زهقان .. قصيده بقلم مصطفى محمود أبو إبراهيم

زهقان ياربى من الكتابه
عن السياسه وفى الهوى
أصل البلد حالها عجب
والحق لسه محتجب
حتى النقاش من غير أدب
شفتو الأحبه كلهم
سابوا الهوى من يأسهم
صبحوا حزانى بحبهم
زهقان ياربى من الكتابه
عن السياسه وفى الهوى
ياما حكيت عن الأمل
وإن خلاص م المحتمل
مصر تعود راكبه جمل
زفه كبيره وتبأه ليله
والكل يدعى للأصيله
ويعود كمان الكل عيله
لكن يامصر مستحيله
طول مافيكِ لسه خميره
من اصول نظام جبان
أمتى هاقول آن الآوان
وأقول يامصر والله زماان
زهقان يارب من الحروف
ومن اللى قال لاء
ومن اللى خان!!!
وفينك ياصوت الحق
مالك كده منحاش
أصرخ بعلو الصوت
باعوا بلدنا بلاش
فينك ياصوت الحق
قرب هنا لينا
وتقول ياباطل لأ
إبعد عن خطاوينا
معقول تموت الأسود
وتتحكم كلاب فينا
وزهقان يابلدى
من كل شئ مابقاش
حتى الضمير أهو راح
ياخسارة راح ببلاش
الحبر خلص وخلاص
وحتى صوتى يابلدى
صبح منحاش