يا أهل الخبرة

يا أهل الخبرة بقينا فى أزمة بآراء خايبة وملهاش لزمة
خلت كل حياتنا مرارة والإحباط زايد بالحزمة
واللى إيديه فى الميه يا سيدنا دايما حاقد وبيحسدنا
واللى إيديه فى النار يا أخينا دايماً شايل هم بلادنا
شفت موظف فاتح درجه طالب رشوة وعشوة متينة
واللى ما يدفع يبدأ زجه فى أى مصيبة غريبة مشينة
شفت مهندس هدد جارنا لازم يهدم دوغرى جدارنا
أو يعمل له مخالفة سريعة لو ما أخدش الرشوة وزارنا
شفت شوارع ناعمة وهادية فيها جناين وزهور نادية
وعشان ميه ونور وخلافه فحتوا وباظ الشارع فدية
والتليفون محطوط أباجورة فاظة ولعبة كمان مكسورة
شفت الخط أتاريخه مسروق كله ده يبقى عليا فاتورة
والكشاف للنور بيبالغ عايز يلهف أى مبالغ
رحت رهنت هدومى وساعتى وبعت الصيغة كمان للصايغ
كل ده لأجل أسد ديونى بعد ما كل الناس ظلمونى
والمصلحة ما بقتش سريعة وأعمل إيه بالله دلونى
سلوكيات فى بلدنا عجيبة حاجة تحزن يا دى الخيبة
نفسى أشوف الناس فى بلدنا يصحى ضميرها.. وتخشى العيبة
القاهرة- المعادى