الفئران والثعابين تزحف على جدران قرية السبعة ببلقاس!!

يعاني أهالي قرية السبعة من وجود مصرف جفت مياهه منذ ثلاث سنوات وهذا المصرف يسكنه الفئران والثعابين يتخفون في الحشائش التي تكونت فيه بالإضافة إلي أن هناك البعض يلقون قمامتهم فيه.
في البداية تقول وزارة مبارك الشحات .. المصرف ده مفيش فية ميه من ثلاث سنوات وتكونت عليه الحشائش ومليان فئران وثعابين وبتطلع علينا بالليل و بتبهدل بيوتنا وبتدخل في شكائر الأرز والقمح وصاحب المصرف ده بيعمل لينا محاضر وبندفع فلوس يعني إحنا متبهدلين من الفئران والثعابين وكمان بندفع غرامة يرضي مين ده ونروح لمين ونشكي لمين؟!
وتلتقط طرف الحديث بدرية محمد فتقول الفئران طول الليل بتجري علي جدران البيوت وكمان في جارة لينا كانت عند أهلها ولما رجعت بيتها وجدت ثعبان كبير علي جدار بلكونتها وإتخضينا كلنا وصرخنا. مش ممكن الثعبان ده كان موتها أو أذى حد من أطفالها وكمان كفاية الزبالة اللي بتترمي فيه وكمان البلاغات اللي متقدمة ضدنا بأننا بنرمي إحنا الزبالة يعني إحنا هنأذى نفسنا؟!
وفي السياق ذاته تقول زينب المرسي أتعمل لينا محاضر في الشرطة جاءت إلينا ودفعنا غرامات ولما الضابط جه وشاف اللي إحنا فيه قال لنا أننا نعمل محضر في صاحب المصرف بس هو كل مرة بيعمل محاضر لينا وبيقول إن إحنا بنرمي فيه الزبالة وكمان الفئران اللي بتأذينا وتأذي أولادنا.
وتدخل زوجة ابنها في الحديث فتقول إحنا متبهدلين من المصرف ده وأطفالنا جالهم حساسية وفي طفل ابن جار لينا أصيب بالعمي بسبب الزبالة والروائح اللي بتخرج من المصرف وأولادنا معرضين للخطر من الثعابين والفئران إحنا هنعمل إيه مش بأيدينا حاجة نعملها.