شباك علي الثورة

وسط الكآبة والرتابة

البطل السجين محمود سعيد المضرب عن الطعام والشراب وباقي الأبطال المضربين في سجون العسكر من الثوار.
***
بسم الإله
والشعب رب المضربين
الصايم المحروم
علي مر السنين
يامنشدين الحي
حيوا حينا
واحنا هنا
ع العهد دايما مخلصين
***
محلا القصايد في الشدايد
والغنا
محلا كلام الحب أوقات الشقا
احنا اللي تهنا ع الطريق من بعضنا
متفرقين والسجن هو الملتقي
آه يارفاق من متاهات الطريق
لما الليالي بينسرق منها السنا
يمشي الصديق في الضلمة
يخبط في الصديق
والسكة بنت الخطوتين
تاخد سنة
**
احنا النهارده فين وكام
وبكره كام وبعده فين؟
في كل يوم بنزور مكان
وكل يوم بنزيل سدد
وكل يوم نفتح بيبان
وكل يوم نقفل باب
وكل يوم نطلع بنا
وكل يوم ينزل هدد
وكل يوم نحبل غنا
وكل يوم نولد مدد
جوه السجون برا السجون
احنا كده لازم نكون
***
محلا القصايد في الشدايد والغنا
محلا الميدان الخضر في الربع الخراب
إحنا اللي تهنا ع الطريق من بعضنا
متجمعين بنخط صفحة من الكتاب
ملعونة قامة تنحني بالقهر
من حاكم. وخان
ملعونة كلمة تنتني من الحلق
تهرب م اللسان
ملعونة
ساعة
تنحسب م العمر يطويها الخنوع
ملعونة لقمة مغمسة بالذل
ملعون الجبان
آه يارفاقه ياللي علمتوا الصلابة للحجر
بانده لكم وسط الكآبة والرتابة والضجر
يا مقربين الفجر نوره ومطلعه
مدوا المسامع في المجامع واسمعوا
صرخة مغني الحي من جوفص العدم
اتجمعوا
اتجمعوا
اتجمعوا