اللى يعترض.. يطّرد

الدنيا ليه اتغيرت                         وحياتنا ليه اتمررت
وكل شىء أصبح كئيب                  وكل القلوب اتحجرت
الواطى أصبح متحكم                     هوه اللى بيأمر وبيحكم
محدث نعمة ومناصب                    طول عمره ع الناس يتهكم
كان عايش فى دور المتواضع            دلوقتى بيزايد ويبايع
عشان طريقه يصبح سالك                 فلازم يناور ويمايع
والمحتكرين غلوا الحاجة                  والمحتقرين مش لاقيين حاجة
ونعمل إيه ونعيش ازاى                     ظروفنا خلاص مش محتاجة
هنعيش ازاى بكام ملطوش                  فى وسط ناس مابيرحموش
 
تشوفهم تقول بنى آدمين                     لكن من جوه هما وحوش
لا تقولى زميل ولا صاحب                  مفيش حد يتصاحب
الكل بيقول نفسى وبس                       والحب خلاص باهت شاحب
وإن جيت فى يوم واعترضت                تلاقى نفسك اتشردت
ويقولوا عليك حاقد خاين                      ومش بعيد لو اطّردت
كلاب مسعورة وتنظيم مافيا                نهبوا بلدنا جابو لنا الكافية
لازم نواجههم بعزم وقوة                    وناخد حقوقنا ولو بالعافية
سيد أبوالنصر محمد
الإذاعة والتليفزيون