طارق الجنايني: suits بالعربي أول مسلسل عربي توزعه شركة nbcu العالمية بداية من سبتمبر القادم

أعلن المنتج طارق الجنايني أن شركة nbcu العالمية قد إختارت مسلسله suits بالعربي ليصبح أول مسلسل ناطق بالعربية من توزيعها وستبدأ وضعه في كاتالوجاتها بداية من شهر سبتمبر القادم.
اقرأ أيضاً..
مسلسل سوتس بالعربي حلقة 5| أحمد داود يكتشف ثغرات في عقود زين ثابت
وكان الجنايني قد كتب عبر صفحته الشخصية على موقع التواصل الاجتماعي الفيس بوك قائلا " بوست طويل شوية مع أنتهاء الحلقة الرابعة من سوتس بالعربي، الحمدلله في منتهى السعادة بردود الفعل المحبة للمسلسل..
والصراحة عندي كام نقطة كدة كنت عايز أوضحهم من أول ما أعلنت عن تصوير سوتس بالعربي، بس كنت خايف تتفهم غلط..
بس النهاردة بعد ما الحمدلله المسلسل أثبت نجاحه و الناس بتشييد بيه في العالم العربي كله، أقدر بقى أوضح براحتي..
1-كل صناع سوتس بالعربي من عشاق النسخة الأمريكي، اللي على فكرة تكلفة الحلقة الواحدة منها بأكثر من تكلفة ال30 حلقة عندنا.. و كلنا فاهمين من الأول أنك تعمل adaptation لمسلسل معروف و محبوب زي سوتس مش هتكون خطوة سهلة خالص و الdie hard fans اللي إحنا أصلاً منهم مش هيتقبلوها بسهولة..
2- اللي أتفرج على سوتس الأمريكي في العالم
العربي ما بين مليون لأثنين مليون بالكتير.. بس العالم العربي حوالي 350 مليون، يعني في 348 مليون عربي ماتفرجوش على النسخة الأمريكي لسبب أو لأخر و دول الحمدلله معظم اللي أتفرج منهم على النسخة العربي معجبين جداً بكل تفاصيل المسلسل..
3- علشان أنت شاري فورمات و دافع فلوسه و معاك حقوقه، فهما كمان عندهم حقوق أنك ماتبوظش شغلهم و تفتي من دماغك، علشان كدة لازم يكون تغييرات السيناريو في أضيق الحدود و بموافقتهم، بما فيها الأسم اللي بيعامل معاملة البراند..
و ده اللي حصل مع الأمريكان نفسهم لما أشتروا حقوق the office مثلاً من أنجلترا و أمثلة تانية كتيرة في التليفزيون و السينما..
4- الناس اللي بتتعامل على أن هارڤي و مايك و دونا و لويس و چسيكا و راتشيل ولاد خالتهم أو من الرسل اللي حرام يجسدوا على الشاشات العربية، أحب أوضحلهم أن الcreators بتوع سوتس الأمريكي منبهرين باللي إحنا عاملينه و حابين الكاست بتاعنا جدااا و
شايفين أن ديكورنا و صورتنا أحلى من بتاعتهم و ده عندي في إيميل موثق منهم..
5- طبيعي أنك تتفرج على الحلقة الأولى و تحس أن المسلسل ده مش ليك فا تعبر عن رأيك و و ده حقك تماماً بس غريبة شوية أن حضرتك لسة بتتفرج لغاية الحلقة الرابعة علشان تكتب بعد كل حلقة أن الأمريكي أحلى برضه، أنا حاسس أنك أتعودت علينا بس خايف تعترف.
6- الأهم بقى من كل اللي فات ده و السبب الرئيسي لكتابة البوست ده، أن بعد مشاهدتهم لأول 10 حلقات، تم الأتفاق مع NBCU أن النسخة العربية من سوتس دلوقتي داخلة الكتالوج الرسمي بتاع NBCU و هتبتدي تتوزع للعالم كله من شهر سبتمبر.
أنت فاهم الفخر اللي إحنا فيه أن لأول مرة مسلسل عربي هيتم توزيعه من شركة زي NBCU؟
أنت فاهم ده قد ايه مهم و مفيد لمصر؟
الخطوة دي بقى بالنسبة ليا أنا شخصياً تكفيني لسنين قدام..
#سوتس_بالعربي.
العمل يتواصل عرضه يوميا في رمضان على شبكة OSN وتطبيقها OSN Streaming وقناة CBC وتطبيق Watchit.
يُشار إلى أن الجنايني قد حصل على الحقوق القانونية لتقديم النسخة العربية من المسلسل الأمريكي الشهيرSuits، الذي تم تصنيفه ضمن أفضل وأنجح عشرة مسلسلات أمريكية على مدار ال20 عاماً الماضية.
ويلعب بطولته النجوم آسر ياسين، أحمد داود، صبا مبارك، ريم مصطفى، محمد شاهين وتارا عماد.ويخرجه عصام عبد الحميد ويكتبه محمد حفظي وياسر عبد المجيد.
لمزيد من اخبار الفن على بوابة الوفد اضغط هنا