«ابن امبارح واتفرعن».. فريدة سيف النصر تهاجم فنانًا في «موسى»

وجهت الفنانة فريدة سيف النصر رسالة عبر حسابها الرسمي على«فيسبوك» هاجمت خلالها فنانا رفضت الكشف عن هويته مشددة على أنه حديث العهد بالعمل الفني و«ابن امبارح» بحسب وصفها لكنه «اتفرعن».
وهو ما دفع متابعوها للسؤال عن صاحب الواقعة وهل تقصد الفنان محمد رمضان الذي تشاركه بطولة مسلسله الجديد «موسى» الذي يواصلان تصوير مشاهده في مدينة الإنتاج الإعلامي.
ونفت «سيف النصر» ذلك موضحة أنها تتحدث بشكل عام عن بعض الفنانين الجدد الذين لايملكون رصيدا فنيا كبيرا ولم يعملوا مع كبار المخرجين مثل جيلها لكنهم يسيئون التعامل مع من حولهم.
وتابعت «سيف النصر» قائلة: «شوية إذا أراد الله ونازلة لمدينة الإنتاج مسلسل موسي مع النجم الجميل محمد رمضان وإخراج محمد سلامة المحترم وتصويرنا فجرا هم هناك في عز الصقيع مش هزار. إتعلمنا زي الجيش مافيش دلع وتمام يافندم. بينما في ناس متدلعة ولا بلاش».
وواصلت: «اتعلمنا على إيدين أكبر مخرجين بجد مش هزار ناس ساهمت بتاريخ السينما وناس الدراما اللي عايشة اتبنت على كتافهم ومعاهم أكبر كتاب اكبر نجوم. ناس الله يرحمهم ويرحم زمانهم عمرهم ما قالوا احنا كبار. عمرهم ماتكبروا عمرهم ماسبوا ولعنوا ولا قللوا احترام حد حتي الكومبارس. لأنهم ماكانش عندهم عيب في الدور الثانوي اللي في غمضة عين منهم من أصبح كبار النجوم. ناس علمونا واحنا صغيرين كلمة حاضر للمخرج واحترام الأراء ومناقشتها بأدب دون تكبر لأن ماحدش اتولد كبير بيبقي صغير ويكبر هي الحياة كده. ناس بتسلم لناس لازم نحط نفسنا مكانهم من كل النواحي سلف ودين».
واستكملت «سيف النصر»: «اتعلمنا نقول السلام عليكم وصباح الخير للكل واتعلمنا نقول شكرا لأي عامل شايل على كتفه كاميرا كام كيلو أو ميكرفون أو لمبة ورافع إيده أو إنتاج بيخدمك ويكفل لك الراحة من أول البوفيه لحد السواقين. اتعلمنا أن اللي بيحترم بيحترم نفسه».
وأوضحت فريدة سيف النصر : «لذلك لما تلاقي حد ابن امبارح ويزعق تتخض ايه ده قال كنت في جره وخرجت بره وسكتنا له دخل بحماره. طيب اتفضل خليه يبطل رفص، احنا بقي اللي قبلنا حتي لو احنا بقينا أبطال العمل لازم نقول ياأستاذ أو أستاذه أو ماما أو بابا ونبوس إيديهم وراسهم. ونقول حضرتك واللي أصغر مننا ايه ياحبيبتي وايوه ياحبيبي والممتاز أداء نشجعه ونقول له يانجم. ليه لأه. الرسول قال الكلمة الحلوة صدقة. وأجدادنا قالوا الملافظ سعد. النهارده بقي يبقي فلان رصيد حياته مش أكتر من 10 اتناشر مسلسل ولاقوة الابالله. بتتعامل مع يوسف شاهين اللي عمره ماشتم غلبان أو كومبارس ألا يقول يابابا وياهانم ممكن يتناغش مع ممثل كبير ويحتد لكن كومبارس أبدا. جبر الخواطر».