بالتحديد رمضان كريم يا أهل كايرو

* أول الكلام.. قل لن يصيبنا إلا ما كتب الله لنا هو مولانا وعلي الله فليتوكل المؤمنون.. صدق الله العظيم
* أداء منتخب الشباب حاجة تفرح.. شباب زي الفل والورد.. أداء أكثر من رائع.. شيء جميل ياريت تكمل الصورة فجر الجمعة أمام النمسا.. المهم الدور الثاني.. الفرصة أمامكم لتكرار إنجاز برونزنة ..2001 فاكرينها.. من عشر سنين.
* منتخب شباب السعودية أمامه مهمة ليست صعبة أمام جواتيمالا.. لو فاز فيها لصعد للدور الثاني وهو علي قمة المجموعة.. يارب.
* مطلوب تفسير فيما يحدث في مجلس الزمالك.. إيه الحكاية.. هو مكتوب علي النادي وجماهيره الوفية قلة الراحة يا عالم.. يا هوو.. ارحمونا.. بالمناسبة.. هي المئوية أخبارها إيه. مش محتاجين.. مسحراتي.. اصحي يانايم.. وحد الدايم.. وحد الرزاق.. رمضان كريم.
* هو مافيش نهاية لأزمة الإسماعيلي.. إيه الحكاية.. الموضوع زاد قوي.. والأيام بتجري.. كان لازم المحافظ يتدخل.. يا أبناء الإسماعيلية الشرفاء.. الأوفياء.. تكاتفوا من أجل ناديكم.. قبل الانهيار.. ارحموا جماهيركم العظيمة.
* حتي المصري.. المحافظ بيدعم الاستقرار.. أمال فين قرار المد لمجلس الإدارة.. كامل أبو علي لو مشي.. قولوا علي المصري السلام مش كده ولا إيه.
* أخيراً وليد سليمان صام.. وفطر في الأهلي ب 8 ملايين جنيه لإنبي والله يا بلاش.. أمال إيه حكاية 15 مليوناً.. و12 و10 وهي أرقام في الهوا ولا إيه.
* يا كابتن حسن.. يا معلم.. لازم تكون حافظ مجلس إدارة عن ظهر قلب.. ربنا معاك أنا عارف أنك ح تتعب معاهم لكن أنت الكبير.
* اللواء إبراهيم مجاهد.. الكابتن حسن فريد يا رئيس نادي أسوان.. أقترح تروحوا تعتصموا في اتحاد الكرة مع الكابتن سمير زاهر يمكن تصعب عليه جماهيركم.. فيها إيه الدوري يكون 22 نادياً أو حتي 24 من مجموعتين.. هي بدعة ولا إيه.. يا جماعة فين المادة ..18 فين بلاتر.. فين الفيفا.. رمضان كريم.
* في سؤال محيرني.. عاوز إجابة عليه.. من مين.. معرفش.. هل استعد اتحاد الكرة جيدا لدوري المحترفين.. ولا منتظرين وقت الزنقة أو الوقت الضائع للتحرك.. هي عادة ولا ح نشتريها في سؤال ثاني معلش علشان خاطري.. الأندية بتاعة المادة 18 ساكتين ليه.. قاعدين ليه.. ما تقوموا تروحوا.. أندية الشركات والهيئات زادت بعد صعود الداخلية.. يعني أندية بلا جماهير.. تحل بدلا منها الأندية الجماهيرية.. يعني خسارة مزدوجة.
* اللواء محمود أحمد علي رئيس اللجنة الأوليمبية المصرية عليك أعباء جسام.. ان لم تتحرك الآن لإنقاذ الرياضة المصرية أثناء الفترة الانتقالية لاستمرار الكابتن حسن صقر في منصبه من عدمه.. ستنهار الرياضة كلها.. والدليل علي ذلك ما يحدث في اتحاد المصارعة.. وغيره ربنا يستر عليها.
* آخر الكلام.. "وان يمسسك الله بضرر فلا كاشف له إلا هو وأن يردك بخير فلا راد لفضله يصيب به من يشاء من عباده وهو الغفور الرحيم".