إكرامى: أنا ضعيف قصاد الأهلي ولم أعلم برحيل رمضان صبحي

قال الكابتن إكرامي الشحات، حارس مرمى النادي الأهلى ومنتخب مصر الأسبق، الملقب بوحش إفريقيا، إنه مدير فني لمدربى حراس المرمى في قطاع الناشئين في النادي الأهلي، ويذهب يوميا إلى النادي للممارسة عمله.
وأضاف إكرامي خلال حواره مع الإعلامي معتز الدمرداش ببرنامج "90 دقيقة" المذاع على شاشة "المحور"، أنه لم يكن يعلم بانتقال رمضان صبحي إلى بيراميدز، موضحًا: "أنا لا أعلم أي شىء عن موضوع انتقال رمضان صبحي من البداية، ورمضان أو شريف ميقدروش يرجعولي في حاجة زي دي لأنهم عارفين أني ضعيف قصاد النادي الأهلي وهعترض على انتقالهم لأي
فريق أخر، شريف قعد مع فايلر وقاله أنه هيمشي، وقاله أنا موجود وبتمرن لو عاوزني أنا موجود، وشريف كان واضح مع الراجل جدا".
وقال: "شريف مقاليش أي حاجة عن أنه هيسيب النادي الأهلي، حتى لما جدد للأهلي مقاليش، بيقولي بعد ما بيعمل كده، شريف له شخصيته المستقلة وأنا بحترم تفكيره وقراراته، ممكن نختلف أنا وهو، ونتكلم ونشد مع بعض وفي النهاية يا بيقنعني يا بقنعه، وإحنا متعودين أنه ياخد قراره بشكل منفرد".
وأضاف: "أنا شوفت صورة رمضان صبحي أول أمبارح بقميص بيراميدز بعد تصوير إعلان انتقاله، تاني يوم شريف بيقولي صورة رمضان اتسربت وعرفت ساعتها أنه مضى، وقبلها بأسبوعين مسئول في النادي الأهلي كلمني وقالي رمضان هيروح بيراميدز رديت قولتله أنا معرفش حاجة عن القصة دي، ورمضان جاله عروض كتير من أوروبا وأمريكا، لكن هو ده كان اختياره".
وتابع: "الأهلي ده أهلي وبيتي، هل معقول أن واحد يتخلى عن أهله وبيته بسبب موقف معين، والله العظيم تلاتة أنا معرفش أدخل على المواقع اللي بيدخلوا يشتموني عليها، وأقصى حاجة ممكن أعملها أني أرد عالتلفون وأتصل، لكن أنا بسمع التجريح وفي ناس بيقابلوني في الشارع بيقولولي متزعلش من الكلام ده، وبقولهم مبيفرقش معايا، أنا هرم والكلام ده ميهزش شعرة من راسى".