د.على جلال كاشف (لا أنا إخوان ولا دياولو)

أنا العاشق تراب وطنى
لا أنا إخوان ولا وطنى
ولا تفكيرى ليبرالى
ولا علمنى علمانى
ولا نصرنى نصرانى
أنا مصرى..
ما تسألنيش وإيه تانى
بيسقونا العسل مسموم
بإسم الدين ينادو نقوم
وبسم الدنيا ناس تانيه
بتبعدنا عن القيوم
يا مركب فى البحور تاهت
يا مصر مش كانت هانت
يا ثوره فوقى صحى النوم
يا كام ألف ائتلاف مقسوم
يا مية تيار ومية مله
مفيش تحت الشجر ضله
جموع وجموع ومش ممنوع
تزيد ما تزيد..لكن قله
مدام الرأى مش واحد
فكتر أعدادنا دا عله
مريض وطنى ومين علو
لا انا اخوان ولا دياولو
ولا علمانى من باولو
ولا ليبرالى باع أهلو
أنا مصرى...
وادى المصرى وادى أصلو
ميقدرش يكفر حد
ولا يتعدى ع الأديان
ولا يقدر يخطى الحد
ولا يستنكر الإنسان
على مر التاريخ مَر
على أحزان وفرقه ومُر
وكان دايما لأنه الحر
يعلا لفوق وما يوطى
أنا المصرى..انا الوسطى
أنا الأزهر يا عم الفاضى
ولو يحسمها صدقنى ...
أنا هرضى ...
وهتبقى انت كمان راضى
وتبقى إبنه... مش تبقى
أبوه وكمان عامل قاضى
يا أزهر يا بو مصر يا ريت
تدخل كل حى وبيت
تهزم أى فكر مميت
بقالنا سنين على بابك
أدى صحابك وأحبابك
وأدى مصر اللى مش قادره
تقوم من تانى فى غيابك
لا دا ولا دا ولا دياولو
ولا غيرك هنندهلو
كبير الدار يُطاع أمره
لانه امين على أهلو
لا أنا إخوان ولا ديا ولو
د.على جلال كاشف
alikashef91@yahoo.com
http://www.facebook.com/Ali.Galal.Kashef