قالت همت مصطفى، والدة الطفل أحمد منصور المحكوم عليه بالمؤبد، أثناء مداخلة مع الإعلامي وائل الإبراشي، في برنامج "العاشرة مساءً"، المُذاع على فضائية "دريم"، أن الشرطة جاءت في حملة إلي منزلها في اللحظة التي يستضيف فيها الإبراشي زوجها وابنها. وتابعت "الشرطة جت في الفاصل وسألوا على ابني ووالده، وقولتلهم مع الاستاذ وائل، قالولي هو وائل ده مبيرحمش؟، ومشيوا من نص ساعة، وزوجي مش لاقي مكان يقعد فيه". وعلق الإبراشي على كلامها قائلًا "مبيحرمش ده هو اللي يرحم يعمل تحريات، ده هو اللي متلبس بفضيحة، هو اللي لازم يخجل، الناس دي والله لازم تخجل لما يدوروا على طفل عنده 4 سنين، ووقت الاحداث كان عنده سنتين، وتنفذ عليه حكم، دي فضيحة وكارثة، ويتعمل حملة على الطفل ووالده إي عار ممكن يلاحقنا أكتر من كده". وأنهار والد الطفل بالبكاء بعد سماع المداخلة على الهواء قائلًا "أنا غلبان ومش عاوز أزعل حد، أنا مليش ذنب والله ومش عاوز حد ياخد ابني مني، متسيبنيش يارب والنبي". وقال الإبراشي "اطمن اللي ياخد ابنك منك موصوم بالعار، ويظل هذا العار يلاحقه، وهذا إعادة لدولة الخوف من جديد".