نرصد كافة "القفشات" التي قيلت عن خسارة الزمالك

أستطاع فريق الاهلي الفوز على فريق الزمالك بهدفين مقابل لا شئ احرزهما مؤمن زكريا في المباراة التي أقيمت بين الفريقين مساء أمس.
وعقب إنتهاء المباراة أشتعلت مواقع التواصل الاجتماعي بالسخرية من نتيجة المباراة وبخاصة بعد الشد العصبي والآمال التي داعبت أنصار الفريق الابيض بالتتويج ببطولة الدوري من خلال مباراة الاهلي عن طريق الفوز أو التعادل .
وشارك في السخرية من النتيجة عدد من المشاهير وغير المشاهير الذين ابتكروا "القفشات" و "الكوميكات" للتعبير عن رأيهم في المباراة .
وفيما يلي رصد لأهم القفشات الساخرة التي قيلت عن خسارة الزمالك :
- منع رمضان صبحي من الظهور على التليفزيون المصري بعد قيامه بأفعال لا تتناسب مع تقاليد الاسرة المصرية على الهواء مباشرة "في إشارة إلى وقوف رمضان صبحي على الكرة" .
- يا جماعة أنا لقيت شوية عيال شكلهم غلابة أوي لابسين أبيض وشكلهم تايهين، شير يمكن نعرف نوصل لأهلهم بسرعة.
- بيقوولك أكرامى فتح فيس و هوو واقف ف الجوون و كتب "أشعر بالوحدة" .
- فيما روى طبيب على الفيس بوك قصة طريقة قائلاً: دكتور استشاري كبير , زمالكاوي متعصب , قاعد قدامي في سكن الدكاترة , عينه حمرة بتطق شرار , وفاضله تكة ويبدأ يضرب بيسة أو يعض بلاط المستشفى , شرب سيجارتين ورا بعض وهدي شوية , وقالي: إيه يبني ؟ عادي المؤمن دايماً مصاب .. فقلتله : المؤمن دايماً "زكريا" .. فقلع الجزمة وجري ورايا.
- اخر مرة فاز فيها الزمالك على الاهلي كانت أيام "شحاتة ابو كف"
- الزمالك نزل عنده ( لهفة ) للفوز .. بس فتحي مبروك طلع (أستاذ ورئيس قسم ) .. ولعب (لعبة إبليس ) .. فاستمر ( سلسال الدم ) .. وباسم طول الماتش ( ذهاب وعودة ) .. فخلى مؤمن ( مولانا العاشق ) للأهداف .. والأهلي ( واكل الجو )
فالزمالك حصل عنده (هبوط اضطراري ) .. وكل سنة وانتم طيبين و رمضان صبحي قصدي رمضان كريم .
- الفرق بين الاهلي والزمالك , ان الاهلي ممكن يخسر بطولة بس يهدي جمهوره السعادة .. اما الزمالك يكسب بطول وينكد على جمهوره برضو .
- انا عايز كل زملكاوى كده يبقى "مؤمن" ‬ وميزعلش دا احنا لسه خارجين من "رمضان" .. انا عارف ان الماتش كان "متعب" عليكوا بس خلينا كدة "نجيب" ‬ الماضى كله هتلاقى نفسك كنت خسران مش حاجه جديده يعنى النهارده فوز الاهلى كان فوز "شريف" وكان فوز "غالي" ‬ علينا و "مبروك" للكل الاهلاوية.
أما المشاهير فعلقوا أيضاً على النتيجة بالسخرية أو بالجدية او الاثنين سواء .. نرصدها كالتالي:
- الكاتب الصحفي تامر أبو عرب: قالك احنا فريق بطولات مش فريق ماتشات .. ياعم اتكسف علي دمك ده حسام عاشور معاه بطولات قد ناديك كله.
- مش عيب اللي عملته ده يارمضان؟
* أنا كنت بنفذ تعليماتك يا كابتن
- ازاي يا ابني؟
* انت مش قبل ما انزل قلت لي أقف ع الكورة؟
- أنا كان نيتي أقولك هدي اللعب
* وأنا مبدخلش في النوايا ياكابتن
- الكاتب الصحفي وائل قنديل: من الآخر .. الزمالك فريق لا يستحق جمهوره.. كل الاحترام للوايت نايتس.
- الكاتب الساخر وجيه صبري :

- يا شيخنا انا جيتلك النهاردة علشان عايز اتوب ومش عارف ان كانت توبتي هتتقبل واللا لا!
= يا أخ مرتضي مهما كانت ذنوبك بمجرد التوبة الي الله تذهب كل الذنوب
- حتي لو كنت بسب وبشتم كل شوية يا شيخنا
= حتي لو كنت بتسب وتشتم.. المهم الثبات
- لا انا خلاص نويت عمري ما هسب ولا هشتم تاني
= بارك الله فيك، هذه النية والاصرار علي التوبة الذين اراهم فيك والله من صفات العبد المؤمن
- العبد مين؟
= المؤمن
- يلعن (.............)
- المطرب محمد عطية: ههههههههههههه هموووت والله ... جووووووول و مؤمن زكريا تانى ... ده لو قاصد يحرق دمهم مش هيعمل كده ... مافيش فايدة مش هيكسبونا أبدا.
- المطرب محمد عبد العالم مادو : غضب ربنا على الجعجوع النجس .. للأسف هنتحمله ك أوفى جمهور مصري .. عاش الزمالك وجمهوره .. مبروك للأهلي الأفضل اليوم.
- الاديب خالد الصفتي: الزمالك زي ما عرفته طول عمري فريق معندوش لا روح ولا حماس و(مبيسترش) على مرّ الأجيال! ...
طول منا بتفرج بسأل نفسي: هو ده الأهلي اللي لعب له الخطيب وطاهر أبو زيد وأبو تريكة؟!
فيما عبر البعض عن سخريته بعمل صور ساخرة تحاكي بعض المشاهد في الافلام كالتالي: