فيديو....

السائقون يتمردون على مرسي بعد تجدد أزمة السولار

تجددت أزمة نقص البنزين والسولار مرة أخرى بالقاهرة والمحافظات وعاد مشهد طوابير السيارات أمام المحطات.
رصدت بوابة الوفد آراء السائقين بإحدى محطات البنزين في الدقى حول الأزمة وأسبابها.
قال عمر- سائق ميكروباص على خط "القاهرة - بني سويف -": "أنا واقف من الساعة 3 العصر أمام محطة البنزين، علشان أموّن سولار ولفيت علي أكتر من 6محطات بنزين ما لقيتش سولار لغاية ما الجاز اللي في العربية خلص".
وتابع "ده شيء ما يرضيش ربنا أبدا ....ده إحنا لو كفرة ما يتعملش فينا كده....ده الأجنبي فى مصر عايش أحسن مننا وبيدخل أي بنزينة يمون بنزين 95 ف ثواني وهو حاطط رجل علي رجل ...لكن إحنا نتلطع اللطعة دي وندوخ السبع دوخات علي شوية سولار نشتغل بيهم... معايا ربنا لحد ما ألاقي سولار وأنا بايت في العربية لحد ما أموّن" .
وأضاف "م . أ " سائق ميكروباص، "أنا مش عارف إيه سبب الأزمة دي ونفسنا نعرف إيه السبب....أيام المجلس العسكري كانوا بيقولوا الجاز بيترمي في الصحراء ودلوقتي الوزير باسم عودة اختفي ومش باين خالص بعد ما كان كل يوم صورته في الجرائد وكل يوم بيلف علي البنزينات"، مشيرا إلى أنه يعانى من هذه الأزمة يوميا ويظل منتظر أمام محطة البنزين حتى الفجر.
وتابع "لو حاولت أجيب سولار من السوق السودا بتلاقيه بجنيه ونص واتنين وأحيانا ثلاثة جنيه"، متسائلا: "لو مونت اللتر باتنين جنيه أعيش أنا منين؟".
أما "هاني" سائق ميكروباص علي خط "الإسكندرية – القاهرة" فأكد أن سبب الأزمة هو عدم وجود رقابة على الإسواق والغياب التام لإجهزة الدولة، مشير إلى أن العمال بمحطات البنزين رفعوا "الأكرامية" التى كانوا يأخذونها من السائقين من جنيه أو 2 إلى أكثر من عشرة جنيه، وتساءل "على حساب مين ده؟".
وقال"محمد" سائق سيارة نقل "من ساعة ما الإخوان مسكوا الحكم وإحنا مش عارفين البلد رايحة علي فين... من أزمة لأزمة ومن مشكلة إلى مشكلة أكبر...الإخوان دول بتوع كلام وبس".
وأضاف "انا بقالي أكتر من 3 أيام بايت في الشارع مش عارف أشوف ولادي ولا مراتي، ولا عارف أطمن عليهم والسبب في كل ده هو الإخوان ومحمد مرسى.....في المثل القديم كان بيقول ( ادي العيش لخبازه ولو هيأكل نصفه)... والإخوان مش خبازين دول بتوع كشري".
وأكد أحد العمال بمحطة البنزين أن هناك أزمة في السولار والبنزين منذ أكثر من أسبوع، مشيرا إلى إن ما يتم إرساله لهم هو سيارة سولار واحدة والكمية تنتهي في ساعة زمن، مضيفا "الناس ممكن تبات في عربياتهم علشان يموّنوا سولار بس مفيش حاجة في ايدي".
من ناحية أخرى وقع عدد من السائقين علي استمارة حملة تمرد لسحب الثقة من الرئيس مرسي يوم 30 يونيه القادم أثناء وقوفهم في طابور السيارات أمام محطة البنزين.
شاهد الفيديو: