شقة

مسحراتى مصر البهية
اصحى وسبّح رب البرية
مشيت أرتل وأنشد وأجوِّد
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم أقبّل
وإن كنت قبلى.. لازم أبحر
ولحد آخر نفس ف صدرى
هاشد قلبى وتر وأسحّر
يا مصر قومى وشوفى نيلك
يا مصر قومى وضم سينا
نهر المحبة بينتمى لِكِ
يا مصر شوفى إحنا فين رسينا
مصر البهية.. بالعقل هيه
ف الذِكر آية.. ف العشق غية
اصحى وسبح رب البرية..
■ ■ ■
مسحراتى سقا
باتحمل المشقة
باقول للحب أيوه
وأقول للكره.. لأه
وبلادى واسعة جداً
مش لاقى فيها شقة
■ ■ ■
سقا مش باسقى ميه
باسقيكم نور عينيا
النيل فوق ضهرى شايله
علشان مصر البهية
باسقى زرعة بلادى
وباكد عشان ولادى
شوفت الحرام قصادى
ولا دوقت منه طقة
وباقول للحب أيوه
وأقول للكره لأه
وبلادى واسعة جداً
مش لاقى فيها شقة
■ ■ ■
ليه الفقير تلطم
وعاش مهجور محطم
ليه يسكن جوه حفرة
تحت صخور المقطم
ليه تاخدوا منى صوتى
وترضوا يا ناس بموتى
مايغركوش سكوتى
لكل من ترقى
باقول للحب أيوه
وأقول للكره لأه
وبلادى واسعة جداً
مش لاقى فيها شقة
■ ■ ■
تلات أوض وصالة
نقرب م العدالة
نصيبى ف خير بلادى
لا هو صعب ولا استحالة
يا صحاب الأولوية
مصر دى ليكم وليا
خدتوا الحتت اللى هية
ادونى ما تبقى
باقول للحب أيوه
وأقول للكره لأه
وبلادى واسعة جداً
مش لاقى فيها شقة
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أروحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب