عايش علشانك

من صغرى وانا عايش فيكى
بجرى اتنطط فى حواريكى
متشعبط متعلق فى أحضانك
ماسك ومتبت فى ايديكى
لا هسيبك يوم تمشى
ولا عنك هرحل وامشى
راضى بحالى متعلق بيكى
خايف من عيون سعرانة
تنهش تسرق فيكى
جهزت سلاحى
آمال !!!
سلاحى
روحى تفديكى
هوة انتى يا غالية
روحى تغلا عليكى
طب شوفى كده
هاتى عينى فى عنيكى
هاتى راسك على صدرى
وارتاحى واسمعى قلبى
بينادى عليكى
بيقول بحبك
وحبك اسمىَ ما فى فيا
بحبك
و حبى من برد الخوف يكفيكى
قالوا عنك
الفقر ماليكى
وخراب ودمار عَم عليكى
وفساد وبلاد غيرانة منك
تعاديكى
قالوا يلا الحق
اخرج اهرب
مستنى ايه تانى
مش كفاية بلاويكى
غضب قلبى ....دمعت عينى
وخرج منى صوت غضب مالينى
عن نغمة شوق فى موال
بقاله ليالى فى منامى يجينى
دا حبيبتى السمرة نور عينى
الأيادى الطاهرة تحمينى
جنود وعمال
وفلاح من الفجر
عزف فاسه كام موال
اه يا ليلى يا عينى
شق بضرب الفاس خط
كما التلميذ ف الكراس
خط الف باء
من يوم ما عيشنا فيكى
ما شوفنا منك غير الوفاء
وزغروطة من قلب الفرحة ملياه
لعروسة فى ليلة الدخلة
عريسها الفرحة مش سايعاه
قصة حب جميلة عاش
ياما صورتها فى عيونه شغلاه
ولمة حلوة وكام غنوة
وطفلة بترقص جمب اختها القمراية
وعيونها على الواد الى عاشقاه
أه يا ليلى يا عينى
هنعيشك فى مدارس
تلميذ راسمك علم فى الكراسة
راسم أمل شمس بتضحك
سهرانة ويا القمر
وردية حراسة
هنعيشك مدارس
طبيب على أروحنا حارس
وأم تراعى وتربى
وأب فى شغله يراعى ربه
وربنا هوة الحارس
وشباب على امل عايش
بيحفر يدور ...يعافر ..يتارس
واليأس لو ليه مليون ناب وحارس
أرواحنا تصير له مدافع ومتارس
حكايتى معاكى غريبة
عشق من حالة عجيبة
نشوة فرح على نغمةشجن كئيبة
كل ما ما زادت الامك وجراحك
زادت ملمحة عشقك وهيامك
و سيفنة اشواقى وغرامى
فردت شراعها فى بحر أحلامك
ترسم أمل وتقول
أنا عايش علشانك