حل متحضر لأزمة ارتفاع سعر فراخ البانية .. الشعب هو كلمة السر

حالة من جنون الأسعار يشهدها السوق المصري في الفترة الحالية وخاصة قبيل دخول شهر رمضان الكريم، ومن بين المنتجات التي تشهد ارتفاع عالي بالأسعار، الفراخ وخاصة الفراخ البانية.
فلقد وصل سعر الفراخ البانية بالسوق المصري في الآونة الأخير إلى 70 جنيهًا للكيلو الواحد، وهي الزيادة التي تُعد زيادة فائقة مقارنة بما سبق.
طرح الرحالة المصري أحمد حجاجوفيتش، حل للأزمة كما فعلت دولة الأرجنتين، عندما ارتفع سعر البيض، فنشر حل متحضر على صفحتة الشخصية على موقع التواصل الاجتماعي الفيس بوك.
فقال حجاجوفيتش "بمناسبة ان سعر كيلو فراخ البانيه وصل ل حوالي 70 .. بدون اي مقدمات او حتي اسباب واضحة او منطقية .. فيه قصة شبيهة حصلت قبل كدة في الأرجنتين بس في البيض!، اتفق تجار البيض هناك انهم يغلوا اسعارهم مرة واحدة من غير ما يفكروا في الناس اللي حتعاني من الموضوع ده !، فإيه اللي حصل بعد كدة؟! المواطن الأرجنتيني كان لما ينزل للسوبر ماركت ويأخذ البيض ويلاقي سعره غالي يرجعه تاني علي الرف .. كل المواطنين هناك عملوا نفس الحاجة من غير لا حملات علي السوشيال ميديا و لا رسائل .. لان ديه ثقافة الشعب .. شعب رافض ان الشركات تبتزه و تتحكم فيه !! فإيه كان نتائج الموضوع ده ؟؟".
وتابع الرحالة المصري قائلًا "في اليوم الثاني : جه عمال الشركات عشان ينزلوا البيض الجديد بتاع انتاج النهاردة في محلات السوبر ماركت.. فرفض كل الباعة انهم ينزلوا أي حمولة جديدة لأن إنتاج امبارح مفيش اي حاجة اتباعت منه !بعد أيام وكالعادة جت عربيات التوزيع الخاصة بشركات البيض عشان تنزل الكميات الجديدة بس كلهم فوجئوا بأن بعض أصحاب المحلات رفضوا ينزلوا أي كميات جديدة .. الا لما يتباع القديم .. و بعضهم طلبوا بانهم يبدلوا الإنتاج القديم بإنتاج النهاردة !!".
وتابع :"الشركات افتكرت بأن المقاطعة حتنتهي في بالكتير في أسبوع وبعدها الناس حترجع تشتري تاني.. بس الأمر مختلفش لان الشعب الأرجنتيني مستمر في المقاطعة حتي بعد ما عدي اسبوعين وشركات البيض يتخسر !!واتورط تجار البيض بإن بيضها مالي الثلاجات والمخازن والمستودعات والبقالات من غير ما حد يشتريه .. مش بس كدة ديه كمان ديه بتخسر عشان بتأكل فراخها و بالتالي فيه بيض جديد بيتم انتاجه بس مش عارفين يبيعوه !! فتضاعفت الخسائر على الشركات !
وأضاف وبعد ده كله .. إجتمع أصحاب شركات البيض وقرروا يرجعوا البيض لسعره السابق !! و افتكروا انهم كدة خلاص حلوا المشكلة خلاص !! بس تواصلت المقاطعة برضه من الشعب الأرجنتيني!!ف إجتمع أصحاب شركات البيض تاني و اتفقوا انهم يبيعوا البيض بربع سعره قبل الارتفاع مع تقديم اعتذار رسمي للشعب في الصحف بعدم تكرار ما حدث!".
وأشار الرحالة المصري أن الاستفادة من تلك القصة تكمن في أن الأساس هو الشعب فقال :"نستفيد من القصة ديه ان الثقافة عامل أساسي ومحوري لرقي الشعوب .. الشعب الأرجنتيني فاز فى معركته مع جشع التجار وفاز بأنه يشتري البيض بخصم 75٪ من سعره الأصلي!احنا كشعب نقدر نرفع أو ننزل أسعار أى سلعة! لكن للأسف احنا اللي بإيدينا بنشجع التجار على رفع الأسعار !!للاسف احنا هنا في مصر لما التجار بيغلوا الحاجة زي الفراخ مثلا بدل ما نقاطعها .. او حتي لو كنا محتاجين للضرورة القصوي نشتري فرخة ولا فرختين بنروح نشتري اربعة .. عشان بنقول نشتريه قبل ما يغلي تاني و مش حاطين في بالنا ان احنا كدة بنشجعهم علي ده!".
ووجه حجاجوفيتش نصيحة في نهاية القصة قائلًا :"مش حتخسر حاجة لو انضميت لحملة مقاطعة الفراخ ولو اسبوع .. بس حتخسر كتير لو ساعدت التجار في جشعهم بانهم حيزودا الاسعار اكتر!".