واحد «مزجنجي» والتاني بيحاول.. نجم الأهلي السابق يعلق على أنباء رحيل بيرسي تاو وكهربا

علق نجم النادي الأهلي ومنتخب مصر السابق، إبراهيم سعيد، على أنباء رحيل بيرسي تاو ومحمود عبدالمنعم كهربا لاعبي النادي الأهلي في الميركاتو الصيفي الجاري.
وقال إبراهيم سعيد في تصريحات عبر شاشة النهار: «النادي الأهلي أعلن خلاص بقاء بيرسي تاو بنسبة كبيرة جدًا، وده بسبب أنه مفيش عروض مناسبة جاتله في الوقت الحالي، والنادي الأهلي ميقدرش يستغنى عنه مجانًا لأنه تاو هيطلب عقده كامل اللي هو مليون و200 ألف دولار».
وأكمل: «وعشان كدة الأهلي استقر بنسبة كبيرة جدًا على بقاء بيرسي تاو معه خلال الموسم القادم، مشكلة تاو مع الأهلي أنه مزجنجي، وحسب تصريحات كولر بتقول أنه مش بيحب التمرين، وفي لعيبة كدة بتحب الماتشات أكتر من التمرين».
وزاد: «بيرسي تاو هيفضل مكمل مع النادي الأهلي لحين وصول عرض يليق باللاعب وبالنادي الأهلي للتفريط في اللاعب».
وأضاف: «بالحديث عن رحيل كهربا عن الأهلي، أنا بيعجبني في كهربا أنه بيحاول، والوقت اللي بتحتاجه فيه بتلاقيه وبيموت نفسه وبيتحرك على كل كورة، وكهربا وجوده مهم في النادي الوقت الحالي، إلا لو في بديل أفضل ساعتها هيبقى القرار ل كولر، ولكن اعتقد أن كهربا مستمر».
ووجه إبراهيم سعيد رسالة ل كهربا، قائلًا: «أتمنى أنه يبعد عن التوتر والعصبية وأنه يركز في الملعب فقط، وميحطش نفسه تحت ضغط عشان ميستعجلش، وبيلعب في أكتر من مركز سواء وينج أو فرود».
وبالنسبة ل أحمد عبدالقادر، قال نجم الأهلي السابق: «أحمد عبدالقادر رحل ل نادي قطر القطري بمبلغ 600 ألف دولار تقريبًا، سنة على سبيل الإعارة بعد تجديد عقده مع المارد الأحمر».