اعتذار والله العظيم باقدم اعتذار واضح وضوح الشمس بعد الليل الطويل واضح زي النهار اعتذار بقلب الأم اللي اتكوي بالجرح وبالدم اللي نازل ده عار مابعده عار جت لهم خيبه الأمل راكبه جمل ايه العمل والحصان بيهرس كل شبر والحجارة بتتحدف سيول أمطار نقطة الدم اللي سالت من شباب زي القمر ولسه قادرين علي الصمود والإنتظار لازم أقدم اعتذار علموني ومش حاخبي ان انا اتعلمت منهم معني آخر للكرامة علموني أن أنا اللي كنت فاكرة ان هما مالهومش غير يعيشوا في حضن ماما كنت أأكل أو أشرب واجري وراهم بالبيجاما والعن الجيل اللي قاعد علي النت طول الوقت ومش بيعمل حاجة تدعو للكرامه وأنيم الشعر اللي واقف وأرفع البنطلون اللي ساقط وادعي واقول يارب السلامة ولما كنت أشيل اللاب توب من اديهم بعد ماناموا ولا اقول ذاكر ياواد مافيش فايدة دول شباب سيس ندامه لازم أقدم اعتذار للشهيد اللي كان طالع زي الفجر الوليد اللي قال اللي احنا ماقلنهوش اللي عايش رغم موته اللي قاهر السكوت اللي لامس كل حته ضايعه منا من كياننا اللي علم كل أب وأم منا والله إحنا مقلنالوش اي حاجة ولا قلنا يعني ايه كرامة شعب وسياده قلنا أسمع قلنا ذاكر قلنا أرجع قلنا كل حاجة تربطهم بحبل جنب مننا بس هما علمونا انهم جيل انتفاضه خرجوا بعد ضغوط بكل قوة وإراده لازم أقدم اعتذار