بيان من العسكر

طلع علينا بيان
من مجلس العسكر
يحكى كلام ألوان
إقراه وإتحسر
قالوا يامصريين
لازم كده نفكر
يوم 25 ده يوم
مش أكتر
والثوره إحنا اللى ليها
لا بنكدب ولانهزر
اللى هاينزل يثور
بيكون عميل أبتر
واللى يقول دى ثوره
دا كلامه بيكفر
واللى قتل مصر
راكب هليكوبتر
وفريق حكما بريمو
شوف كده المنظر
اوعاك تقول مخلوع
ده ريس العسكر
وولاده علاء وجمال
خلونى أتفكر
رايحين على المحكمه
ولا لصالة جيم
رايحين لمعلب تنس
وإحنا راكبنا الهم
وتعال شوف الأم
بتهدد وتتنغدر
ايوه يا ست سوزان
حامله كتير أسرار
بتكمل المنظر
هو يدوب إنذار
لمجلس العسكر
كارت بلون أحمر
جوزى مع الولاد
براءه بلون أخضر
وقد أعذر من أنذر
السر خوف أمريكا
مابالك العسكر
والكل صبح يامصر
تايه يقول يارب
مابين كدب باين
ولا حد عاجبه حد
قولى يامحكمه
حكمك هزار أو جد
حق بلا عنوان
بيكون أساسه كدب
قالوا عن الثوار
روحو بيوتهم
واللى فى الميدان
نخرب كمان بيتهم
اللعبه كانت جديده
والشعب صدقهم
والبلطجيه مين
هو اللى باعتيهم
الحكم جى من طره
بأمر جمالهم
إبكى ياشعب بأسى
خدعوك أسيادهم
إعلام إذاعة وتليفزيون
وكام فضائيه ليها عيون
طافوا فى مصر كده كام يوم
كله بيسأل عل اللى يهون
رد هريدى وعم حسين
كله يروح الا المحروسه
بلدى يامصر ياضى العين
ثوره وقامت ناس إتشالت
لكن باقى اللى يخون
شفنا بعينا الجو غيوم
كله سحاب كله هموم
نفسى الجو يمطر يوم
مطره تبرد نار مظلوم
تاخد الخاين واللى يلوم
وترجع بلدى ست الكون