«الدفاع كان شوارع».. تعليق ناري من أحمد موسى بعد تعادل منتخب مصر ضد موزمبيق

أبدى الإعلامي أحمد موسى، استياءه الشديد من تعادل المنتخب المصري الأول لكرة القدم، أمام منتخب موزمبيق 2-2 في المباراة الأولى لمنتخب الفراعنة في بطولة كأس الأمم الإفريقية، مشيرا إلى أن المنتخب كان من الممكن يخرج فائزًا بأكثر من هدف.
وأضاف الإعلامي أحمد موسى، خلال برنامج «على مسئوليتي»، المذاع على قناة «صدى البلد»، أنه لابد من دعم منتخب مصر في المباريات المقبلة، لافتا إلى أن دفاع منتخب مصر كان شوارع في مباراة اليوم.
وأوضح أن مشوار البطولة لازال طويلا، وهناك ثقة كبيرة في لاعبي منتخب مصر، وما حققه منتخب موزمبيق اليوم مفاجأة وهناك فرحة عارمة لديهم كأنهم تعادلوا مع البرازيل.
وتابع أن المنتخب المصري، فرط في فوز سهل اليوم في أولى مباريات الفراعنة بالكان الإفريقي، مشددا على أن الثقة الزائدة كانت ستسبب في خسارة كبيرة اليوم.
وأضاف أن منتخب مصر تعادل بفضل دعاء المصريين، قائلا:«لسه بدري، ده أول مباراة، وهنعدي، وهنتأهل للدور الثاني من البطولة».
ووجه الإعلامي أحمد موسى، عتابا كبيرا للنجم المصري محمد صلاح، قائلا:«إنت لاعب كبير ونجم كبير، كنت فين النهاردة، لازم تقعد مع لاعبي المنتخب، وتوبخ اللاعبين، 100 مليون مصري وراء المنتخب، النهاردة كان في حاجة غلط، التشكيل نفسه غلط، كان في لاعبين في التشكيل مكناش لازم تكون موجودة في المباراة، لازم نركز، ولازم كمان ننتهز أي فرصة تيجي في المباراة».
واستنكر الإعلامي أحمد موسى، ما يحدث من بعض الأشخاص والفرحة في تعادل أو خسارة المنتخب، قائلا:«ليه كده، ليه الشماتة في بلدك، كلنا وراء المنتخب، لازم نركز في المباريات الجاية، مفيش بديل آخر، كفاية طبطبة، فيتوريا لازم يشوف حل في مباراة غانا، منتخب غانا قوي، ومتابع لهم في الدوريات الأوروبية، النهاردة مفيش منتخب ضعيف، كلهم محترفين في أوروبا، الكرة في إفريقيا اتغيرت».
وأوضح: «منتخب الرأس الأخضر، قوي مثل منتخب غانا، مشيرًا:«نقطة مباراة موزمبيق، جاءت من السماء، لكن خلاص، اللى عدى عدى، محمد صلاح دخل يشوط ركلة الجزاء بغل، وهو مش من طبيعته يشوط كده، منتخب مصر من المنتخبات المرشحين للفوز بالبطولة، والله منتخب موزمبيق، مكناش مصدق نفسه إن هو تعادل مع منتخب مصر، النهاردة مفيش منتخب ضعيف في إفريقيا، لكن لازم في حاجات لازم يعاد فيها الحسابات، لازم نشجع المنتخب، في مباراتين الأيام الجاية، لازم نشجع المنتخب، ونبص على اللي جاي، ونشتغل ونستعد منتخب غانا ونتأهل للدور الثاني في بطولة إفريقيا.. إن شاء الله عندنا أمل كبير في ربنا ورجالة منتخب مصر، محدش قصر معاهم، من أول الرئيس السيسي، وكل المصريين وراء المنتخب، كل اللى المنتخب عايزه اتعمل، والجمهور دوره الدعم، مش لازم نبص لأصحاب القلوب السوداء، ونشجع منتخبنا وندعمه«.