الأقوال المستباحة في النقد والصراحة

إلي المحترم عمرو موسي المرشح لرياسة الجمهورية

إلي المحترم عمرو موسي المرشح لرياسة الجمهورية
احلف بشرف شمشون ودليلة
انت الوحيد
اللي تنفع تشيل الشيلة
التقيلة
لمدة أربع سنين
وتسلمها لشباب العيلة..!!
إلي الضابط محمد الشناوي قناص عيون الثوار
نشنت يا فالح
يا ويلك من ربنا
مش حيسامح..!!
وياويلك من الزمن
من هنا ورايح..!!
إلي الشيخ السلفي حسن أبوالأشبال
آخر كلام
قالهولي الحاج عبدالسلام
مصر مبتهنش إلا علي ولاد الحرام..!!
إلي المرشحين لرياسة الجمهورية كلهم
ساركوزي بارك لأولاند
بعد فوزه في الانتخابات الفرنسية
شفتو الأخلاق
والروح الديمقراطية
ياريت نتعلم شويه..!!
إلي خادم الحرمين الشريفين الملك عبدالله بن عبدالعزيز
يا ملك الأخوة والأحبة
يدوم الصلح والسماح والمحبة..!!
إلي المشير محمد حسين طنطاوي رئيس المجلس العسكري الحاكم
بيقولوا في البلد يابو خالو
لا اللي حينجح حيتهني بنجاحه
ويرتاح باله
ولا اللي حيسقط حيسكت
ويسيب اللي نجح يستلم
البلد ويشوف حالو..!!
ربنا يستر..!!
إلي الخواجة مانويل جوزيه المدير الفني للنادي الأهلي
لك حق تعمل أكثر من كده
لو كان صالح سليم موجود
في العصر ده
مكنش سابك تتحكم في النادي الأهلي
بالشكل ده..!!
إلي رجل الأعمال اللي كان هربان حسين سالم
ما طار طير وخلع
الا كما خلع وقع.. ورجع..!!
إلي المهندس حمادة سلطان وزارة الإسكان
اللي يحارب المفسدين
المحبوسين
وأقطاب الفساد
ربنا يبارك له في صحته
وف لقمته والمدام والأولاد..!!
إلي الدكتورة نعمات أحمد فؤاد
يا بنت الحلال
علشان قلمك الجرىء
في كل مجال
احبابك بيدعولك
بالصحة وراحة البال
والانتصار علي كل الأحوال..!!
إلي الدكتور عبدالمنعم أبوالفتوح المرشح اللي استقال من الجماعة
تحلف لنا نصدقك نقرا تاريخك
ونقول كلام رجاله..
طب لو بقيت رئيس
فيا تري يا هلتري حتسحب الاستقالة..!!
إلي العظيمة ميلدا حسن فهمي
يا تري انتي فين يا ميلدا
وحشتينا ايه اخبارك
ياللي القمر جارك
اقصد نجمة مصر
ونجمة فرقة رضا في عصرها الذهبي
العزيزة علينا الفنانة فريدة فهمي..!!
إلي وزير الإعلام المناضل أحمد أنيس
مبروك الانضباط
الإعلاميين آخر انبساط
لأن حضرتك قدرت بذكاء
ووعي إعلامي
تمشي المراكب ع البلاط..!!
إلي رجل الأعمال محسن جابر صاحب عالم الفن وقنوات مزيكا
عايز تدخل الجنة من غير حساب..
ارجع لجمعية المؤلفين وصفي الحساب..
وساهم في معاش الغلابة ينوبك ثواب..!!
إلي كابتن شيكابالا نادي الزمالك
بيقولك المعلم خليل
مهما كنت لعيب حريف وجميل
تصرفاتك يا أسواني يا أصيل
بتأكد لنا ان عمرك في الملاعب
مش طويل..!!
---
لبخيت بن بيومي صاحب المساحة