عمرو أديب: هو حق ربنا الدولار قدام الجنيه يبقى بكام؟

علق الإعلامي عمرو أديب، على الأزمة الاقتصادية العالمية، وقرارات البنك المركزي المصري الأخيرة لتسهيل عمليات الاستيراد.
وقال «أديب» خلال برنامجه «الحكاية»، الذي يعرض عبر قناة «إم بي سي مصر»: «التفاؤل كلام كله جميل، أنا بالنسبة لي المسألة بسيطة جدًا إني أشوف حركة اقتصادية ونقدية في المجتمع تقدر تقف قدام الأزمة مش تحل الأزمة».
وأضاف: «أنا مش بتاع الكلام ده، مش هقولك بسيطة ولقيناها، لأ هي مش بسيطة ولا لقيناها، في العالم كله، محمد العريان في أمريكا مش سايب الفيدرالي، شايفهم متأخرين جدًا، بقالنا 3 أيام الاقتصاد الأمريكي مخبوط في الحيط».
وتابع «أديب»: «هناك أزمة، بس هتحلها إزاي؟ بتوع الصناعة بيقولوا القرارات دي غير كافية، وإن مستلزمات الإنتاج مش بتوصل بالكميات المطلوبة».
وأكمل: «السؤال اللي في السوق وملوش رد واضح، هو الدولار الحقيقي يبقى سعره كام؟ حق ربنا يعني، هو حق ربنا الدولار قدام الجنيه يبقى بكام؟ إنت عامل حاجة جيدة إنت بتدرج في الزيادة، وعلى فكرة محدش بيتكلم إن الدولار هينزل، اللي بتسمعه هو هيعلى لغاية فين، أنا نفسي ينزل يارب يبقى التلاتة بتلاتة ساغ».
وعن نصيحته إلى المواطنين عما يفعلون خلال هذه الأزمة، قال «أديب»: «الحرص، بشويش يا جماعة، امشي عالقد وماتربطش نفسك بحاجة عالمدى الطويل».