في تعليقاتهم على الحد الأدنى للأجور

نشطاء للببلاوي: الناس تعبانة

حالة من الاستنكار والغضب سيطرت على مواقع التواصل الاجتماعي، بسبب تصريحات الدكتور حازم الببلاوي ، رئيس الوزراء حول تحديد مبلغ 800 جنيه ، كحد أدني للأجور ، مؤكدين أن هذا المبلغ لا يكفي سوى شراء الخبز فقط ، ولايتناسب مع مطالب الثورة ، التي من أهم مطالبها هي تحقيق العدالة الاجتماعية.
ومن أبرز التعليقات التي نشرت على الفيس بوك حول هذا الموضوع هي :
ولسه بتقول هييييييييييييييييييييييييييه تلاقى رئيس الوزار بيقولك "أعتقد أن مبلغ ال800 جنيه أنسب الأرقام المطروحة فى ضوء الظروف الاقتصادية الحالية " اه يانى ياما يااانى يااما .
مش هنقدر نطبق الحد الأدنى للأجور عشان الميزانية وأما الميزانيه مقصرة معاك ما تطبق الحد الأقصى للأجور طيب ياخويا!
السؤال هنا للببلاوى: راجل عامل فقير هيكافيه 800 فى الشهر هو ومراته وعياله ، ارحمنا ياببلاوى العمال غلابه0
يا راجل !!! انت عارف كويس قوى إن بالنسبة للحكومة ال 800 جنيه بتوعك دول تشمل المرتب والحوافز ...يعنى كلام فارغ... من الواضح كده إنها كدبة كبيرة قوى وإننا هناخد على قفانا من حكومة الببلاوى بيه.
الولادة متعسره والبيبي هيتولد عجوز وعلي ما يوافقوا حيكون الحد الأدني لا يكفي حتي ثمن الخبز.
خدهم انت واصرف وشوف مناسب ولا لا ده انتوا عالم بتستهبل
ماهو لما رئيس الحكومه داخل ع التمانين سنه وشايف إن ال 800 جنيه دول حلوين أوى.. يبقى هو فاكر نفسه فى حكومه الملك فاروق.. أياميها كانت حاجه رهيبه ....آدى آخرة الحكومات اللى فى سن الضياع.
مين اللي اقترح فكرة حد أدني 800 إلي 1000 عشان أروح اقتله ,, فكرة إيه دي نكسه.
لا بد أن يفهم الجميع بأن مبلغ 800 جنيه إيجار شقة فى أحد الحوارى فى شبرا الخيمة ... طيب الحكومة هتدفع الإيجار ناكل ونشرب منين
حرام ... حرام .. ( الناس تعبانة ) لا يجب ألا يقل الحد الأدنى للأجور والمعاشات عن 1200 جنيه.