من استلم الأجر .. حاسبة الله على العمل

قول كانت أمى يرحمها الله ، تقوله لى عندما ترى اهمالاً وانفلاتاً ما من أحد موكل اليه اداء مهمة ما مقابل اجر.
وكانت تزيد القول لتعلمنى شيئ ما فى الحياة فتقول يابنى لن يرجعك الى الصواب غير ضميرك ، فإن مات ضميرك يوم ما ، فلن يردعك احد .. وإن مات ضميرك فعلى الدنيا السلام .. رحم الله أمى.
أتذكر هذه الكلمات وأنا أرى يومياً عمال النظافة يملأون الشارع الذى أسكن فيه ولايلقون بالاً للقمامة التى تملأ الشارع وحينما يطلب أحد منهم برفع القمامة يتعذرون بأن راتبهم غير كافى وقليل وعلى هذا الاساس لايؤدون عملهم اليومى الذى يتقاضون عنه راتب شهرى من الحكومة .. إذاً لماذا يأتون الى العمل يوميا مبكرين ويملأون الشارع جيئة وذاهاباً؟ أرد وأقول لأنى يوميا أراهم يعملون لدى المحلات التى بالشارع نظير أجر آخر ,ان طلبت منهم رفع القمامة يرد ويقول "طيب صبح علي الأول" .. وبرده تفضل الزبالة فى مكانها لو مصبحتش عليه كويس "يعنى بجوز جنيهات و بحته بخمسه" لك الله يا مصرى.
ضج السكان فى شارعنا .. طيب ياسيدنا نعمل ايه .. رد واحد حصيف وقال نهبدهم شكوى عند المسئول فى الحى .
راح الحصيف ومعاه واحد من جيرانه على الحى ، وسألوا عن المسئول عن عمال النظافة .. قابلهم راجل طيب ووجهم لسيادة اللواء المسئول عن محاسبة شركات النظافة التى يتبع لها هؤلاء العمال.
سيادة جايب كرسى وقاعد فى الشمس التماساً للدفئ .. ولكن بصراحة كانت مقابلته للحصيف وجاره مقابلة زى الفل .. وريح قلب الشاكى وقاله سأقوم باللازم حتى لو أضطريت الغى عقد شركة النظافة دى وكمان أعطاهم رقم تليفون مكتبه والفاكس علشان مايكلفوش نفسهم المرة الجاية ويتصلوا بس .. ياسعدك وهناك يامصرى.
رجع الحصيف وجارة ولكن فى اليوم الثانى لهذة الزيارة .. حضر عمال النظافة كالعادة بس بردة ودن من طين وودن من عجين .. ولما جارنا وصاحبة الحصيف راحوا يكلموا عمال النظافة .. رد أضعفهم جسماً "يابيه .. خلى الشكوى تنفعك" .
طبعاً جارنا اتزرزر ووجهه أحمر ورد وقال للعامل ، شوف أنا هأعمل ايه.
اتصل بسيادة اللواء ، فطيب خاطره وقاله معلهش أنا هاتصرف.
أنتظر صاحبنا وجارة يوم .. يومين .. ثلاثة وبعدين يانهار أبيض ، لسه الزباله فى مكانها ويمكن بتيجى زبالة من بره الشارع وتتحط عليها.
راح جارنا والحصيف فى زيارة تانيه لسيادة اللواء .. وجدوه قاعد مكانه فى الشمس علشان ياخد شوية شمس.
حينما رأى سيادة اللواء جارنا وصاحبة قالهم "أيه يا أساتذه .. "و أنا ما وراييش حد غيركم ".
طبعا كانت مفاجأة شديدة على جيرانا .. وحصل جدال بدون نتيجة.
جيرانى حبايبى أصيبوا بخيبة أمل كبيرة .. وقعدوا يصرخوا ويقولوا عليه العوض ومنه العوض .
زاد الطين بله أن عمال النظافة كانوا بيمشوا فى الشارع ويغنوا أغنية جميلة من الفلكور المصرى ويقولوا "كايده العزال أنا من يومى .. ايوا .. آه".ياترى مين العزال.
فى اليوم الثانى ذهب شقيقى الى قسم الشرطة لتحرير محضر بفقد رخصة السيارة لأن المرور لايقبل استخراج رخصة بديلة دون محضر من قسم الشرطة .
كانت المقابلة جميلة وزى الفل وناس ودودين للغاية حسب وصف شقيقى .. بس حضرتك انتظر شويه .. وبعد عدد كتير من الشويات انتظار ، سلموه ورقة مكتوب عليها محضر وبه بيانات السيارة بس بدون ختم عليها.
لما استفسر شقيقى لماذا بدون ختم كان الرد " الختم عند المأمور" فطلب شقيقى أن يدخل للمأمور كى يختم المحضر .. عيش بقى فى التفاصيل.
بعد كلام وحديت .. ظهر فجأة ناصح أمين لشقيقى وقال له ياأستاذ روح أعمل المحضر دا فى القسم اللى جنب أدارة المرور .. أستفسر شقيقى فرد عليه الناصح بأن المحضر من هنا ليس له أى قيمة.
لم يقتنع شقيقى وقعد يضرب أخماس فى أسداس ويقول لك الله يا مصرى.
اتنين من الحواديت اللى مش ممكن تشوفهم ولا فى بلاد "نمنم" .. وأشياء تدعوا كل واحد عاقل فى البلد يمشى يخبط ايديه فى بعضها.
طيب ياجماعة الخير اذا كنتم شغالين موظفين فى الحكومة ولا فى شركة ومسئول عن عمل تتقاضى عليه أجر .. أذا كنت غير راض عن الأجر الذى تتقاضاه .. فلماذا لاتترك عملك وتحاول أن تبحث لك عن عمل بأجر أعلى .. وأترك الفرصة لبنى آدم تانى ممكن يكون محتاج للعمل.
وياجماعة الخير ممكن تكون بتاخد أجر كويس ومناسب .. وممكن يكون أجر مرتفع بس لا تؤدى عملك الموكل اليك لأنك اما كسلان وأما غير كفء للعمل .. فالنتيجة أنك تأخذ أجراً بغير عمل .. فهل هذا يجوز عند المسلمين ولا المسيحين ولا حى اللى ماعندهمش دين .. لا والله لايجوز.
يرحمك الله يا أمى على درس تعلمته منك وان شاء الله لن أنساه ما حييت.