حبى ليكى جوه الفؤاد

ماذالت الأقلام مسنونه
وماذال المداد ممدود
وحبى لبلدى جوه الفؤاد
غربتنى وانا جواها
وأيه يعنى دى كانت متاهه
بكره لبلدى أعود
أعود بقلب صافى
أعود وأنا متعافى
لما تطلع شمس النهار
لما ينتهى ويرحل
ظلام الليل الممدود
بكره فى ليلك أسهر
من غير ما أخاف ولا أفكر
ف بكره
يا ترى هلاقى لقمه أفطر
ولا صيامى هيفضل كده ممدود
نفسى من قمحك آكل وأشبع
من غير آفات ولا سوس بترعرع
نفسى من نيلك أشرب وأرتع
من غير مخلفات أى مصنع
نفسى أنام من غير زوار
ولا ف الفجر ولا ف النهار
نفسى أعيش مرتاح البال
من غير ما أفكر ف العيال
بكره هيعملوا أيه
كل حاجه بقت نار
السكن غالى أسعاره ف تعالى
حتى اللقمه متغمزه بمرار
الواد رايح المدرسه
مش لاقى تخته كويسه
تسعين وأكتر ف الفصل يا شطار
يجيبوا منين الشطاره
والمنظومه كلها منهاره
حتى المدرس بينام ف النهار
طيب راحوا فين النظار
الله يرحم أيام زمان
لما كان الناظر مسك الزمام
ولا درس خصوصى ولا إستهتار
حتى الجامعه بقت خصوصى
مش عارف أحوش جنيه من فلوسى
للظروف يسند كفوفى
ولا أمد أيدى ولا أنهار
طال ليلك يا بلدى
إمتى يطلع النهار