«مش بتحب حسام براحتك لكن أيه اللي مش عاجبكم».. شوبير يدافع عن منتخب مصر

دافع الإعلامي أحمد شوبير حارس مرمى الأهلي ومنتخب مصر السابق عن أداء منتخب مصر في مباراة موريتانيا والأداء الذي يقدمه الفراعنة تحت قيادة المدير الفني حسام حسن.
وقال شوبير في تصريحات إذاعية اليوم الأحد: «فيه ناس كثيرة مش مبسوطة من فوزنا على موريتانيا وأنا شايف إن إحنا لعبنا ماتش كويس وأنا هحكّم دماغي مش همشي ورا حد واللي مقتنع بيه هو اللي هقوله».
اقرأ أيضًا: الأهلى يتخذ قرارًا جديدًا بشأن بيرسي تاو
وأوضح شوبير: «منتخبنا في الشوط الأول 3 محاولات مؤثرة على المرمى أنقذهم حارس مرمى موريتانيا والشوط الثاني سجلنا هدفين تريزيجيه ومحمد صلاح وكسبنا 2 صفر وفي الاخر اتهدد مرمانا بكرة أنقذها الشناوي وكورة بجوار القائم الشمال مفيش حاجة تاني».
وتابع شوبير: «طيب الناس مش عاجباها أيه، عشان نعرف أيه المطلوب منتخب مصر متصدر وكسبان 3 مباريات وجايب 9 أهداف في 3 مباريات ومدخلش فيه ولا جون، بمنتهى الأمانة مش شايف منتخبنا وحش».
وأضاف شوبير: «كمان حسام حسن كان عنده من الجرأة إنه يدفع بمحمود صابر وأحمد عيد وخالد صبحي، وعمل تغيير حلو سحب السرد باك محمد عبدالمنعم لما اتصاب ودفع بمصطفى محمد ورجع حمدي فتحي في قلب الدفاع».
واختتم شوبير: «الناس زعلانة جدا مني إني بقول هذا الكلام دي وجهة نظري أنا ماليش دعوة برأيك في حسام حسن دي بتاعتك أنت لكن في النهاية في عرض كويس وفي فوز وفيه تسجيل هدفين، وكمان الناس زعلانة عشان استبعاد عمر جابر واستبعاد مش عارف مين لكن أنا اللي عندي نتائج فقط، أنا مش بقول لك اعمل فرح وثورة عشان كسبنا موريتانيا لكن أنا عجبتني جدا الروح وفيه شغل حلو بيتعمل في منتخب مصر».