بالصور.. رضوى جلال تخرج عن صمتها: أنا مش نصابة

خرجت رضوى جلال مؤسسة شركة "مليكة" للأزياء عن صمتها فترة طويلة عقب اتهامها بالنصب والاحتيال باسم شركتها واسم زوجها الداعية الاسلامي احمد الجبلى الذي توفاه الله منذ فترة وكان له تاثير تفاعل قوى عبر مواقع التواصل الاجتماعي الفيس بوك.

وكان مجموعة من أصحاب فروع الشركة في عدد من المحافظات اتهموا رضوى بالاحتيال عليهم وخداعهم عن طريق الحصول على أموالهم بحجة استثمارها وتوريد بضاعة ولكنها لم ترد هذه المبالغ وسافرت للخارج.

وردت رضوى عبر صفحتها الجديدة على موقع "فيسبوك" على الاتهامات المنسوبة ضدها قائلة: "آسفة على اختفائي وصمتي الفترة الأخيرة.. والسبب الأساسي أن فيه حد اخترق حسابي الشخصي والصفحة الشخصية وصفحة مليكة.. وخلال ما كنت بحاول أرجعهم لقيت الموضوع كبير قوي.. فقعدت بس شوية أخد نفسي وأرتب أفكاري".

أما عن اتهامها بالنصب، فقالت رضوى: "كلمة نصابة دي أنا أعترض عليها فعلا.. الشخص النصاب هو اللي هدفه إنه ياخد حاجة مش حقه عن طريق التلاعب بالناس.. ولكن أنا أشهد الله إني دايمًا كان هدفي إني أعمل بيزنس محترم".

وأضافت: "أنا فعلا كنت باخد فلوس كاستثمار.. بس واضح إن خبرتي كانت أقل بكتير من تحمل العمل في هذه المشاريع بالفلوس الكتير دي.. فالموضوع هو سوء إدارة وقلة خبرة مش نصب.. وده مش تبرير أبدا للي حصل.. هو مجرد وضع الأمور في مكانها الصحيح".

ونفت رضوى ما تردد حول هروبها بمبالغ ضخمة وصلت إلى 15 مليون و20 مليون، قائلة: "حجم ديوني المستحقة دلوقتي لا يصل للرقم اللي بيتقال.. علشان بس المبالغات اللي وصلت المبلغ ل15 مليون و20 مليون جنيه.. ده كلام غير صحيح بالمرة".

وعلى الرغم من الاتهامات العديدة التي وجهت إلى رضوى بالاحتيال والنصب، فقالت: "لو هنتكلم عن النصب فأنا فعلا اللي اتنصب عليا.. وفكر في واحدة بنت لوحدها في سوق يحكمه النهب والنصب والكذب والخداع"، وأضافت: أنا لحد آخر لحظة كنت بحاول أنقذ الشركة.. وحاولت أعمل شركة تانية بحيث يشيلوا بعض... بس للأسف لقلة خبرتي اتضحك عليا برضه في كتير من الأمور".

أما عن سبب سفرها إلى الخارج، أوضحت رضوى: "أصحاب الديون ابتدوا يطالبوا بالسداد وتعذر الوصول معهم لأي اتفاق لتأجيل السداد"، وتابعت: "هنا كان عندي حل من اتنين.. يا إما هفضل قاعدة في مصر وحتسجن أو حد هيعتدي عليا أنا وابني زي ماحصل قبل كده.. يا إما أسيب البلد وأطلع أعيد حساباتي وأحاول تاني".

ووعدت رضوى المتضررين من الاستثمار معها وعدم سدادها لديونها بحل الأزمة قائلة: "في رقبتي الديون اللي عليا إني لازم أسددها إن شاء الله في أقرب وقت ممكن.. وهشتغل في سبيل تحقيق ده بكل قوتي بإذن الله".