عاوز من الريس..(!)

عم صلاح بائع المناديل : عاوز من الرئيس حياة كريمة

عم صلاح: عاوز رئيس يعيشنا عيشة كريمة لأن معظم الشعب المصرى لا يعرف العيشة الكريمة يسمع عنها فى تصريحات المسئولين فقط ولا يراها على أرض الواقع!!،
سألته هتنتخب مين؟ قال: عمرو موسى لأنه الأصلح خارجياً وداخلياً لمصر علاقاته الخارجية هتخرج مصر من اللى هى فيه، قوة شخصيته هتخليه يقدر على البلطجية اللى مسيطرين على مصر الآن.
ويطلب منه أن يجد الحياة الكريمة بدل البهدلة فى نهاية عمره ويطالبه بالاهتمام بكبار السن الأرزقية الذين ليس لهم عمل ولا معاش فقد كان يعمل «فواعلى» منذ أن جاء من سوهاج منذ 40 عاماً وتزوج وأنجب 3 أولاد تزوج الأولاد وماتت الزوجة ولم يعد قادراً على العمل كفواعلى يحمل الزلط الرمل والأسمنت، فاضطر إلى بيع المناديل والكبريت حتى يجد قوت يومه.. معاش السادات ومبارك لم يصل له حتى الآن لأن عمره 62 عاماً ولا يحصل على المعاش إلا بعد سن 65 عاماً.
وقال لعمرو موسى مش عاوز أتبهدل فى آخر عملى.. أنا طلعونى من مستشفى الرمد علشان ليس معى 1200 جنيه لزوم عملية المياه البيضاء وقرارات العلاج على نفقة الدولة للمحظوظين فقط.. علشان كده لازم يخلى باله من صحة المصريين الغلابة اللى مش عندهم فلوس يصرفوا على صحتهم بعد ماتضيع
يطلب من مرشحى الرئاسة يتعاونوا من أجل مصر وبلاش يشتموا فى بعض علشان ده صورة مصر أمام العالم كله.
محمد بائع متجول: شقة وشغل
محمد حسين قالها بوضوح: عاوز من الرئيس القادم شقة وعمل علشان دول حقه على البلد والمفروض رئيس البلد يوفر للمواطنين ذلك.. وقال: صراحة لم يعد لديه ثقة فى أى رئيس ولا أى مرشح كنا بنسمع تصريحات من الرئيس السابق «30 سنة» وكان بينجح ولم نجد شيئاً، وبرده المرشحين الموجودين الآن بيقولوا كلام، مجرد كلام. وهل بعدما يجلس على الكرسى هينفذ والله أعلم؟!
ولم يترك لى فرصة لأسأله، وأضاف: أنا عاوز شقة علشان تعبت جداً من ال450 جنيه الإيجار الحديث وأنا حاصل على دبلوم صنايع من 10 سنوات ولم أجد فرصة عمل فاشتغلت بائعاً متجولاً حتى حلم الشقة لم أحصل عليه حتى الآن، رغم أننى متزوج ولى 3 أولاد فى التعليم الأساسى نزلنا الثورة علشان نلاقى شغل وسكن فلم نجد إلا أصحاب المصالح اللى عاوزين ياخدوا التورتة كلها ولا يتركوا للشعب أى حاجة!
عاوزين رئيس يشتغل للشعب مش يشتغل على الشعب، عاوزين نعيش، إمتى هنعيش لما نعمل ثورة بعد 60 سنة كمان!!