بالفيديو.. موطنة: ظروفي المادية صعبة والحكومة رافضة تساعدنى

"حالتي تصعب على الكافر، بنام على الأرض، الحكومة عارفة ظروفي ومش بتساعدني، مش قادرة أعيش، المعاش مش بيكفينا", كلمات قاسية رددت بها إحدى السيدات وهى فى حالة ضيق شديد بسبب ارتفاع الأسعار وضيق الحياة المعشية والظروف الاقتصادية الصعبة التي يمر بها أغلب الموطنين المصنفين بأنهم تحت خط الفقر.
قالت ماجدة إبراهيم،60سنة، مقيمة بقليوب البلد: "جوزي كان بيشتغل سايس عربيات ومعاشة ضعيف، مش بيكفينا لأخر الشهر لأني بدفع منه إيجار الشقة اللي ساكنة فيها أنا وبنتي بعد ما انفصلت ومعاها ولد صغير".
وتابعت: "بنام علي الأرض عشان معنديش سرير أنام عليه، وحالتي المادية متسمحش إني أجيب سرير"، مستكملة: "كنت بشتغل في حضانة واتصابت في أيدي وبسبب ارتفاع أسعار الدواء مش قادرة أعالجها".
وأضافت: "أنا معنديش مصدر رزق أعيش منه أنا وبنتي نفسي أي حد يساعدني، ممكن استحمل غلاء الأسعار اللي وصلنا له ده في حالة له حد من الحكومة وقف جنبي وساعدني لأنهم عارفين ظروفي وعمرهم ما حلوا ليا مشكلتي ولا ساعدوني وأنا حالتي تصعب على الكافر".
وفى آخر الحديث قامت ماجدة بتوجيه رسالة ل"رئيس الجمهورية" قائلة: "يا ريس ياريت تساعدني وتوفر ليا معاش كويس أو مصدر رزق ليا أنا وبنتي".