صبرى فواز: أنا بطل «العهد».. و«السبكي بيصرف على السينما من جيبه»

قال الفنان صبرى فواز، إنه يبحث دائمًا عن العمل الجيد الذي يتذكره الجمهور بعد سنوات طويلة، ولا يشغله أي أمور أخرى، وأنه يكفيه أن يحفظ الجمهور الدور والايفيهات والجمل، سواء في الشارع أو السوشيال ميديا.
وأضاف فواز، في برنامج «شيخ الحارة» مع المخرجة إيناس الدغيدى، على قناة القاهرة والناس، «قبلت إنى أتحط ورا في الأفيشات، بس النتيجة، أن إيفيهاتى وجملى أنا اللى بتكون قدام وبتنتشر على السوشيال ميديا وفى الشارع، ولكن الظروف بتحكمها الواقع، والدليل أنه في مسلسل (العهد) أنا البطل، في مسلسل» (بنات موسى) أنا البطل».
وتابع فواز: «همى طول الوقت أعمل دور فيه شغل تمثيل، أو إنى أموت والأدوار تكمل، ربما يكون التخديم الإعلامى فيه مشكلة، أو تقصير، وأتذكر واقعة، في مسلسل بين السرايات، حيث اشترت القناة المسلسل، وبدأت تذيع البروموهات، وفى أحد البروموهات كان يكون 8 من الأبطال مافيهومش صبرى فواز، رغم إنى بطل مع باسم سمرة، بعد كورونا الموضوع هيكون مختلف في التوقيع»
وعن السبكى قال فواز: «لا أجامل السبكى، هو يستحق يتجامل بسبب شغله الكتير الحلو، أي انتاج بشرى فيه الحلو والوحش، والدليل إنه لحد النهاردة الناس بتتفرج على مسلسل رمضان كريم، وهو إنتاج السبكى، فهو ليس كما يقال إنه بيضيع واجهة السينما المصرية، بالعكس له أفلام جيدة، وأفلام نص نص وأفلام سيئة، وأحيانا بيطلع من جيبه فلوس علشان يصرف على شغله، وأتذكر واقعة معه، كنا بنصور مسلسل رمضان كريم وسمعته من خارج غرفتى بيتخانق مع المحاسب إنه يطلعلى دفعة لأنه عارف أني مش بطلب فلوس».