوعى تنسى البصل والليمون والتحابيش، لأن إحنا طول عمرنا وإحنا بنحب نحتقل بشم النسيم، والسنة دي رغم إنه جاي مع شهر رمضان والصيام، إلا إننا أشترينا لوازم المناسبة دي، وكمان قمنا بتلوين البيض علشان الأطفال تتبسط وتفرح، ويارب كل أيامنا تبقى بهجة وسعادة وسرور وأعياد".
