«هيوحشني خفة دمك وتسامحك».. رسالة مؤثرة من حفيدة رجاء الجداوي (صور)

وجهت حفيدة الفنانة الراحلة رجاء الجداوي رسالة مؤثرة إلى جدتها، بعد أيام من وفاتها، قائلة: «هيوحشني إني أدخل أوضتك فجأة وأقولك: امتحان مفاجئ هاتي السكريبت، وأسمع لك ونقعد نضحك لحد لما ندمع».
وقالت روضة هندي في منشور على موقع «فيسبوك»: «هيوحشني إني ادخل عليكي وأقولك: ملكيش نفس تتغلبي في دورين كوتشينة يا جوجا، وكالعادة طبعا بتقطعيني، هيوحشني إني أكون نايمة وألاقي مامي داخلة عليا تقولي إلحقي أنا نزلت Story أو طلعت live أو أي كارثة من الكوارث التانية بتاعتك نجري أنا ومامي على أوضتك وتقولي لنا جملتك الشهيرة: ماله التليفون أبوقرص».
أضافت: «هيوحشني إني أقعد أتفرج عليكي وأتعلم منك، هيوحشني تريقتك مع صحابي، هيوحشني خفة دمك وكرمك وأخلاقك وتسامحك، هيوحشني إنك تفهميني وتناقشيني وتساعديني وتديني رأيك، كان عندي 43 يوم أستعد فيهم، بس إمبارح لقيت نفسي بفتح باب أوضتك بقول لك يا أنا ووقفت سكت كتير وقلت الله يرحمك يا حبيبتي، شكرا على كل حاجة».
وبعد صراع دام 43 يومًا مع فيروس كورونا المستجد، ودعت الفنانة القديرة رجاء الجداوي عالمنا، الأحد الماضي، عن عمر يناهز 82 عاما، وأًعلنت إصابتها بالفيروس المستجد يوم 24 مايو الماضى، وجرى نقلها إلى مستشفى عزل أبوخليفة في الإسماعيلية، حتى لفظت أنفاسها الأخيرة.