صبرى الشبراوى: الحاكم يجب أن يأتى من وسط الناس.. ولا يهبط عليهم بطائرة

استكمل الدكتور صبرى الشبراوى، أستاذ التنمية البشرية، عضو مجلس الشورى، الجزء الثانى من حواره مع الكاتب الصحفى محمود مسلم فى برنامج «منتهى السياسة» على قناة المحور، أمس الأول، حيث قدم حلولاً للمشكلات التى عرضها فى الجزء الأول من الحوار.
كشف الشبراوى عن أنه قدم ورقة إلى الرئيس مبارك تتضمن عدداً من الاقتراحات من شأنها إعادة المنهج فى إدارة مصر، موضحاً «مصر مش فقيرة، والإدارة لو ما شافتش قدرات البلد تبقى مش كويسة»، متسائلاً: ليه بنصحى الصبح على تعديل وزارى أو تغيير فى المحافظين ما نعرفش جم منين، المفروض يبقى فيه لجان استماع واختيار من متعدد، ومش لازم نكسر البيض كله عشان نعرف الممشش، ده أسلوب مكلف جداً، ولو عايزينى أقول إن الوزراء فى مصر كويسين، لأ «منيلين».
ورغم أنه أشاد بالدكتور أحمد زويل، العالم المصرى الحاصل على جائزة نوبل، فإنه اعتبر ما يحدث معه نموذجاً لحضارة تقليل القيمة، وقال: زويل مش هيرجع هنا عشان يتشل، المفروض إنه يبقى دافع للتغيير مش يغير بنفسه، للخروج من الاستعمار الداخلى المتمثل فى احتكار السلطة والسلع، وقال: نملك حرية كلامية لكنها غير مرشدة.
وأضاف: القائد المدير غير المدير القائد، وميزة أوباما أنه جاء من وسط الشعب، وما ينفعش تجيب واحد تقوله بكرة إنت هتبقى رئيس جمهورية، وما عنديش اعتراض على البرادعى، بس التغيير ما يبقاش كده، أنا اطحنت 20 سنة بعد عودتى من أمريكا مع الناس حتى أعرفهم وأملك القدرة على التأثير فيهم، ما ينفعش تجيب واحد قاعد فى حضانة حلوة وتقولى يقدر يغير، عمرو موسى كمثال بيقابل سفراء ووزراء إزاى هينزل السيدة والحوارى عشان يعرف الناس، لازم عشان تحكم تطلع من وسط الناس مش تنزل عليهم بطيارة.
وضحك الشبراوى وهو يتذكر أن جمال مبارك تلميذه: بالفعل درست له لكن جمال دلوقتى قائد كبير وله أن يفخر بما حققه فى 8 سنوات، وقدره أنه ابن رئيس الجمهورية، وده راجل أبوه وباعتراف الناس كلها قائد وحارب ولديه إحساس بالبلد والناس وقال: مبارك هو الذى سيغير المادة 76 من الدستور.
ورفض الشبراوى مصطلح رجال الأعمال وقال: بتاع البطاطا ممكن يقول على نفسه رجل أعمال، واللى بيحرك الإدارة إما رجال الإدارة أو رجال الدولة، أما رجال الأعمال فدول بيعرفوا يعملوا فلوس،
وأضاف: لو راجل الأعمال عايز يبقى راجل دولة يجب أن يضع حافظة نقوده أمامه ويقول دخل بكام وخرج بكام، وما يقولش أبويا وأخويا هما اللى بيديروا، وطالب رئاستى الوزراء والجمهورية بإعادة الهيكلة، لأن الرئيس مبارك مش هيعمل كل حاجة.